¹ Auā ou te manao ina ia iloa e outou o lo'u finau matuā tele o outou ma i latou o i Lautokaia atoa ma i latou e ua le iloa mai a'u i le tino. ² Ou te galue ina ia faamafanafanaina o latou loto, o faasooina i le alofa, ina ia maua ai le oloa uma o le mautinoa i le loto matala, ina ia iloa lelei le mea lilo a le Atua, o Keriso lea. ³ Ua ia te ia le oloa uma o le poto atoa ma le malamalama ua lilo ai. ⁴ O le upu lea ou te fai atu ai, ina nei faaseseina outou e se tasi i upu faaoleole. ⁵ E ui ina ou le i ai ma outou i le tino, a e peitai ou te iai ia te outou i le agaga. Ua ou fiafia ma ou vaai atu i lo outou nofo lelei, ma le mausali o lo outou faatuatua ia Keriso. ⁶ E faapei ona outou talia o le Alii o Keriso Iesu, ia outou savavali ai ia te ia. ⁷ Ia outou mauaa ia te ia, ma ia atiina ae ia te ia, ma ia faatumauina i le faatuatua, faapei ona a'oa'oina o outou, ia faatele ma le faafetai. ⁸ Ia outou nei faapologaina outou e se tasi i filosofia ma le poto le aoga e faasese ai, e tusa ma tu ma aga a tagata/le uputuu a tagata, e tusa ma aitu o le lagi ma le lalolagi, a e le tusa ma Keriso. ⁹ Aua o loo mau i totonu ia te ia le tumu uma lava o le uiga Atua ua i lona tino. ¹⁰ Ua faaatoatoaina foi e ia outou, o le ulu ia o alii sili uma lava atoa ma faipule. ¹¹ Ua faaperitomeina foi outou ia te ia i le peritomega e lei faia e lima, i le toeseina o le tino faaletino i le peritomega mai ia Keriso. ¹² Na tanumia faatasi outou ma ia i le papatisoga, o lea foi ua outou toe tutū mai ai faatasi ma ia i le faatuatua i le mana o le Atua, o le na faatu mai ia te ia i e ua oti. ¹³ O outou foi sa oti i amio leaga ma le le peritomeina o outou tino, na ia faaola mai faatasi ma ia, ina ua faamagaloina mai a tatou amio leaga uma lava. ¹⁴ Na ia soloia le tusi o la tatou aitalafu na tatou nofosala ai i tulafono sa tetee mai ai ia te i tatou. Na ia aveeseina mai ma faamauina ai i fao i le satauro. ¹⁵ Ua tuueseina e ia o alii sili ma faipule, ona faaalia mai lea o i latou ia iloa uma e tagata lautele, ua manumalo o ia ia te i latou i lea lava mea. ¹⁶ O lenei, aua nei faamasino atu e se tasi ia te outou i mea e aai ai, poo o mea e inu ai, poo mea i tausamiga, poo masina faatoa vaaia, poo aso o le Sapati. ¹⁷ O le faaata/ata lea o mea o le aoo mai a o le tino, e a Keriso lava lea. ¹⁸ Aua nei ta'ufaaleaogaina outou e se tasi, ona ua faamamafaina e ia le faalalolalo ma le ifo atu i agelu, o loo faalagolago i mea ua ia vaaia, o loo faafefeteina lona lava mafaufau faaletino. ¹⁹ Ua ia le taofi mau foi i le ulu. E tausia ma faamalosia le tino uma e le ulu, i mea e soo ai atoa ma ua, o loo tupu ai, ina ua faatupuina mai e le Atua. ²⁰ O lenei afai ua outou oti faatasi ma Keriso i aitu o le lagi ma le lalolagi, se a le mea tou te savavali peiseai ua nonofo pea outou i le lalolagi: ²¹ "Aua nei pa'i atu i ai, Aua ne'i tofo, Aua nei tago" ²² O mea uma ia e uma ai pe a tagofia, e tusa ma poloaiga ma mea e a'oa'o atu e tagata. ²³ O mea ia e ta'ua ai le poto, ona o le faafiaamioatua, ma le faamaulalo, ma le faasaunoa o le tino, a e le aoga ia mea e taofiofi ai tuinanau o le tino.