¹ О Павел, затворники за Христа Исуса, тай о прал Тимотей, жи амаре любезноне съработникиесте о Филимон ² тай жи ки пен и Апфия, тай жи амаре сподвижникиесте о Архип, тай жи тере домашноне кангеряте: ³ Благодат тай мири туменге таро Дел, амаро Отеци, тай о Дел о Исус Христос. ⁴ Винаги благодаринав мере Девлеске, като споменинав тут ан ме молитвенде, ⁵ като шунав за тери любов тай за е вяраке, която иси тут карик о Дел о Исус, тай която покажинес карик саворе светиенде. ⁶ Тай молинав ман о споделиба тере вяракоро те анел плодове, като пенджарен секо лачипе, ковато си анде туте андо Христа. ⁷ Соскето изпитвингиом бари лошали тай утеха ашал тери любов, понеже ободриненас пес о сърца е светиенгере чрез туте, прала. ⁸ Далкеске, макар те овел ман право баре дръзновениеса андо Христа те заповединав туке давка, ковато подобинел, ⁹ пак ашал и любов предпочитинав те молинав тут. Тай чука, ме, ковато синиом о Павел, пуро, а акана затворники за Христа Исуса, ¹⁰ молинав тут мере чадоске о Онисим, колес биянгиом анде ме оковенде, ¹¹ ковато уло декана безполезно за туке, а акана полезно тукеда, мангеда; ¹² колес бичалав туке напапале лично, демек мо самото сърцес. ¹³ Ме ка мангавас те задържинав лес паш манде, те служинел манге вместо туте, като синиом андо оковес е благовестиеске; ¹⁴ но без те жанав торо мнение, на мангав те керав нищо, за тена овел торо лачипе по принуждение, а доброволно. ¹⁵ Соскето може би далкеске ов отлъчисало тутар за хари време, за те приеминес лес завинаги, ¹⁶ ма вече сар слугас, но по бут слугастар-сар прал, особено скъпо манге, а още по бут туке, тай сар мануш, тай андо Дел! ¹⁷ Тай чука, ако считинес ман съдружникиеске, приемине лес сар манде. ¹⁸ Тай ако варесосте онеправдингяс тут, или дължинел туке варесо, нак давка мере сметкате. ¹⁹ Ме, о Павел, пишинав давка ме вастеса: Ме ка платинав! За тена пенав туке, кай ту дължинес манге тай коркоро тут. ²⁰ Ва, прала, нека овел ман дайка печалба тутар андо Дел; ободрингян мо сърцес андо Христа. ²¹ Увериме анде тери послушност, ме пишинав туке, тай жанав, кай ка керес тай по бут, отколкото пенав туке. ²² Между другото, приготвине манге стая, понеже надявинав ман, кай ка овав туменге подариме чрез тумаре молитвенде. ²³ Поздравинен тут о Епафрас, ковато си панло манца ашал о Христа Исуса, ²⁴ съшо мере съработникия: о Марк, о Аристарх, о Димас тай о Лука. ²⁵ И благодат амаре Девлескири о Исус Христос те овел е саворенгере духоса. Амин.