¹ Yahweh wakatsa kuna Aroni: "Iwewe, ana ako, uye dzindza re madzibhabha ako ndimwi mutchawonerera zwishaishi zwese zwinenge zwaizwa mumbuto swene. Asi iwewe bhasi ne ana ako ndimwi mutchapiwa kuzwishaishi zwese zwitchaizwa ne upi hake pa zwipiriso. ² Uye anhu edzindza ra Revi, dzindza re madzibhabha enyu, iwewe utchawiya nawo, kuti angozowe newe uye ne ana ako pamunenge metchisendza pamberi pe Tendi yemitemo yerutenderano. ³ Anofanira kuzokusendzera iwewe uye nekune tendi yese. Asi, iwona afaniri kukwedyera duze kwe tchiro tchipi hatcho tchinenge tchiri pambuto swene kana tchinenge tchri tche pa aritari, nekuti zwikadharo anozofa iwona uye nemwiwo. ⁴ Anofanira kuwa newe kuti aite bhasa mutendi yerusangano, kuitira bhasa rese rinenge riri mutendi. Mufambi afaniri kukukwedyerera duze. ⁵ Unofanira kuwonerera mbuto swene uye ne aritari, kuitira kuti kunyangadzwa kwangu kusawiyezwe ku anhu eIziraeri. ⁶ Wonai, Inini ndasanangura pakati pe ana a Iziraeri hama dzenyu, marevi. Iwona nditchimwe tchipo tchakapiwa kwamuri kuitira Yahweh, kuitira kuti muite bhasa rinoenderana ne mutendi yerusangano. ⁷ Asi iwewe bhasi ne ana ako mutchaita zwipiriso maererano ne zwese zwinoenderana ne aritari uye ne zwese zwiri mukati me djira. Imwimwi, imwimwi tchaizwo, munofanira kuwa ne ubhabha we zwiro izwi. Ndirikukupasai bhasa re zwipiriso se tchipo. Uye mufambi wese unokwedyera duze unofanira kufa". ⁸ Zwadharo, Yahweh wakatsa kuna Aroni: "Wona ndakupasa bhasa rekutora zwipo wetchiundzisa Kwandiri, uye ne zwipo zwese zwiswene zwandinenge ndapiwa ne anhu eIziraeri, Inini ndirikuzwipa kwauri uye ne ana ako se tchipo kwenda ne kwenda. ⁹ Pazwiro zwiswene swene, zwisina kupinda ne pamoto, izwi zwitchawe zwako: zwipo zwawo zwese, ne zwipo zwese zwe magwere, ne zwipo zwese zwe kushaisha uye ne zwipo zwese zwe mbhoswa, ndizwiro zwiswene swene kwamuri ne ana enyu. ¹⁰ Zwipo izwi zwiswene swene; mwanarume wese unofanira kuzwirya, nekuti izwona zwakadzodzwa kwauri. ¹¹ Izwi ndizwo zwitchawe zwipo zwitchawe zwako: zwipiwa zwako, zwipo zwese zwinenge zwaundziswa ne ana a Iziraeri. Inini ndazwipasa iwewe, kuitira ana ako, se zwipo kwenda ne kwenda. Anhu ese eukama ako anenge akatcheneswa angarya hawo zwiro zwipi hazwo zwezwipozwo. ¹² Mafuta akanakisisa, vinyu inyowani yakanakisisa uye ne magwere, mitchero yekutanga yandinopiwa ne anhu, zwiro zwese izwi ndinosozwipasa kwauri. ¹³ Mitchero yekutanga yakaswuka yemumunda mako mwese, zwandinenge ndapiwa, zwitchawe zwako. Anhu ese eukama wako anenge akatcheneswa angarya hawo zwirozwo. ¹⁴ Zwiro zwese zwakadzodzwa ku Iziraeri zwitchawe zwako. ¹⁵ Anhu ese anofungura tchibhereko, dyangwe rese, kunyangwe remunhu, kunyangwe re tchinyama, ritchapiwa ne anhu kuna Yahweh, zwese zwitchawe zwako. Asi, anhu ese anofanira kuzotorazwe mwana wese dyangwe uye ne dyangwe rese retchinyama tchakaswipiswa. ¹⁶ Zwiya zwitchatorwazwe ne anhu, zwinofanira kuzotorwa zwikange zwapedza kuita zera re mwedzi