¹ تبعوا لمحبة, بالصح اجتهدوا للمواهب تاع الروح, و بالخصوص باه تتنبأوا. ² على خاطر اللي يتكلم بلغة مايتكلمش مع الناس راه يتكلم مع الله. على خاطر واحد ما يفهمها بالصح هو بالروح يتكلم بالاسرار تاع الله. ³ و اللي يتنبأ , يكلم الناس باه يبنيهم بالتشجيع و التعزية. ⁴ اللي يتكلم بلغة يبني روحو, واللي يتنبأ يبني الكنيسية. ⁵ انا ما ذابيا كلكم تتكلموا بلغات, بالصح يكون خير كي تتنبأوا. على خاطر اللي يتنبأ اعظم من اللي يتكلم بلغة, غير كان لقى شكون يترجم لو, باه الكنيسية تتبنى. ⁶ و ضرك يا لخاوة, كان جيتكم و انا متكلم بلسانات غريبة, باه راح ننفعكم, لو كان ما نكلمكمش اما باعلان, و الا بكلام علم, و الا بنبوة, و الا بتعليم؟ ⁷ الحاجات اللي ما عندهاش روح الي تمد اصوات: زمارة و الا قيتارة, بالصح بالرغم من هاذا تمد صوت مخالف. كيفاه تعرفوا صوت الزمارة و الا الحاجة اللي عزفوا بيها؟ ⁸ و حتى البوق لو كان يمد صوت ماهوش باين, شكون يوجد روحو للحرب؟ ⁹ حتى انتوما ثاني كيفاه تمدوا بالالسنة كلام يتفهم, و كيفاه الناس يعرفوا واش راكم تقولوا؟ و الا تروح هدرتكم في لهواء. ¹⁰ بلاك كاين انواع تاع لغات ياسر خلاص في الدنيا, و ما كان حتى واحد منها بلا معنى. ¹¹ واذا كنت ما نعرفش اللغة نكون غريب عند المتكلم, و حتى المتكلم يكون غريب عندي. ¹² هكذا انتم ثاني, و اذا راكم تطلبوا المواهب الروحية, اطلبوا على جال البنيان تاع الكنيسية باه تزيدوا. ¹³ على هاذا اللي يتكلم بلغة يصلي باه يترجمولو, ¹⁴ على خاطر كان كنت نصلي بلغة, معناها الروح تاعي قاعدة تصلي, بالصح في فكري ما كاين حتى ثمار. ¹⁵ امالا كيفاه؟ نصلي بالروح, ونصلي ثاني بالفكر. نرتل بالروح, و نرتل ثاني بالفكر. ¹⁶ على خاطر اذا انت باركت بالروح, كيفاه الشخص العادي يقول: "امين" كي انت تشكر؟ على خاطر ما يفهمش واش راك تقول! ¹⁷ حاجة مليحة كي انت تشكر, بالصح لاخر ما يتبناش. ¹⁸ نشكر ربي اني نتكلم بلغات اكثر منكم الكل. ¹⁹ بالصح, في الكنيسية, ما ذابيا نتكلم خمسة كلمات بفكري باه حتى لخرين ثاني يتعلموا, اكثر من اللي نقول عشر الاف كلمة بلغة اخرى. ²⁰ يا لخاوة, ما تكونوش صغارفي تفكيركم, بالصح كونوا اولاد في الشر, و في الفكر كونوا كاملين. ²¹ مكتوب في الشرع: "راح نكلم هاذا الشعب بلسان و لغة اخرى غريبة, و حتى كيما هاكذا ما يسمعوليش, يقول الرب". ²² امالا الهدرة ياللغات هي معجزة, موش للمومنين بالصح للي ما هومش مومنين. ²³ اذا كان تلمت الكنيسية كاملة في مكان واحد, و كانوا الناس الكل يتكلموا بلغات, و دخل عليكم شخص عادي و الا شخص ما هوش مومن, ماهمش راح يقولوا عليكم راكم تخرفوا؟ ²⁴ بالصح اذا كانوا كلهم يتنبأوا, و دخل واحد ما هوش مومن والا واحد عادي, راح يتلام من عند الناس الكل, و راح يحكموا عليه الكل. ²⁵ و هكذا تولي الحوايج الي مخباها في قلبو باينة. و هكذا يركع و يسجد لله, و ينادي: ان الله بالحق فيكم. النظام في العبادة ²⁶ امالا يا لخاوة كيفاه: كي تتلموا للعبادة خلي يكون لكل واحد منكم مزمور, و عندو تعليم, و عندو لغة, وعندو اعلان, و عندو ترجمة. خلي كل شيء يكون للبنيان. ²⁷ اذا كان واحد يتكلم بلغة, كل زوز مع بعضاهم, و الا ثلاثة ثلاثة, و بنظام و واحد يترجم. ²⁸ بالصح الا ما كانش كاين مترجم يسكت هاذاك الي يهدر بلغة, و يهدر بينو وبين روحو و الله. ²⁹ بالصح الانبياء يتكلموا زوز والا ثلاثة, و لخرين يحكموا. ³⁰ بالصح اذا كاين واحد اخر قاعد وجاه كلام من عند الله يسكت هاذاك لول و يخليه يتكلم. ³¹ على خاطر تتقدروا تتنبأوا بالواحد بالواحد, باه الكل يتعلموا و يتشجعوا. ³² و لنبياء يقدروا يسيطروا على ارواحهم. ³³ على خاطر الله ماهوش اله فوضى هو اله تاع سلام. هكذاك ثاني في جميع لكنايس تاع القديسين, ³⁴ النساء يسكتوا في لكنايس, مايجوزش ليهم يتكلموا, لازم عليهم يخضعوا كيما وصى الشرع. ³⁵ بالصح اذا كان حبوا يتعلموا حاجة, يسقسيو رجالهم في الدار, على خاطر عيب لمرى تتكلم في لكنيسية. ³⁶ و الا من عندكم انتوما خرجت الكلمة تاع الله؟ و الا عندكم انتوما برك و فضت؟ ³⁷ و اذا كاش واحد حاسب روحو نبي والا انسان روحي, يكون في علمو بلي الشيء اللي كتبتو هو لوصية تاع الله. ³⁸ و اذا دار روحو ما علابالوش, انتم ثاني ماعلابلكمش بيه! ³⁹ امالا يا خاوتي اسعاو للتنبؤ, و ما تمنعوش التكلم بلغات. ⁴⁰ بالصح ديروا كل شيء كيما يليق وبنظام.