¹ Ua fetalai atu fo'i o ia i ona so'o,"Sa i le tasi tagata mauoa se auauna e pulea ana mea, ua molia o ia ia te ia ona ua ia fa'amaumau i ana mea. ² Ua na valaau atu ia te ia ma ua fa'apea atu i ai, " O le a lenei mea ua ou fa'alogo i ai ia te oe? Tala mai ia le tala i mea na e pule ai, auā ou te lē mafai ona toe fai oe ma auauna e pule. ³ Ona fai ifo lea o le auauna i lona loto, " O le a nei la'u mea o le a fai? auā o le a fa'ateaina a'u e lou ali'i mai la'u galuega fa'a pule, ou te lē mafai ona eli, ou te ma foi ou te aisi (fa'atoga). ⁴ Ua ou iloa le mea ou te faia, pe a fa'atea a'u ma la'u galuega fa'a pule, ina ia talia a'u e tagata i o latou aiga. ⁵ Ona amiami lea e ia o tagata taitasi uma e na i ai mea a lona alii, ua ia fesili atu fo'i i lē na muamua ane, " Pe fia mea a lo'u alii ua ia te oe? ⁶ Ona fai mai ai lea o ia, O paita o suāu'u e selau. Ua fai atu ia ia te ia, "Ina tago ia i lau tusi, ia vave nofo i lalo, ma tusi e lima sefulu". ⁷ Ona fai atu lea o ia i le tasi, Pe fia mea ua ia te oe? Ua fai mai o ia, "O kori o saito e selau. Ona fai atu lea o ia ia te ia, "Inā tago ia i lau tusi, ma tusi e valu sefulu. ⁸ Ona vivii atu lea o le alii i le auauna amioletonu ona o ana togafiti poto. Auā e sili le poto o tagata o le lalolagi (olaga) nei i o latou tupulaga na i lo tagata o le malamalama. ⁹ Ou te fai atu ia te outou, ia outou fa'aaoga oa (mamone) o le amiolētonu e fai ai uo ma outou, auā pe a mavae atu ia mea, pe latou te talia mai ai outou i fale e fa'avavau. ¹⁰ O lē fa'amaoni i le mea itiiti, e fa'amaoni foi o ia i mea e tele, a'o lē amiolētonu i le mea ititi e amiolētonu fo'i o ia i mea e tele. ¹¹ Afai fo'i e tou te lei fa'amaoni i le oa (mamone) o le amioletonu, o ai se na te tuu atu ia te outou le oa moni e tausi? ¹² Afai foi ua outou le fa'amaoni i mea a le tagata ese, o ai se na te tuu atu ia te outou a outou lava mea? ¹³ E le mafai se auauna ona auauna i alii e toalua, auā e inoino o ia i le tasi a e alofa i le tasi, a le o lea, e fa'apipii atu o ia i le tasi ae fa'aleaoga i le tasi. Tou te le mafaia ona auauna i le Atua atoa ma le oa (mamone). ¹⁴ Ua fa'alogo le au faresaio i nei mea uma, o le au matape'ape'a i tupe, ona latou tauemu ai lea ia te ia. ¹⁵ Ona fetalai atu lea o ia ia te i latou, " O outou ua fa'afiaamiotonu outou i luma o tagata, a ua silafia e le Atua o outou loto, auā o le mea e sili ona lelei i tagata, e inosia lea i luma o le Atua. ¹⁶ O le tulafono ma le au perofeta na iai lava lea seia o'o ina sau Ioane. Talu mai lava ia ona po, ua folafolaina le tala lelei o le malo o le Atua, ua taufaoa foi e tagata uma. ¹⁷ E mavae gofie atu le lagi ma le lalolagi ae le iuvale sina fasi mataitusi e tasi o le tulafono. ¹⁸ O sē e fa'atea i lana ava ma fai avā atu i se tasi, o le mulilua lea; ma sē e fai avā i le ua fa'ate'aina lana tane, ole mulilua foi lea. ¹⁹ O le tasi tagata mauoa, ua ofu i le ofu paūli, ma le ie vavae, ua fa'afiafiaina lava o ia i le tele o lona tamaoaiga (taileleiia) i aso uma. ²⁰ O le tasi tagata mativa foi e igoa ia Lasalo, ua ta'atia i lona faitotoa ua lilo i le papala, ²¹ ua manao tele ia e a'i i momoi mea e pauu ifo i le laoa'i a le mauoa, a ua omai ulī ua etoeto i ona papala. ²² Ua o'o foi ina oti le tagata mativa, ona avea lea o ia e agelu i le fatafata o Aperaamo. Ua oti foi le mauoa ma ua tanu, ²³ ua i seoli, ua fa'ataugāina, ona tepa ae ai lea o ia, ua na iloa mamao atu Aperaamo ma Lasalo i lona fatafata. ²⁴ Ua alaga atu fo'i o ia, ua fai atu, "Lo'u tamā e, Aperaamo, ia e alofa mai ia te au, ma ia e auina mai Lasalo na te fufui i le tumutumu o lona tamatama'ilima i se vai, e faamalulū ai lo'u nei laulaufaiva; auā ua ou puapuaga i le mumū o le afi nei. ²⁵ Ona fai ane lea o Aperaamo, "Lo'u atali'i e, manatua fo'i na e maua mea lelei i taimi o lou olaga, na maua fo'i e Lasalo o mea leaga. A'o lenei ua fa'aolioliina ia iinei, a ua puapuagāina oe. ²⁶ E le gata i nei mea uma, a ua tu'uina se vanu tele i lo tatou va, o le mea lea e le mafai ai e i latou o e ua iinei ua fia o atu ia te outou ona sao atu, e le mafai foi ona sao mai o e ua iina ia te i matou nei. ²⁷ Ona fai atu lea o ia, "Lou tama e, ou te aioi (fa'atoga) atu ia te oe, ina ia e auina atu o ia i le aiga o lou tamā, ²⁸ auā e toalima o'u uso; ina ia lapata'i (molitino) ia te i latou, ina ia aua nei omai foi i latou i lenei nofoaga o le puapuaga. ²⁹ Ua fai ane Aperaamo ia te ia, "O ia te i latou Mose ma le au perofeta, ia latou fa'alogo i ai. ³⁰ A ua tali atu le mauoa, " Leai, Lou tamā e Aperaamo, auā afai e alu atu se tasi na i e ua oti ia te i latou, ona salamo ai lea. ³¹ A ua fai atu Aperaamo ia te ia, "Afai e lē fa'alogo i latou ia Mose ma le au perofeta, e ui lava ina tu mai se tasi nai e ua oti, e lē mafafai lava ona gaua'i mai i latou.