umwe. Zwadharo, anhu anofanira kuzozwitorazwe ne mutengo we mipimo mishanu yendarama, maererano ne mapimiro ekurema kwemipimo embuto swene, anoenderana ne mutengo makumairi emzwiro. ¹⁷ Dyangwe re nhombe, re gwayana, kana re mbudzi, azwifanirwi kutengazwe, izwo zwinofanira kuviswa kuundziswa Kwandiri. Unofanira kuwaza ngazi yazwo pa aritari uye wopisa mafuta azwo se tchipo tchekupiswa tchemunuhiro unodyakadza kuna Yahweh. ¹⁸ Nyama yatcho itchawe yako, pamwepo ne bhipyi re tchipo tchekuzungunuswa uye ne mbhavu ye moko kwawo, nyama yatcho itchawe yako. ¹⁹ Tchipo tchese tchakatcheneswa tchitchaundziswa ne anhu eIziraeri kuna Yahweh, nditchazwipasa iwewe, kune ana ako se ndyaka yekwenda ne kwenda. Itchi nditchimwe tchitenderano tchekwenda ne kwenda tchemunyu, tchimwe tchitenderano tchakaiswa patchose pamberi pa Yahweh kuitira iwewe uye ne ana ako". ²⁰ Yahweh wotsa kuna Aroni: "Iwewe auzowi ne ndyaka munyika ye anhu, kana kuwa ne tchimwe tchikamu tchemunda pakati pe anhu. Inini ndini tchikamu tchako ne ndyaka yako pakati pe anhu eIziraeri. ²¹ Kune we dzindza ra Revi, wona, Inini ndapa tchagumi tchese ku Iziraeri se ndyaka kuitira bhasa ramaita mutendi yerusangano. ²² Kuva zwino kwenda mberi, anhu eIziraeri afaniri kuguma paduze pe tendi yerusangano, kana zwikadharo anozopiwa mbhoswa nekudha kwe kushaisha uku uye anofa. ²³ Marevi anofanira kuita bhasa remutendi yerusangano. Atchapiwa ubhabha wekuwonerera ushaishi upi hawo unoenderana neizwi. Uyu utchawe mutemo wekwenda ne kwenda pakati pemarudzi e anhu enyu. Iwona afaniri kuzowa ne ndyaka pakati pe anhu eIziraeri. ²⁴ Nekuti zwagumi zwe annhu eIziraeri, zwakaundziswa Kwandiri se tchipo, ndakazwipasa kune marevi se ndyaka. Saka, ndakaati kwari: "Amuzowe ne ndyaka pakati pe anhu eIziraeri"'. ²⁵ Yahweh wakabuya na Mozesi, etchiti: ²⁶ "Buya ne marevi, wetchiwati: 'Mukatambira zwagumi zwetchiva ku anhu eIziraeri zwamakapaswa na Ishe se ndyaka, pasaiwo Yahweh tchagumi yazwo, tchagumi tche tchagumi. ²⁷ Kupa kwenyu uku kutchawoneka se tchagumi tche mbeu yekukoha kana ye zwirimwa zwemumunda. ²⁸ Zwimwe zwimwezwo, munofanirawo kupa tchipo kuna Yahweh tche zwagumi zwese zwamunenge matambira kuva ku anhu eIziraeri. Izswona, mutchazwiendesa kuna Aroni, mupirisita. ²⁹ Pazwese zwipo zwamutchatambira, munofanira kupa zwipo kuna Yahweh. Munofanira kudhusa tchipotcho kuzwiro zwandakakupai, metchisanangura zwakanakisisa zwatcho, uye ne zwiswene zwatcho'. ³⁰ Zwadharo, wozowavundza: 'Mukange mapasa zwakanakisisa pazwiya zwamunenge matambira, zwinenge zwasara pazwipo zwenyu zwinofanira kuwoniwa ne marevi se mitchero yekukoha kana yezwirimwa. ³¹ Mungazozwirya henyu mumbuto ipi hayo, imwimwi ne ukama wenyu, nekuti izwona ndimubhairo wenyu pabhasa rese raizwa mutendi yerusangano. ³² Amuzowe ne mbhoswa nepazwekurya kana pakumwa zwirozwo, mukange mapasa zwakanakisisa zwatcho kuna Yahweh. Asi musaswipise zwipo zwiswene zwinenge zwapiwa ne anhu eIziraeri, mukadharo munofa"'.