Henue' sen Simon Petrus ¹ Sen Simon Petrus, hamba ngen rasul Yesus Kristus, maha e'o de' oben ala pengelen de' keve' ngen mie un keteneng Allah ngen Juru Slamat ilu Yesus Kristus. ² Baliu e hempoang ngen penyaie' de' te'a nai mosa maha eham dalem kam tei tesen Allah ngen Yesus Tuhan ilu. Helonen de' du Nepai ngen du Milie' ho'en Allah ³ Kesezo e de' bezu zo nai maha ilu muong pehesiu ngen mu'dip ngen hetemek, sen penesen de' ezo nepai ilu tei fala hempuie' ngen fene'a e. ⁴ Sen ezo, zo o'ben ngempoang maha ilu veket-veket e de' bezu ngen un meli bi'i ngen veket-veket de' kam mencam ala tolet dalem kesezo e, ngen pesau te je' ja'et de' nozen tusun tane' ji, o'ben ho'en ha'du na'en hemet de' ja'et. ⁵ Ho'en mehe, nengait ne len-len le afen tei nafit pengelen cue' ngen ozen fene'a, fene'a ngen penesen, ⁶ ngen penesen ngen ngen naeng hemet, naeng hemet ngen fero'ai, fero'ai ngen temek, ⁷ fenenek ngen pengelesau ngenn cenganak, pengelesau cenganak ngen ta'un peneneng ilu tengen. ⁸ Bue de' i muong un dalem udip kue ngen tai nafit-nafit eham, o ta'un tei fevareng ngen ngempeva dalem penesen te Tuhan ilu Yesus Kristus. ⁹ Jo un ne helonen de' ta'un un muong de' mehe, helonen mehe ta'un mencam na'et ngen leto, ngen bote' ho'en do heluvie' bue lepe tene ru muie' ezo sen penyale'-penyale' do o'ben felafo. ¹⁰ Ba'en ne mehe, cenganak-cenganak, nengait ne ngen len-len le ngetesen bue kam len-len du nepai ngen du milie'; bue kam peza'gen e ta'un cam tei labue'. ¹¹ Ho'en mehe, famen tei he dalem laja' cengka'jen Tuhan ngen Juru Slamat ilu, Yesus Kristus, kevesiek bezu maha eham. ¹² Ji'i fu'un ne ha'dep kie' nyelaven feteven eham te muonge, jo ve kam o'bentesen tene ngen o'ben du betie' ngen ta'eng de' nihi kam hanen. ¹³ Ceng ka'jen kie' mu'dip dalem lepau tusun tane' ji, ahie' homo e te'a bue kie' mecok eham ngen feteve cam, ¹⁴ jo kie' tesen bue kie' hetei ta'un te lepau zi kue ba'en de' du lepek nu'jue mahie' ngen teto ho'en Tuhan ilu Yesus Kristus. ¹⁵ Ngen ahie' he nengait naen de' un belen tengait cie afen cam nyelaven neven muong e o'o lepek ketei kie'. Jeto Fene'a Kristus ¹⁶ Ba'en ne amie' ta'un baze' hetene-hetene de' nihi ngen mencam mie' ba'da maha eham kesezo ngen kenai Tuhan ilu, Yesus Kristus. ¹⁷ O'ben ne tasa Yesus ala hormat ngen kemuliaan sen Allah Bapa, kue ba'en tasa zo ba'da maha zo ho'en je' atek Mahamulia, "Ji'i e Anak kie' de' kie' lesau, maha Ezo le kie' hetai e," ¹⁸ amie' co ngene'en dau eze nai sen surga tasa mie' femuong ngen Ezo tusun mu'dong buie'. ¹⁹ Amie' co tei ngelen belen dau isiu du ba'da behe'ai re, je' atek te'a eham nyemate' ngen len le, kue ba'en nyemate' co feleta' du nyenta'da te duhue' de' mentem, abie' henempam ngen beto'en nyenta'da nai mona dalem hemet kam. ²⁰ Jo mihi e de' adienge kam ke ngetesen ji'i e bue ta'un un isiu neva'da dalem Kitab buie' de' o'ben nai sen penesen co helonen, ²¹ o'ben ne ta'un un fe neva'da de' nai sen pengobe' helonen; teleso e, e'o helonen-helonen pahalai tusun nga'den Allah ngenaven ngen nengkin ho'en Roh Kudus.