¹ Zwino Inini nditchatuma mutumwa wangu wemasoko, utchagadzirira gwandza pamberi pangu; uye tchiriporipotcho utchawiya ku tyemberi yake Ishe wamuri kuswaga, mutumwa we masoko etchitenderano wamuridhisisa. Zwino iyena uri kuwiya, kubhuya kwa Ishe we hondo. ² Asi ndiani utchashingirira patsiku ye kuwiya kwake? Ndiani utchakwanisa kugara akamira kana iyena akawiya? Nekuti iyena atchawe se moto, uye se sabhao yekupyadza nayo. ³ Uye iyena utchagara se mupukuti ne mutchenesi we ciriveri; nekuti iyena utchapukuta ana a Revi, uye utchapukuta se goridi uye se ciriveri; zwadharo atchaundzisa kuna Ishe zwipo ne kururama. ⁴ Uye tchipo tcha Judaa ne tcha Djerusarema tchitchawe tchakanaka kuna Ishe, se pamatsiku ekare, uye se pamakore ekare. ⁵ Uye Inini nditchakwedyera kwamuri kuitira utongi; uye nditchawe tchapupu kune aroi ne mbhombhwe, uye kune anoita mbhiko yemanyepo, uye ne kune anodwinyirira musendzi pamubhairo wake, shirikadzi, uye ne ndyerera, uye ne anodwinyirira zwipiwa zwe mufambi, uye awandityi, kubhuya kwa Ishe we hondo. ⁶ Nekuti Inini Ishe, anditchindji; saka imwimwi, ana a Jakobo, amuripi kuparadzwa. ⁷ Kuvira pamatsiku emadzibhabha enyu imwimwi makagara makabhuda mumutemo dzangu, uye amuna kudziterera. Petukai kwandiri, uye inini nditchapetuka kwamuri, kubhuya kwa Ishe we hondo. Asi imwimwi munosoti: Tinofnira kupetuka pazwipi? ⁸ Zwingaita here kuti munhu abhire Mwari? Imwimwi munosondibhira. Asi imwimwi munoti: Tinosomubhira pazwipi? Muzwagumi ne muzwipo. ⁹ Nekutukwa munosokukwa nekuti imwimwi munosondibhira, rudzi rese. ¹⁰ Undzisai zwagumi zwese kunyumba ye ufumi, kuitira kuti kuwe ne zwekurya munyumba yangu; uye ndiedzei paizwi, kubhuya kwa Ishe we hondo, kuti ndimufunungurirei mabhori edyenga, uye ndodhurura pamusoro penyu maropafadzo akawandisisa. ¹¹ Uye nekuda kwenyu nditchaparadza muparadzi, kuitira kuti asaswipise mitchero yenyu panyika; uye mizambiringa yenyu mumunda aizowi isikabhereki, kubhuya kwa Ishe we hondo. ¹² Uye marudzi ese atchamuti makaropafadzwa; nekuti imwimwi mutchawe nyika inodhakadza, kubhuya kwa Ishe we hondo. ¹³ Masoko enyu anosowa akawoma kwandiri, kubhuya kwa Ishe. Asi imwimwi kunosoti: Tinosobhuei kwamuri? ¹⁴ Imwimwi munosoti: Azwina bhasa kusendzera Mwari; tinosowinei pakutchengeta mutemo dzake uye ne kuhamba teidyeketera pamberi pa Ishe we hondo? ¹⁵ Ngatidhane anhu anerake kune anozwikudza, nekuti anoita zwishaishi arikubhudhirira; kunyangwe aedze Mwari, iwona anopukunyuka. ¹⁶ Zwino aya akatya Ishe akabuya umwe na umwe kune umweni wake, uye Ishe wakaapurutana uye akawazwa; uye kukatarwa rimwe bhuku rekuedzurira pamberi pake kune anotya Ishe, uye nekune aremekedza zina rake. ¹⁷ Uye iwona atchawe zwiro zwangu zwakakosha patsiku yanditchagadzirira, kubhuya kwa Ishe we hondo; uye nditchakununurai se mwanarume unonunura mwana wake unomusendzera. ¹⁸ Zwadharo mutchapetuka kuwonakusiana pakati pe wakarurama ne wakashata, pakati pe anosendzera Mwari ne usikamusendzeri.