¹ O le faaaliga lenei ia Iesu Keriso, na tuuina atu e le Atua ia te Ia, e faailoa atu i ana auauna mea ua lata ona tutupu. Na ia faailoa e ala i Lona auina atu o lana agelu i lana auauna o Ioane. ² o le na molimau atu i le Upu a le Atua, ma le tautinoga ia Iesu Keriso, i mea uma na ia vaai i ai. ³ E manuia le faitau leotele i lenei valoaga, ma i latou na faalogo i upu o lenei valoaga, ma usitaia mea ua tusia ai, aua ua latalata mai le taimi. ⁴ Ua tusi atu Ioane i ekalesia e fitu i Asia: Ia ia te outou le alofa tunoa, ma lona filemu, aua o Ia o Nei, o Ananafi, ma a Taeao, ma faapea ona auina mai i agaga e fitu o lo o i luma i lona nofoalii, ⁵ e faapea fo'i ona auina mai ia Iesu Keriso, o Ia o le molimau faamaoni, o le ulua'i tama na fanau mai i le ua oti, ma le pule i tupu uma i le fogaelelele. O le alofa ia i tatou, ma Ia faasaoloto i tatou mai ia tatou agasala uma i Lona toto. ⁶ Na Ia faia mo i tatou o se malo, o ni ositaulaga mo lona Atua ma lona Tama, ia ia te Ia le mamalu, ma le mana e faavavau faavavau lava Amene. ⁷ O lenei, e sau o Ia i ao, e vaavaai uma mata ia te Ia, e oo ia i latou na fasiotia o Ia. O ituaiga uma o le lalolagi o le a fetagisi faanoanoa ona o Ia. Ioe, Amene. ⁸ "O A'u o le Alefa ma le Omeka" ua fetalai mai ai le Alii le Atua, "o Ia o Nei, o Ia o Ananafi, o Ia o a Taeao, o le ona le malosi uma lava ⁹ O a'u o Ioane, o lou uso o lo o faasoa atu ia te oe mai i puapuaga, faapea le malo, ma le onosai tele o lo o ia Iesu - sa i le motu e ta'ua o Patamo, ona o le Upu a le Atua, ma le tautinoga e uiga ia Iesu. ¹⁰ Sa 'ou i le Agaga i le aso o le Alii. Na 'ou faalogo atu i o'u tua i se leo ua leotele mai e pei o se pu. ¹¹ Ua faapea mai, "Tusi mea o lo o e vaai atu ai i se tusi", ma tuuina atu i ekalesia e fitu - o Efeso, o Semurana, o Perekamo, o Tuatira, o Sarataisa, o Filatelefaia ma Laotikaia" ¹² Sa ou faliu e vaai po o ai le leo lea e tautala mai ia te a'u, ae 'ou liliu atu, ma 'ou vaai i tuugamoli e fitu ¹³ I le ogatototonu o tuugamoli, o lo o i ai se tasi e peisea'i o le atalii o le tagata, o lo o ia ofuina se ofu i fafo e totoso i lalo e tau i ona tapuvae, faapea le fusi auro o lo o fusi faataamilo i lona fatafata. ¹⁴ O lona ulu ma lona lauulu ua pa'epa'e sesega pei o fulufulu mamoe - ua pa'epa'e e pei o le kiona - o ona mata ua pei o le mumu saesae o le afi. ¹⁵ O ona vae ua pei o ni apa ua iila mai, e pei o le apa ua toe faamuina i le afi ina ia lelei, o lona leo ua pei o le taalili mai o vai e tele ua tatafe mai. ¹⁶ Ua i lona lima taumatau fetu e fitu, ma le pelu e tau fai ma'ai ona itu uma e lua ua sau mai i fafo o lona gutu. O ona foliga ua matua susulu malosi mai e pei o le la ¹⁷ Ina ua 'ou vaai ia te Ia, na 'ou faapa'u i ona vae e pei o se tagata ua oti. Ona ia tuu mai lea o lona lima taumatau i o'u luga ma ia faapea mai "Aua e te fefe. O A'u o le muamua ma le mulimuli ¹⁸ ma le o lo o ola. Sa 'ou oti, ae va'ai fo'i, ua 'ou ola e favavau faavavau lava! Ma o lo o ia te a'u ki o le oti ma Seoli. ¹⁹ O lea ia e tusi i lalo mea ua e vaai atu i ai, o mea o tutupu nei, faapea ma mea o le a tutupu pe a mae'a ona tutupu o nei mea. ²⁰ Ae mo le uiga lilo o fetu e fitu na e vaai i ai i lo'u lima taumatau, ma le fitu tuugamoli auro: O fetu e fitu o agelu a ekalesia e fitu, a o tuugamoli e fitu o ekalesia ia e fitu.