¹ O a'u o Paulo, o le aposetolo a Iesu Keriso, i le finagalo o le Atua, ma Timoteo, o le uso lea, ² i tagata paia o le Atua ma le au uso faamaoni ia Keriso o loo i Kolose. ³ Ia ia te outou le alofa tunoa ma le manuia mai le Atua lo tatou Tamā atoa ma le Alii o Iesu Keriso, matou te tatalo pea mo outou. ⁴ Na matou faalogo i lo outou faatuatua ia Keriso Iesu ma lo outou alofa i le au paia uma lava, ⁵ ona o le faamoemoe ua teu mo outou i le lagi, na outou faalogo ai i le upu o le mea moni ua i le tala lelei ⁶ ua oo atu ia te outou. E fa‘apea foi ona fua mai o lenei tala lelei, ma ua tupu foi i le lalolagi uma, e pei ‘ona faia foi ‘iā te outou talu mai le aso na outou faalogo ai ma malamalama i le alofa tunoa o le Atua i le upu moni. ⁷ O le tala lelei lenei na outou aoaoina mai ia Epafara, lo tatou uso a auauna pele, o le auauna faamaoni a Keriso mo i tatou. ⁸ Na faailoa mai e Epafara lo outou alofa mai i le Agaga. ⁹ Ona o lenei alofa, ma te lei mapu ai lava i le tatalo mo outou ina ua mā maua le tala. Na ma tatalo ina ia outou iloa lelei o lona fingalo, i le poto uma ma le mafaufau faaleagaga, ¹⁰ ina ia outou savavali e tusa ma le Alii ina ia fiafia mai o ia ia te outou i mea uma; ma ia outou fua mai galuega lelei uma lava, ma ia tupu pea lo outou iloa lelei o le Atua ¹¹ ia faamalosia outou i le malosi uma lava, e tusa ma lona malosi uma lava, e tusa ma lona malosi ua silisili, e iu i le onosai uma lava ma le faatoatoa atoa ma le fiafia; ¹² o loo faafetai atu i le Tamā ua na saunia i tatou ia tatau ona tofusia i tatou i le tofi o le au paia o i le au paia o i le malamalama. ¹³ Na ia laveai mai ia te i tatou nai le pule a le pouliuli, a ua na aumaia i latou i le malo o lona lava Alo pele, ¹⁴ o ia ua tatou maua ai le togiola i lona toto, o le faamagaloina lea o agasala. ¹⁵ O ia foi ua tusa ma le Atua e le vaaia, o le ulumatua o mea uma lava ua faia. ¹⁶ Auā na faia e ia o mea uma lava, o mea i le lagi ma mea i le lalolagi, o mea o vaaia ma mea e le o vaaia, o nofoalii, ma alii, ma alii sili, ma faipule; na faia e ia mea uma lva, na fia foi mo ia. ¹⁷ O ia foi o le uluai o mea uma lava, o loo faatumauina foi mea uma lava ia te ia. ¹⁸ O le ulu foi o ia o le tino, o le ekalesia lea; o le amataga foi o ia, o le ulumatua o e ua oti, ina ia fai o ia ma faasilisili i mea uma lava. ¹⁹ Auā ua finagalo le Atua ia mau i totonu o le Atalii le tumu atoatoa, ²⁰ ina ia faaleleia e ia o mea uma lava ma ia, ina ia lelei ia te ia lava i le toto o lona satauro, o mea i le lalolagi atoa ma mea o i le lagi. ²¹ O outou foi sa tagata ese anamua, sa fai o ia mo outou fili i outou loto i le amio leaga. ²² Ao lenei ua lelei outou ma ia i lona tino tagata ina ua maliu, ina ia tuuina atu outou e ia, o le au paia, o e le mata'uleagaina, ua leai foi se mea e faasalaina ai iona lava luma. ²³ Pe afai tou te tutumau i le faatuatua o faavaeina ma mausali ma le le faateaeseina outou faalogologo i ai, sa tala'iina atu foi i tagata uma lava i le lalolagi; o a'u o Paulo ua fai a'u ma auauna i ai. ²⁴ Ou te olioli nei i mea ou te tiga ai ona o outou, ou te faaatoa foi i lo'u tino o mea ua totoe i puapuaga o Keriso ona o lona tino, o le ekalesia lea; ²⁵ Ua fai a'u ma auauna i ai, e tusa ma le sauniga a le Atua, ua tuuina mai ai ia te au mo outou, ina ia matuā folafolaina le afioga a le Atua. ²⁶ O le upu lilo lea sa natia talu mai i augatagata ma tupulaga ua mavae, a o ona po nei ua faaalia mai ai i ona tagata paia. ²⁷ Na finagalo foi le Atua ona faailoa atu i ai le uiga o le silisili o le lelei o lenei upu lilo o i nuu ese, o Keriso lea o loo ia te outou o le faamoemoe i le manuia. ²⁸ O ia lava matou te tala'iina atu, ma apoapiai atu i tagata uma, ma aoao atu ai i tagata uma i le poto uma lava, ina ia tuuina atu e i matou o tagata uma ua atoatoa ona lelei ia Keriso. ²⁹ O le mea lea ou te galue ai ma finafinau e tusa ma lana lava galuega, o loo galue lava i totonu ia te au ma le mana.