¹ О Симон Петър, слугас тай апостоли Исус Христово, туменге, колато чрез и правда амаре Девлескири тай Спасители о Исус Христос получингиен еднакво аменца скъпоценно вяра: ² Благодат тай мири те умножингион туменге чрез о познаване е Девлеске тай е Исусеске, амаро Дел. ³ Понеже Лескири божествено сила подарингяс амен всичко, ковато си потребно е животоске тай за е благочестиеске, чрез о познаване Калкеске, Ковато призвингяс амен чрез Пере славате тай силате; ⁴ чрез коленде подаринде пес аменге о скъпоценна тай твърде баре обещания, за те ачон чрез ленде участникия андо божествено естество, като избегнингиен о произлязло тари страст разтление андо светос; ⁵ ов по далке причинате положинен секакво старание тай прибавинен тумаре вяраке добродетели, е добродетелаке благоразумие, ⁶ тумаре благоразумиеске себеобуздание, те себеобузданиеске зоралипе, те зоралипнаске благочестие, ⁷ те благочестиеске братолюбие тай те братолюбиеске любов. ⁸ Соскето, ако калка добродетеля араклон туменде тай изобилствинен, он нанай те мукен тумен безделна, нито безплодна относно о познаване амаре Девлеске о Исус Христос. ⁹ Но ковка, колесте он нана араклон, си коро, късогледо тай бистергяс, кай уло очистиме пе пуране безехендар. ¹⁰ Далкеске, пралален, постараинен тумен още по бут те затвърдинен тумаро призвание тай избириба; соскето, като изявинен далка добродетеля, нисар нанай те спънинен тумен. ¹¹ Понеже чука ка дел пес туменге щедро достъпи жи ко вечно тагарипе амаре Девлеске тай Спасители о Исус Христос. ¹² Далкеске всякога ка овав готово те дав тумен годи далке букиенге, те жаненда лен тай те овенда утвърдиме анди истина, която акана икерен. ¹³ Тай мислинав, кай си право, жи кай синиом анде калке телесноне хижате*, те подбудинав тумен чрез напомняне; ¹⁴ понеже жанав, кай сиго ка напуснинав ми хижа, сарто известингяс манге амаро Дел о Исус Христос. ¹⁵ Даже ка стараинав ман туме палал ме мерибнасте те ащи всякога те помнинен калка букя. ¹⁶ Соскето, като обявингям туменге и сила тай о пришествие амаре Девлескоро о Исус Христос, аме нана следвинасас пирнесте измислиме баснес, а улам очевидция Лескере величиеске. ¹⁷ Соскето Ов приемингяс таро Дел о Отца почест тай слава, като тари великолепно слава ало жи Лесте савка гласос: Кавка си Моро възлюбиме Чаво, анде Колесте си Моро благоволение. ¹⁸ Кавка гласос шунгям коркоре аме, кай ало таро небес, като улам Леса ки свято планина. ¹⁹ Тай чука, о пророческо словос по бут потвърдинел пес аменге; тай туме лачес керен, кай внимавинен лесте, сар светилоске, ковато светинел андо тъмно тан, жи кай зазорингиол тай и зорница изгреинел анде тумаре сърценде. ²⁰ Тай давка те жанен англал всичконасте, кай нисаво пророчество андо Писание нанай собствено е пророкиеске обяснение е Девлескере воляке; ²¹ соскето нисар нана ало пророчество манушескере волятар, но (о свята) мануша хоратиненас таро Дел; движиме таро Свято Духос.