¹ Miruku tja Salomao, mwaana Davi, mwene owiisrael. ² Mirukun'nha tjiri tjoopheela waassomiha tjootjuwelatja ni tjoweettela, woopheela ossomiha moolumo ootjuwelatja, ³ woopheela waakhenla tjoovanhiihiya, weenan'na yowiira npankeke yooreera, yossariya ni yoophwanela. ⁴ Miruku tjen'nha tjoopheela waavaha otjuwelatja waatthu akhwaawe, oviriyana waamwaavano. ⁵ Wowiira atthu ootjuwelatja yiiwe ni yintjenre entjuwelaaya, ni wowiira atthu yeettiheriyeke nimuupuwelelo, ⁶ wiira atjuwele miruku, tjinuulumaaya ni moolumo aatjuweli, anuupuwenlaaya. ⁷ Wooviya waApwiya wantjera wootjuwelatja, massi akhwaawe anaatanhifu otjuwelatja niihissima. ⁸ Mwaamwanaka, oviriyane tjinoohimeerya athumwana naanumwana; ⁹ ayena an'hala okhala etthuvo yomahala yon'murumwaa ninssikonimwaa. ¹⁰ Mwaamwanaka, anamattheka yapheela wootthekiha phanka ayena, waakhottele. ¹¹ Yiiravale! Ninpheela omwiiva ntthu; niipithe nintuphele ntthu. ¹² Nimwiive nkumi, phanaka ekhapure enon'miryaaya atthu akumi, ankhala munlikittini. ¹³ Ninaahala ophwanha khula etthu yooreera, ninaahala otjariha n'mapaanimwihu tjitthu tjin'haleehu win'yera atthu. ¹⁴ Onitthare ninaahala okhalana tjitthu tjintji. ¹⁵ Mwaamwanaka, oheette naayena, wala n'nhaanaa ohihiye ninhakelaka munviraaya; ¹⁶ kontha enhaatjaya tjintthawenla yootakhala ni yiivaka. ¹⁷ Khawanphwanela otthonkomaniha nryankho wamwaanuni natjuwenle. ¹⁸ Yaayo atthwaayo, aniipithela wiivanan, aniiryeela miryankho assineene. ¹⁹ Tjitjon'mo phiryaaya mittalatjaya atthu ooteene anthatjiri woohissariya; ophwanha woohissariya onaakumiha ekumi wayaale anrweela. ²⁰ Otjuwelatja onaakhuwela nphironi ni ntjuunaya ninawiiwanyaa oparassa; ²¹ mapuro oonhakulatjiya, ninawiiwanyaa, n'mamikhorani tjon'mapooma, ninaakhuwela. ²² Nhu, n'hirina otjuwelatja, n'nohala ofenta ohitjuwelawinhu npaka eyaakhani. Npaka eyaakhani, nhu oohanhurihavaa, mun'haleenhu ohanhuriha, npaka eyaakhani, nhu mun'haleenhu otanhifu otjuwelatja. ²³ Mwiiweehe en'himyaaka; kinaahala woomwaresselani muupuwelelwaaka ni kinaahala owooniherani moolumwaaka. ²⁴ Kihowiihanani, khantthunale okiiwa; kihotaphula ntatanaka khaavo kiwatjenrale. ²⁵ N'hokhottatja moolumwaaka ni khantthunale tjoohimyatjaka. ²⁶ Kinaahala woothyaani tjin'hala wookhumenlani, kinaahala woohuluwani yowoopiha yooweelani, ²⁷ mwakhumenliyavale nitjitthu tjowoopiha mikatjamiho noohuva onaahala woomorelani. ²⁸ N'naahala okikhuwela, ni akin'hala owaakhulani; n'naahala okitholathola, massi khan'nohala okiphwanha. ²⁹ Kontha n'noohanhuriha otjuwelatja ni khanthanlale owoova Apwiya. ³⁰ Khamwiiwenlale moolumwaaka ni n'nootanhifu tjihimyalyaaka. ³¹ N'nohala olya n'hokorokho wotjitthu tjin'vareenhu, ni n'hokorokho wotjitthu tjinuupuweleenhu, n'naahala orupala. ³² Kontha ohitjuwela etthu anaakhwa yahuluwakavale, ni wanriiha waatirikhi onaakwanhuwa. ³³ Massi yoole n'hala okiiwelela naahala okhala woolipa ni naahala omumula, woohoova yootakhala.