¹ من عند بولس الرسول تاع يسوع المسيح كيما حب الله, و من عند تيموتاوس الاخ, للكنيسية اللي في كورنتوس, لجميع القديسين اللي في اخائية الكل: ² ليكم نعمة و سلام من عند الله بابانا و الرب يسوع المسيح. الله تاع كل التعزية ³ يتبارك الله الاب تاع ربنا يسوع المسيح, الاب الرحيم و اله كل عزاء, ⁴ اللي يشجعنا في وسط الصعوبات اللي نعديو بيها الكل, باه نكونوا حتى احنا قادرين نشجعوا الناس اللي يكونوا في محنة, كيما عزانا الله نعزيوهم. ⁵ على خاطر على قد ما تكثر لوجاع تاع المسيح فينا, تكثر فينا ثاني التعزيات تاعو. ⁶ اذا كنا احنا في المحنة باه تتشجعوا انتم و تخلصوا, و اذا كان تعزينا على خاطر انتم تشجعتوا و ربحتوا الخلاص. ⁷ يبقى دايما الرجاء تاعنا من حيهتكم ثابت. عارفين باللي كيما كنتوا شركاء تاع المسيح في لوجاع تاعو, هكا راح تكونوا شركاء في التعزية ثاني. ⁸ ما نحبوش نخبِيو عليكم يا الخاوة المشاكل اللي صرات لنا كي كنا في اسيا, و كيفاه كانت صعيبة علينا ياسر اكثر من اللي نقدروا نستحملوا, حتى يأسنا من لحياة, ⁹ و كنا حاطين ارواحنا راح نموتوا, باه ما نتكلوش على ارواحنا بالصح نكونوا متوكلين على الله اللي يحيي الموتى, ¹⁰ اللي منعنا من هذا الموت و مازال يزيد يمنعنا. نعم عندنا فيه رجاء انو مازال يزيد يمنعنا. ¹¹ و انتم ثاني من جيهتكم تعاونوا فينا بالصلاة, و كي يباركنا الله باستجابة صلاة ناس ياسر, راح يكونوا ناس ياسر اللي يشكروا الله على جالنا. بولس يبدل الخطط تاعو ¹² بهاذا احنا نعتزوا: الضمير تاعنا يشهد لنا باللي سلوكنا في هاذي الدنيا كان في البساطة و التقوى حساب النعمة تاع الله, مش بالحكمة تاع البشر, بالخصوص من جيهتكم انتم. ¹³ و احنا ما نكتبوا لكم غير الشيء اللي كي تقراوه تفهموه. و نتمنى تفهموا مليح حتى للخر, ¹⁴ كيما فهمتونا شوية احنا ثاني, احنا نعتزوا بيكم و انتم ثاني تعتزوا بينا في نهار الرب يسوع. ¹⁵ اول حاجة حبيت نجيكم بهاذي الثقة, و ثاني باه تزيد تكون لكم نعمة اخرى. ¹⁶ كي نعدي عليكم في طريقي لمكدونية, و ثاني حتى كي نرجع من مكدونية, باه نشبع منكم و من لثم تسافر لليهودية. ¹⁷ بلاك نكون متسرع كي حبيت ندير هاذا الشيء؟ و الا بلاك نخمم تخمام تاع بشر؟ و نكون بين هيه و لا لا في وقت واحد؟ ¹⁸ بالصح الله شاهد باللي كلامنا ماهوش بين البينين. ¹⁹ على خاطر يسوع المسيح ابن الله, اللي بشرنا بيه في وسطكم, انا و سلوانس و تيموتاوس. ما كانش نعم و لالا, بالصح كان كله نعم. ²⁰ على خاطر مهما كانت الوعود تاع الله هو دايما فيه "النعم" و "الامين", للمجد تاع الله. ²¹ بالصح الله هو اللي يثبتنا احنا و اياكم في المسيح, و هو اللي اعطانا المسحة ²² و هو اللي ختم علينا ثاني, و اعطالنا عربون الروح في قلوبنا. ²³ بالصح الله شاهد عليا, باللي ما جيتش لكورنتوس على خاطر شفقت عليكم, ²⁴ ما نحبوش نكونوا مسيطرين على الايمان تاعكم, بالصح نخدموا معاكم باه تكونوا فرحانين. راكم ثابتين في الايمان.