¹ Zwadharo, Ezira wainamata uye etchireurira, iyena waitchema uye waigwadhama pamberi pe nyumba ya Mwari. Rimwe rujindji guru reanarume eiziraeri, anakadzi uye ne ana akaungana kwari, uye anhu ese aitchema zwikuru. ² Sekania, mwana wa Jeier, we dzindza ra Erao, wobuya kuna Ezira akati: "Tawe anhu asina kutendeka kuna Mwari wedhu uye tinosotchata ne anakadzi enyika dzekundza. Asi zwino, kunyangwe paizwi, kutchiri ne tariro kune Iziraeri. ³ Nekudharoko, tisiei tiite tchimwe tchitenderano na Mwari wedhu kuitira kuti tivise anakadzi ese ne ana awo maererano ne mbhangiro ya Ishe uye ne mbhangiro dze aya anotetemera pamberi pemitemo dza Mwari wedhu, uye ngazwiizwe maererano ne mutemo. ⁴ Purumuka, nekuti iri ndibhasa rako, uye isusu tiri newe. Iwa wakasimba uye ita izwi!" ⁵ Zwadharoko, Ezira wopurumuka uye woita kuti mapirisita makuru, marevi, uye ne anhu ese eIziraeri awimbise kuita zwiro izwi. Nekudharoko, anhu ese woita imwe wimbiso tche kwenda ne kwenda. ⁶ Ezira wopurumuka kuva Panyumba ya Mwari uye woenda mumba ma Joanaa, mwana wa Eriazibe. Iyena hana kurya mukate kana kumwa nvura nekuti waitchema ngedaa ye kusatenda kwe aya ainge ari kuumdhapwa. ⁷ Naizwona, iwona wotumira masoko ku Djudia ne Djerusarema, kuti anhu ese akapetuka kuva kuumdhapwa, kuti aungane ku Djerusarema. ⁸ Munhu upi hake waidapi kuwiya pamatsiku matatu, maererano ne mbhangiro dze atungamiriri ne akuru akuru, waizoruza zwiro zwake zwese uye waizoviswa pakati pe gungano reanhu akapetuka kuva kuundhapwa. ⁹ Zwadharo, anarume ese eku Djudia ne Benjamim, pamatsiku matatu, akaungana ku Djerusarema. Wainge uri mwedzi wetchifvembamwe uye ne tsiku yetchimakumairi yemwedzi. Anhu ese ainge akamira pakati peguta, pamberi pe Nyumba ya Mwari, uye akatetemera nekudha kwe sokoro uye ne nvura. ¹⁰ Ezira, mupirisita, wakapurumuka akti: "Imwimwi tchaizwo maita upanduki. Imwimwi mararama ne anakadzi enyika dzekundza nekudha kwazwo mbhoswa ye Iziraeri ya wedzerwa. ¹¹ Asi zwino, rumbidzai Yahweh, Mwari we madzitsekuru enyu, uye itai tchidho Tchake. Sianai ne anhu emunyika uye ne anakadzi enyika dzekundza". ¹² Gungano rese rikadhaira ne iwi guru retchiti: "Isusu titchaita maererano ne zwawabuya. ¹³ Asi, pane rujindji guru uye inguwa ye nvura. Isusu atingakwanisi kugara nekudhii rekundza, uye hasi tsiku rimwe kana mairi ebhasa, nekuti ajindji edhu isusu tinosoposha kukuru pazwiro izwi. ¹⁴ Zwadharoko, siai atungamiriri edhu aimirire gungano rese. Anhu ese akatendera kuti anakadzi enyika dzekundza ararame muguta mwedhu atchawiya, panguwa yapanganua ne akuru akuru uye ne atongi emuguta, dzamara kutsamwa kukuru kwa Mwari kubhudye kwatiri". ¹⁵ Jonata, mwana wa Azaer, na Jazeia, mwana wa Tikvaa, hawana kuterera izwi; uye Mezurao na Sabetai, murevi, akaendawo kudhii rekwawo. ¹⁶ Nekudharoko anhu akapetuka kuva kuundhapwa woita saizwozwo. Ezira, mupirisita, wosanangura anarume, atungamiriri emadzindza uye we nyumba dze madzitsekuru awo, ese akadhomwa nemazina, uye iwona wowongorora nyayeyo kuvira patsiku yekutanga ye mwedzi wetchigumi. ¹⁷ Patsiku yekutanga ye mwedzi wekutanga, iwona wopedza kuwona ndiapi anarume airarama ne akadzi enyika dzekundza. ¹⁸ Pakati pe we dzindza remapirisita painge pane akararama ne akadzi enyika dzekundza: pakati pewedzindza ra Jezua, mwana wa Jozadake uye ne hama dzake ainga aripo Mazeia, Eriezer, Jaribe na Gedaria. ¹⁹ Uye nekudharo iwona wotongera kudzingira akadzi awo. Nekuti ainge ane mbhoswa, iwona wopasa bhira rimwe nekudha kwe mbhoswa yawo. ²⁰ Pakati pewe dzindza ra Imer: Hanani na Zebadia. ²¹ Pakati pewe dzindza ra Harimo: Mazeia, Eria, Semaia, Jeier na Uzia. ²² Pakati pewe dzindza ra Pazur: Erioenai, Mazeia, Ismaer, Netanaer, Jozabade uye na Ereaza. ²³ Pakati pema revi: Jozabade, Simei, Keraia, aindzwizwe Kerita, Petaia, Judaa na Eriezer. ²⁴ Pakati pe aembi: Eriazibe. Pakati pe awonereri emusuwo: Sarumo, Teremo na Uri. ²⁵ Pakati pe amweni maiziraeri, pakati pe we dzindza ra Paroosi: Ramia, Jezia, Markia, Miamimo, Ereazar, Hazabia na Benaia. ²⁶ Pakati pewe dzindza ra Erao: Matania, Zakaria, Jeier, Abdi, Jerimote na Eria. ²⁷ Pakati pewe dzindza ra Zatu: Erioenai, Eriazibe, Matania, Jerimote, Zabade na Aziza. ²⁸ Pakati pewe dzindza ra Bebai: Jeoanaa, Hanania, Zabai na Atrai. ²⁹ Pakati pewe dzindza ra Bani: Mezurao, Maruke, Adaia, Jazube, Sear na Jerimote. ³⁰ Pakati pewe dzindza ra Pate-Moabe: Adnaa, Kerar, Benaia, Mazeia, Matania, Bezarer, Binui na Manase. ³¹ Pakati pewe dzindza ra Harimo: Eriezer, Isia, Markia, Semaia, Simeao, ³² Benjamim, Maruke na Semaria. ³³ Pakati pewe dzindza ra Hazumo: Matenai, Matataa, Zabade, Eriferete, Jeremai, Manase na Simei. ³⁴ Pakati pewe dzindza ra Bani: Madai, Anrao, Uer, ³⁵ Benaia, Bedia, Kerui, ³⁶ Vaniasi, meremote, Eriazibe, ³⁷ Matania, Matenai na Jasai. ³⁸ Pakati pewe dzindza ra Binui: Simei, ³⁹ Seremia, Nataa, Adaia, ⁴⁰ Maknadbai, Sazai, Sarai, ⁴¹ Azarer, Seremia, Semaria, ⁴² Sarumo, Amaria, na Djosefa. ⁴³ Pakati pewe dzindza ra Nebo: Jeier, Matitia, Zabade, Zebina, Jadai, Joer na Benaia. ⁴⁴ Ese aya akatora akadzi enyika dzekundza uye akabhara ana ne amwe awo.