¹ نطلب منكم بالوداعة و الصبر تاع المسيح, انا الذليل كي نكون حاضر معاكم, بالصح جريء كي نكون بعيد عليكم. ² نتمنى باه كي نكون في وسطكم ما تخلونيش نحكي معاكم بهاذيك الجرأة اللي نشوفها مناسبة للناس اللي يحسبوا فينا نمشيو بالجسد. ³ حتى اذا كنا نعيشوا بالجسد, بالصح ما نحاربوش بالجسد. ⁴ على خاطر السلاح تاعنا في الحرب ما هوش جسدي, بالصح يطيح الحصون بالقدرة تاع الله. ⁵ نهدم كل شكوك و كل عقبة تعلى على حساب معرفة الله, و نأسروا كل تخمام لطاعة المسيح, ⁶ واجدين باه نعاقبوا كل معصية, وقت اللي تكون فيه الطاعة تاعكم كاملة. ⁷ تواجهوا الامور بالحقيقة؟ اللي واثق من روحو انو للمسيح, بينو و بين روحو يدير في حسابو: كيما هو راه في المسيح, احنا ثاني رانا في المسيح! ⁸ ما نحشمش اذا كان زدت شوية و فخرت بالسلطان اللي مد هو لنا الرب, مش باه نهدموكم بالصح باه نبنِيوكم. ⁹ باه ما نبانش كي شغل راني نخوف فيكم بالبريات تاعي. ¹⁰ على خاطر كاين اللي يقول: "في البريات كلامو عنيف و قاسي, اما كي يكون حاضر هنا ضعيف, و كلامو تافه". ¹¹ واحد كيما هاذا يدير في بالو: احنا في لكلام تاعنا بالبريات و احنا غايبين, كيما لكلام تاعنا بالفم و احنا حاضرين. ¹² ما نحطوش ارواحنا مع الناس اللي يشكروا في ارواحهم, و ما نقارنوش ارواحنا بيهم. على خاطر همّا يقيسوا في ارواحهم على ارواحهم, و يقارنوا في ارواحهم مع ارواحهم, ناس ما يفهموش. ¹³ و احنا ما نفخروش بالشيء اللي يعدي حدود خدمتنا, بالصح على قد القانون اللي قسمهولنا الله, على قد الشيء اللي وصلنا لو معاكم ثاني. ¹⁴ احنا ما نقولوش الشيء اللي ما صراش تقول ما وصلناش عندكم. على خاطر وصلنا عندكم صح و معانا انجيل المسيح. ¹⁵ و ما نتعداوش هاذيك الحدود و نفخروا بالخدمة تاع غيرنا, بالصح متمنيين ـ يزيد الايمان تاعكم ـ و تزيد تتوسع خدمتنا في وسطكم في الحدود تاعنا, ¹⁶ و نزيدوا نروحوا حتى لأبعد من بلادكم. باه ما نفخروش بالخدمة اللي دارها غيرنا في الحدود تاع خدمتهم. ¹⁷ بالصح: "اللي يحب يفخر يفخر بالرب". ¹⁸ على خاطر اللي يشكرو الله هو اللي يكون مقبول عند الله مش اللي يشكر روحو.