¹ Ngase ngibona ingilosi yehla ichamuka ezulwini. Beyiphetse sikhiya semgodzi longenamkhawulo, neluketane lolukhulu esandleni sayo. ² Yabamba nyokangwenya, inyoka lendzala, umcambimanga, noma Sathane, yambopha ngeluketane iminyaka leyinkhulungwane. ³ Yamjikijela emgodzini longenamkhawulo. Yawuvala yabese ibeka luphawu etikwakhe. Loku kwentelwa kutsi angaphindzi kwedukisa tive futsi kuze iminyaka leyinkhulungwane iphele. Emvakwaloko, utawukhululwa sikhatsi lesifishane. ⁴ Ngase ngibona tihlalo tebukhosi. Kuhleti kuto labo labanikwe emagunya ekwahlulela. Ngaphindza ngabona imiphefumulo yalaba labebancunye tinhloko ngenca yekufakaza ngaJesu nangelivi laNkulunkulu. Abazange bakhonte lesilo noma umfanekiso waso, bala nekwamukela luphawu emabuntini abo noma esandleni. Bavukela ekuphileni, base babusa kanye naKhristu iminyaka leyinkhulungwane. ⁵ Bonkhe labasala labebafile abazange bavukela ekuphileni kwaze kwaphela iminyaka leyinkhulungwane. Loku kukuvuka kwalabafile kwekucala. ⁶ Ubusisiwe futsi ungcwele noma ngabe ngubani lohlanganyela ekuvukeni kwekucala! Ngetulu kwaloku kufa kwesibili sekute emandla. Batawuba baphristi baNkulunkulu naKhristu batawubusa kanye naye iminyaka leyinkhulungwane. ⁷ Na- iminyaka leyinkhulungwane seyifike ekugcineni, Sathane uyawukhululwa ekuboshweni kwakhe. ⁸ Uyawuphuma ahambe ayawudukisa tive emagunjini lamane emhlaba--boGogi naMagogi--kubahlanganisela kanyekanye emphini.Batawuba banyenti ngangesihlabatsi selwandle. ⁹ Tenyuka tahlakateka etikwemhlaba wonkhe tagigeletela inkambu yebantfu labangcwele baNkulunkulu--lidolobha lelitsandzekako.Kepha umlilo wehla uphuma ezulwini watidla tonkhe. ¹⁰ Sathane, lebedukise bonkhe, wabanjwa wajikwa echibini lemlilo lovutsa sibabule, lapho silo nemphrofethi wemanga bebajikijelwe khona. Bayawuhlushwa imini nebusuku phakadze naphakadze. ¹¹ Ngase ngibona lesikhulu sihlalo sebukhosi lesimhlophe nalobekahleti kuso. Umhlaba nemazulu kwabaleka ebukhoneni bakhe, kodvwa kwakute indzawo lebekungaya kuyo. ¹² Ngabona labafile --labanemandla nalabangasimcoka--bemile phambi kwesihlalo sebukhosi, tincwadzi tabese tiyavulwa. Kwase kuvulwa lenye incwadzi--incwadzi yekuphila. Labafile bahlulelwa ngalebekubhalwe etincwadzini, nangemisebenti yabo. ¹³ Lwandle lwakhokha labafile lebebakulo. Kufa neHayidesi kwaniketa lebebafile lababekuko, labo labafile bahlulelwa ngaloko lebebakwentile. ¹⁴ Kufa neHayidesi kwajikijelwa echibini lemlilo. Loku kukufa kwesibili--lichibi lemlilo. ¹⁵ Uma libito lanoma ngangubani lingatfolakalanga libhaliwe eNcwadzini yeKuphila, wajikijelwa echibini lemlilo.