¹ Ku wuso pukwaru ku kwita zi mwaka zuli kumi indi mwaka inee ndaru kwenda ko Jerusalema ni Banabasi, taku yisa Tite natswe. ² Ndakwenda shuku qewa indi kubika pu wuso wawowu rumiwa wondata hweta pakati lya wulyuvu. Ndaku hweta kurupati kubaru ku mwanahara atikya bakuru indi bayendisi, atikya kube atikya zindarasi zi siye kuba zeziku ituso. ³ Kono mani Tite, ikarana name mi ikali mu Gerike, mata kakatizwa ku tsuruwa. ⁴ Tatarasi akyopa shaba kwetu ibataya shuku liyiba atikya iba yise ituku ruho etu ku Jeso Keresite. Baru ku shaka kuti panga ba vuya, ⁵ kono amati shere kuwo muka kanda, atikya injahamu yilyiyi ikare natswe. ⁶ Kono baru ku mwanahara wu kuru (zubaru kwisi kazaru kundi bbiraeza, Urezya ama kwisi zahali ndizo) -zopa, Ndatikya, yamati mwanahara wukuru ku njemwa shamati yekyeza kume. ⁷ Meni, baku wana atikya ndati shaka ku hweta lyiyi kubapa bahata njena mu mupato, tandi Pitrosi karu ku shaka ahuru ku hweta lyiyi ku bayeyi bata njena mu mupato. ⁸ Ku Rezya, yamata rasi kuba apositora kubapa ikali batsura, mati sebeza kume mu Hedeni. ⁹ Pu Jakowo, Kefasi, indi Johani, babagi ziqha, bata lyemuha zixuma kawo zata pewa kuwo, batili pata ku manja ikhamu kwiqe wumbiya yeme indi Banabasi. Bata tishizana kwenda ku wulyuvu mi bayendye kuwu mupato. ¹⁰ Bata ringira atikya tiyana kane babahungwe, ichuto chwekye ngaho shindata zirwa kwisi. ¹¹ Kono pu Kefasi karu kuya ku Antioke, aku mukaka nisa pu wuso wa bayeyi shuku tikya karu tikya maraxe kawo. ¹² Pu wuso wu murwa yuyumwe ikaru kadzwa ku Jakowo, Kefasi karu ku lya niba Hedeni. Kono pu bayeyi babamwe baru kuya, aku siya kulya mi akuzwa kuwo. Karu kuywapa bapa baru shaka mupato. ¹³ Indi ma Juda babmwa bata lishanga nisa ni batili mwana (balipa). Nanga i Banabasi bata mutwara ku ku zimina shuku lipa kwawo. ¹⁴ Kono pundaru ku mwana atikya shubatisi amazaku chera wuru miwa winjahamu, Nda kutikya ku Kayafa pu maso awo kowo, ''Ati umu Juda kono mati para tandi wulyuvu mi katandi mu Juda, ingahare utyeri ku kakatiza atikya wu lyuvu bapare tandi ma Juda?'' ¹⁵ Yatswe tima Juda shuku pakuwa mi ka bayeza libi wu lyuvu; ¹⁶ Ehee tiyi zire atikya ku njemwa muyeyi yushu yakuwa shi misebezi umurawo kono shu tumero ku Jeso Keresite. Inditswe taya shi tumero ku Jeso Keresite atikya shati yakuwe shi tumero ku Keresite mi kashi misebezi u mirawo. Kuku mu mbiri ushawu yakuwa shu misebezi umurawo. ¹⁷ Kono ati, putishi shaka ku chenu suwa sha Keresite, inditswe tati shanganeha kuba bayeza libi, cware Keresite mata babaza shibe? Yemwa! ¹⁸ Cware ndakwi qhini nangweza zindata wumbara, ndatiqe atikya ndati vungara murawo. ¹⁹ Shu murawo ndatifwa ku murawo, ati ndipare Urezya. ²⁰ Ndata bambuwa ni Keresite. Kali kame ndati para, kono Keresite mati para kumye. Wuparo wundati para mwi nyama ndati para shi tumero ku Mwana Urezya, yamatandi suna mi indi kulipa kumye. ²¹ Amanda ku bishira kuru pati rusuno ru Rezya, ati ku tikya ku chenusuwa kuti shanga nuwa shu murawo, cware Keresite matafwa mahara!