¹ Ua o'o i le aso tolu, ona faia ai lea o le tausama'aga o se faaipoipoga i Kana i Kalilaia, sa iai foi le tinā o Iesu. ² Na valaaulia/tala'iina foi Iesu ma ona soo i le tausama'aga. ³ Ua uma le uaina, ona fai atu lea o le tinā o Iesu ia te ia, "Ua leai sa tatou uaina." ⁴ Ua fetalai mai Iesu ia te ia, Fafine e, o le a la'u mea e fai i ai? e le'i o'o i lo'u taimi. ⁵ Ua fai ane lona tinā i auauna, "O le a lava le mea e fai mai ai o ia ia te outou, ia outou faia." ⁶ Sa iai vai maa tetele e ono mo sauniga o le faamamāina a Iutaia, pe ta'iluasefulu i le ta'itolusefulu kalone. ⁷ Ua fetalai atu Iesu ia te i latou, "Inā faatutumu ia vai maa i suavai, ona latou faatutumuina lea ua matuā tutumu lava. ⁸ Ua ia toe fetalai atu foi i auauna, "Ia asu ane ia le vai, ma avatu i le pule o le tausama'aga." Ua faapea foi ona latou faia. ⁹ Ua tofo foi le pule o le tausama'aga i le vai ua liu uaina, a ua leiloa e ia le mea na aumai ai (a'o auauna na asu le vai ua latou iloa), 'ona valaau atu lea o ia i le faatoafaiavā, ¹⁰ ua fai atu ia te ia, "E muamua ona aumai e tagata uma le uaina lelei; ona aumai lea o le uaina leaga pe a onanā tagata. A ua tuua e oe le uaina lelei ua o'o mai i lenei itu aso. ¹¹ Na faia e Iesu lenei ulua'i faailoga i Kana i Kalilaia, ma faaalia mai ai lona mamalu, ona talitonu ai lea o lona au so'o ia te ia. ¹² Mulimuli ane, ona maliu ane lea o Iesu i Kapanaumi, o ia ma lona tinā, o ona uso ma ona soo, ma nonofo ai mo ni nai aso. ¹³ Ua lata mai foi le Paseka a Iutaia, ona maliu a'e lea o Iesu i Ierusalema. ¹⁴ Ua ia silafia i le malumalu o e faatau povi, o mamoe ma lupe, ma e faatau tupe. ¹⁵ Ua ia faia le sasa i maea tua iti ona ia sasa ai lea i fafo o i latou uma lava mai le malumalu, e aofia ai ma mamoe ma povi. Ua ia faasalalau i tupe a e faatau tupe, ma fuli ia latou laulau. ¹⁶ Ua fetalai atu foi i e faatau lupe, "Ave ese atu ia nei mea ma inei, aua le faia le fale o lo'u Tamā ma fale faatau oa." ¹⁷ Ona manatua ai lea e le au soo le upu ua tusia, "E 'aina lava a'u ona o le naunau alofa i lou malumalu.". ¹⁸ Ona tali mai lea o alii sili o Iutaia ua faapea mai, " Se a se faailoga e te faaali mai ia te i matou, ina ua e faia nei mea?". ¹⁹ Ua tali atu Iesu, "Inā lepeti ia o lenei malumalu, ona ou toe faia lea i aso e tolu." ²⁰ Ua fai atu alii sili Iutaia, "E fasefulu ono tausaga na faia ai lenei malumalu, pe e te toe faia ea e oe i aso e tolu? ²¹ A o lona tino o le malumalu lea na ia fetalai i ai. ²² Ina ua toe tu mai o ia mai le oti, ona manatua ai lea e ona so'o na fetalai mai e ia lenei upu, ona latou talitonu lea i le tusi ma fetalaiga a Iesu na fetalai mai ai. ²³ Sa i Ierusalema o ia i le tausamiga o le Paseka, e toatele foi ua talitonu i lona suafa ina ua latou vaai atu i faailoga na ia faia. ²⁴ A o Iesu, e le i faalagolago o ia ia te i latou, auā ua silafia e ia tagata uma lava. ²⁵ E le aogā foi ona molimau se tasi ia te ia i amio a tagata, auā ua silafia e ia loto o tagata uma lava.