¹ Essariya en'nokhuwela. Otjuwelatja on'novussa ntjunaa. ² Mapuro onkumanatja mittala otjuwelatja phunkumatjaaya. ³ Waattaman'na mikhora tjonpooma, n'makhumenloni womikhora, en'nokhuwela. ⁴ Atthu, phinhu kinookhuwelani; ntjuunaka naassaana aatthu. ⁵ Nhu nri oohitjuwanyaa, nkhalane otjuwelatja; ninhu n'nokhala, oohiitthu mwintjenre otjuwelatjawinhu. ⁶ Mwiiwenle, kontha kin'hala wuuluma tjooreera, ni kin'hala wuuluma tjoophwanela, ⁷ kontha malakwaaka anuuluma ninkhuluvelo nimalakwaaka onkassiri yootakhala. ⁸ Moolumwaaka ooteene phooreera, khiivo enuulumaaka yowootha. ⁹ Moolumwaaka ooteene phowookwa wayoole niiwa; moolumwaaka phowookwa wayaale anpheela otjuwelatja. ¹⁰ Kihothanla ofunttihawaka okhala ntjulu woparatha ni otjuwelatja ovikana ewooru. ¹¹ Kontha otjuwelatja phiyuulupale ovirikana tjowaarya; khuuvo n'hakhu onlikanihiyaaya. ¹² Mi, kinkhala nintthu owiivahenra, ni kinan'vaha otjuwelatja nookhala ratta. ¹³ Owoova Apwiya ohivara yootakhala; okikassiri nttima wiittottopa niwiikhalihera, nttala wootakhala, khatjinkitjivela. ¹⁴ Kihaana nlakihero nootjuwelatja wokhweeli; kihaana wuupuwela niikuru yawaka. ¹⁵ Mwaha wawaka, mamwene an'nohoolela, ni akhulupale ahaana ekettelotjaya niphitjooreera. ¹⁶ Mwaha wawaka, ahooleli an'nohoolela ni anaaattharenla an'neettihera niissariya. ¹⁷ Kinaafenta ankifenta, ni anaakiphwanha ankipheelatja. ¹⁸ Kihaana mihakhu, nttittimiho niissariya. ¹⁹ N'hokorokhwaaka muulupale ovikana ewooru, enkhalanaaka yuulupale tjinene ovikana eparatha. ²⁰ Kineetta nttala wooreera, n'neettiheriya niisariya, ²¹ wowiira kaavahe yoohiyeriya ankitthara ni akhalane mihakhu tjintji. ²² Apwiya ahokunpa woopatjeroni; ahinavara mitekotjaya tjokhalayi. ²³ Khalayi khalayi, kinunpiye, okhuma nankhuma, woopatjeroni wotthaya. ²⁴ Tjihinaaya okhala tjitthu tjikhwaawe, keera kinunpiye, tjihinaaya okhala mwaamuro tjomaatji. ²⁵ Myaako tjihinaaya okhala, nimapuro makhwaawe, keera kinayariye. ²⁶ Kiyariye Apwiya ahinunpa etthaya niitakhwa, wala ntthupi nontuniyani. ²⁷ Kaahaavo ehinunpiya erimu, erimu yaanawunpiyaru kinarivo. ²⁸ Kaahaavo wunpaaya mahutte ni wunpaaya mwaamuro. ²⁹ Kaahaavo owakathi waakawanihaaya epahari, wowiira maatjaayo ahivikane mapuro yaatthunihalyaaya, ni owakathi waakawanihaaya etthaya. ³⁰ Kaari naayena, phanka funti; kaari ntthu owaatteeliha, kihakalalaka ohoolowaya. ³¹ Kanaahakalala etuniyaaya yooteene, ni nkhaviherwaaka waari mwaassaana aatthu. ³² Vano, assaanaaka, nkiviriyane, kontha yaale aneettela mittalatjaka anaahala okhala ooreeriya. ³³ Mwiiwe en'himyaaka ni nkhale ootjuwelatja; n'hihanhurihe. ³⁴ Yoole nkiviriyana naahala oreerihiya, awehawehaka wakhula nihuku mikhoratjaka, niwanriihaka nkhayi atthu owaatta mikhoratjihu. ³⁵ Kontha npheela okiphwanha, naaphwanha ekumi, ni naaphwanha n'nema naApwiya. ³⁶ Massi yoole n'hala ohanhuriha naahala ohaleela ekumyaawe; ooteene yaale ahinkipheela anonfenta nookhwe.