¹ Iri isoko ra Yahweh, rakawiya kuna kuna Ozea, mwana wa Beeri, pamatsiku a Uzia, Jotao, Akaz na Ezekia, madzimambo eJudaa, uye ne pamatsiku a Jeroboao, mwana wa Joaa, mambo we Iziraeri. ² Yahweh pakatsa pekutanga ne izwi ra Ozea, etchiti: "Enda, kotora hure rimwe kuti riwe rako. Irona ritchawe ne ana etchiva pa uhure wako, nekuti nyika irikuita umwe uhure ukuru pakupandukira Yahweh". ³ Nekudharo, Ozea woenda uye wororana na Gomeri, mwanasikana wa Diblaimo, uye iyena wakawe ne pamwiri akabhara umwe mwana komana. ⁴ Yahweh wotsa kuna Ozea: "Mupe zina rekuti Jezraeri. Nekuti nekukasika nditchaphanitcha nyumba ya Jeu ngendaa yekuuraya Jezraeri, uye nditchaita kuti umambo we imba ye Iziraeri upere. ⁵ Zwitchaitika patsiku yanditchaparadza mupasha we Iziraeri pamupata we Jezraeri." ⁶ Gomeri wobhatazwe pamwiri uye wobhara umwe mwanasikana. Zwadharo, Yahweh wotsa kuna Ozea: "Mupe zina rekuti Lo-Ruama, nekuti andizowizwe ne ndoni kune nyumba ye Iziraeri, yekuti ndaidhikanapi kuiregerera narini. ⁷ Pazwese, nditchawe ne ngoni kune nyumba ye Judaa, uye nditchaaponesa Kwandiri tchaizwo, Inini Yahweh, Mwari wawo. Inini andiaponesi ne mupasha, kana tsorora, kana hondo, kana ne mabiza, kana ne arwi emabiza." ⁸ Zwadharo, Lo-Ruama pakapedza kurumurwa, Gomeri wakawe ne pamwiri uye wobhara mwana komana umweni. ⁹ Zwadharo, Yahweh wotsa: "Mupase zina rekuti Lo-Ami, nekuti imwimwi amuripi anhu angu, kana Inini, Mwari wenyu. ¹⁰ Pazwese, mutengo we anhu eIziraeri utchawe se mavu emubhahari, ekuti apana ungapima, kana kuaerenga. Kunyangwe zwakazwi kwaari: "Imwimwi amuripi anhu angu", zwitchazozwi kwaari: "Muri anhu a Mwari mupenyu". ¹¹ Anhu eJudaa ne anhu eIziraeri atchabhatanizwa. Atchadhoma kwari umwe mutungamiriri, uye atchaenderera mbheri panyika, nekuti tsiku ya Jezraeri itchawe ikuru.