¹ О Дел, Ковато бут дрома тай по бут начиня хоратингяс андо пурано времес амаре даденге чрез о пророкия, ² андо крайос калке диесенгоро хоратинел аменге чрез о Чаво, Колес поставингяс наследники всичконаске, чрез Колесте кергяс о световя; ³ Ковато, като си сияние Лескере славаке тай отпечатъки Лескере съществоске тай като икерел всичко чрез Пере погъщоне словосте, след като извършингяс (чрез Песте) очистване е безехенге, бешло отдясно ко Величие андо висини, ⁴ тай ачило дики по-упруно таро ангела, кити о алав, ковато наследингяс, си по-упруно ленгерендар. ⁵ Соскето каске таро ангела пенгяс о Дел декана: " Ту синян Моро Чаво, Ме авдиес биянгиом Тут." Тай пак: " Ме ка овав Леске Отеци, тай Ов ка овел Манге Чаво"? ⁶ А като па въвединел е Първороднонес анди вселена, пенел: "Тай поклонинен тумен Леске, саворе Божия ангела". ⁷ Тай за е ангеленге пенел: "Ковато керел Пе ангелен силна сар балвала тай Пе служителен сар ягакоро пламъки"; ⁸ а за е Чавеске пенел: "Торо престоли, о, Боже, си жи ко вечна вековя; тай о скиптъри Тере тагарипнаскоро си скиптъри правотакоро. ⁹ Възлюбингян правда тай намразингян беззакониен; далкеске, Боже, Торо Дел помажингяс Тут мироса лошалакоро по бут Тере съпраленде". ¹⁰ Тай пак: " Андо началос Ту, Господи, основингян и пув, тай делос Тере вастенгоро си о небес; ¹¹ он ка изчезнинен, а Ту пребъдвинес; ва, он саворе ка овехнинен сар пурано шехи, ¹² тай сар наметалос ка свиинес лен, тай он ка овен измениме; но Ту синян о Също, тай Тере бреша нанай те свършингион". ¹³ А каске таро ангела пенгяс декана: "Беш отдясно Манге, жи кай положинав Те враговиен за Тере подножиеске"? ¹⁴ Нанай ли он саворе служебна духовя, бичалде те слугувинен колкенге, колато ка наслединен спасение?