¹ وكي عاد المسيح قاسى لوجاع في الجسد على جالنا, انتوما ثاني تسلحوا بهاذي النية. ² باللي كل من يقاسي لوجاع في الجسد, يبّطل المعصية, باه يعيش اللي بقالو من عمرو وهو يدير في المشيئة تاع الله, و يبعد على المعصية. ³ و يكفينا الزمان اللي عدى من حياتنا واحنا نعيشوا كيما الناس اهل الدنيا, ماشيين في الدعارة و الشهوة, و الشراب, و لفساد, و التفرعين, ونعبدوا في لصنام المحرمة, ⁴ الشيء اللي يخليهم اليوم يستغربوا كيفاه ما تجريوْش معاهم وراء هاذي الامور بالذات كيما موالفين, و يطّيحوا فيكم. ⁵ و ربي اللي راح يدين الحيين و الموتى راح يحاسبهم. ⁶ على جال هاذا الشيء حتى الموتى ثاني تبَشروا, باه يتحاسبوا كيما الناس لخرين بالجسد, و يحياو عند الله بالروح. ⁷ او كل شيء قريب يفُض, ارزنوا و اتولهوا للصلاة. ⁸ بالصح قبل كل شيء, خليوْ لمحبة اللي بيناتكم تكون قاوية, على خاطر لمحبة تستر ذنوب ياسر. ⁹ كونوا مضيافين مع بعضاكم بلا ما تشكيوْ. ¹⁰ و كل واحد منكم يخدم لخرين بالموهبة اللي مدهالو ربي, كيما ناس صالحين وكّلهم ربي على النعمة تاعو المتنوعة. ¹¹ اللي يتكلم يتكلم باقوال الله. و اللي يخدم يخدم بالقدرة اللي مدهالو الله, باه يتمجد الله في كلش بيسوع المسيح, اللي ليه الجاه و العزة على طول الزمان دايما. امين. لمشاركة في لوجاع تاع المسيح ¹² يا لحباب, ما تستغربوش لمحاين الكاوية اللي تصرى بيناتكم, اللي بنارها تجرب ايمانكم, تقول حاجة غريبة قاعدة تصرالكم, ¹³ افرحوا راكم كيما تشاركوا المسيح في لوجاع تاعو, تزيدوا تفرحوا اكثر و اكثر نهار اللي يبان في الجاه تاعو. ¹⁴ يا سعدكم كان عايروكم على جال اسم المسيح, على خاطر روح المجد, روح الله يستقر عليكم. همّا يكفروا على الله, اما انتوما يتمجد فيكم الله. ¹⁵ ما يقاسيش الواحد منكم و هو قتال ارواح و الا سرّاق والا ماهوش ناس ملاح و الا يدّخل روحو في حوايج خاطينوا. ¹⁶ بالصح اذا كان يقاسي على خاطرو مسيحي, ما يحشمش, و يمجد الله على جال هاذا الاسم. ¹⁷ وصل الوقت باه يبدى لقضاء تاع الله باهل بيت الله. و اذا كان بدى بينا احنا, كيفاه راح تكون لاخرة تاع الناس اللي ما قبلوش الانجيل تاع الله؟ ¹⁸ و "اذا كان المتّقي بالسيف يمنع, وين راح يبان الفاجر و المذنب؟" ¹⁹ مالا الناس اللي قاعدين يقاسيوْ كيما حبْ ربي, يعملوا الخير يتوكلوا على الله الخالق الامين.