¹ Pamwedzi wetchinomwe maIziraerita apedza kupetuka mumaguta awo, anhu ese ounganidzana, se munhu umwe bhasi, ku Djerusarema. ² Jezua, mwana wa Jozadake, uye ne hama dzake, mapirisita, Zorobaber, mwana wa Seartier, uye ne hama dzake akapurumuka uye wowaka imwe aritari kuitira Mwari we Iziraeri, kuti azope zwipiriso, maererano ne mutemo wa Mozesi, mwanarume wa Mwari. ³ Zwadharoko, wowaka aritari, kunyangwe nekutya kainge anako kune anhu emuduzemo, Iwona wopasa zwipiriso kuna Yahweh tchematchibhesi ne tcemadhokoni. ⁴ Uye aitawo mabhiko ezwitumba, maererano ne zwakatarwa, uye wopasa zwipiriso, tsiku ne tsiku, maererano nezwakatongerwa, patsiku yakatongerwa. ⁵ Nekudharoko, painge pane zwipiriso zwetsiku, uye nezwepamwedzi uye ne zwipo zwe mabhiko ese akatarirwa a Yahweh, pamwepo ne zwipo zwekudha kwawo. ⁶ Iwona akatanga kupasa zwipiriso kuna Yahweh patsiku yekutanga yemwedzi wetchinomwe, kunyangwe tyemberi yainge aisati yatanga kuwakwa. ⁷ Zwadharo, wopasa siriveri kune awaki enyumba ne atsetsi emiti; uye ne zwekurya, zwekumwa, uye ne mafuta kuitira anhu eku Sidomo ne Tiro, kuitira kuti iwona atumire muti kuva ku Ribano dzamara ku Jope, nemugungwa, maererano ne zwainge zwatongerwa na Ciro, mambo we Persia. ⁸ Zwadharo, pamwedzi wetchipiri we gore retchipiri ava kupetuka ku nyumba ya Mwari ku Djerusarema, Zorobaber, Jezua, mwana wa Jozadake, uye ne mapirisita ese, marevi uye ne ese akapetuka kuva kuundhapwa kuwia ku Djerusarema wotanga kusendza. Iwona wodhoma marevi anemakore anokwana makumairi kwenda mberi kuti awonerere bhasa munyumba ya Yahweh. ⁹ Jezua wodhoma ana ake ne hama dzake, Kadmier ne ana ake, uye newe kudzindza ra Judaa kuti wawonerere raitwa ne anhu munyumba ya Mwari. Pakati pawo, painge pane wedzindza ra Henadade, uye ne aperekedzi ake marevi. ¹⁰ Awaki wotanga kuwaka tyemberi ya Yahweh. Izwo zwakaita kuti mapirisita awiye akafveka matchira awo uye ne trombone, uye marevi, ana a Asafe, arumbidze Yahweh ne zwiridzwa, maererano ne zwitarwa zwa David, mambo we Iziraeri, zwainge atongera. ¹¹ Iwona woimba wetchirumbidza uye wetchitenda kuna Yahweh, etchiti: "Iyena wakanaka. Wimbiso Yake yekutendheka kune Iziraeri inogara iripo kwenda ne kwenda". Anhu ese akatchema nekudhakarisisa uye ne rumbidzo kuna Yahweh nekuti tyemberi yainge yatangwa kuwakwa. ¹² Asi ajindji mapirisita, marevi, atungamiriri emadzindza uye ne akuru akuru ainge ambowona nyumba yekutanga, payakatagwa kuwakwazwe nyumbeyo pamberi pemadziso awo, ndiwo akanyanya kutchemesesa. Asi, ajindji amweni aikuwa nekudhakara uye nengoma inotindyira. ¹³ Zwakazoitika, anhu hana kukwanisa kusianisa nekuwona kukuwa nekudhakara uye ne kutchema, uye kukuwa kwawo kwaizika kure kure.