¹ Emuva kwaletitintfo ngabona lenye ingilosi yehla ichamuka ezulwini. Beyinemagunya lamakhulu, umhlaba wakhanyiswa ngulenkhatimulo yayo. ² Yamemeta ngelivi lelikhulu, itsi,"Iwile, iwile iBhabhuloni lenkhulu! Sewugucuke waba yindzawo yekuhlala emadimoni, nesihhehle sekubhaca bomoya labangcolile netinyoni letinyanyekako. ³ Tonkhe tive tinatse leliwayini lenkhanuko yebugwadla bayo.Emakhosi emhlaba aphingile nayo.Bahwebi bemhlaba banjingile emandleni ekutamasa kwayo." ⁴ Ngase ngiva lelinye liphimbo livela ezulwini litsi, ''Phumani kuye, bantfu bami, kuze kutsi ningatuwuhlanganyela etonweni takhe, nekutsi phindze ningemukeli nasinye setishayo takhe. ⁵ Tono takhe tincwabelene kuya etulu njengelizulu, naNkulunkulu sewukhumbule tento takhe letimbi. ⁶ Yenta kuye njengobe ente kulabanye, akuphindvwe kabili kuloko lakwentile; endzebeni layihlanganisile yena, kayihlanganiswe kabili njengekwelinani lakhe. ⁷ Njengoba abetiphakamisa waphila ngekutamasa, mnikeni ngekwelinani titse tinhlupho netinsizi. Ngoba utsi enhlitiyweni yakhe, 'Mine ngihleti njengendlovukazi; Angisuye umfelokati, angeke ngikubone kuzila.' ⁸ Ngakoke ngalanga linye tinhlupheko takhe tiyawufika; kufa, kuzila, nendlala. Uyawudliwa ngumlilo, ngoba Inkhosi Nkulunkulu inemandla, ingumahluleli wakhe." ⁹ Lamakhosi emhlaba laphinga nayo ahluleka kutibamba ayawukhala ayililele nakabona intfutfu yekusha kwayo. ¹⁰ Ayawuma bucalu, esabe ngekuhlushwa kwayo, atsi, ''Maye, maye kulelidolobhakati, iBhabhulona, lelinemandla! ngekweli-awa linye kwehlulelwa kwakho sekufikile.'' ¹¹ Bahwebi bemhlaba bayawuyikhalela bayililele njengoba kute loyawube atsenga timphahla kuyo futsi-- ¹² imphahla yegolide, yesiliva, ematje emagugu, emapharele, yelineni lecolisakele, lebukhwebeletane, yesilikha, lebovu, neyato tonkhe tihlahla temakha, naletakhiwe ngematinyo etindlovu, netihlahla letiligugu, telitfusi, tensimbi, temabuli, ¹³ nesinamoni, netinandzisi, nemphepho, nemakha, nenhlaka, neliwayini, nemafutsa, nafulaha locolisakele, nakolo, netinkhomo, netimvu, nemahhashi, netincola, netigcili, kanye nemiphefumulo yebantfu. ¹⁴ Lesitselo lobosilangatelela ngemandla akho onkhe sesisukile kuwe. konkhe kutamasa nebucwebecwebe bunyamalele,angeke busatfolakala futsi. ¹⁵ Bahwebi baletimphahla labanjinge ngaye bayawuma bucalu ngobe besaba letinhlupho tayo, bayawukhala balile kakhulu. ¹⁶ Bayawutsi, ''Maye, maye kulelidolobhakati lebelembatsiswe telineni lecolisakele, nalebukhwebeletane, nalebovu, nekuhlotjiswa ngegolide, ematje laligugu, nemapharele! ¹⁷ Ngeli-awa linye yonkhe lengcebo icitsekile.'' Bonkhe bashayeli bemikhumbi, nalabahamba ngayo, nematilosi kanye nalabo imphilo yabo ikusebenta elwandle bayoma bucalu. ¹⁸ Bakhala kakhulu nababona lentfutfu yekusha kwayo. Batsi, ''Nguliphi lidolobha lelifana nalelidolobha kati?'' ¹⁹ Batsela lutfuli etinhloko tabo, bamemeta kakhulu, bakhala balila, ''Maye, maye kuwe dolobhakati lapho bonkhe labebanemikhumbi elwandle baceba ngengcebo yalo. Ngekeli-awa linye selibhujisiwe.'' ²⁰ ''Jabulani nitfokote, mazulu, nani nonkhe bantfu labangcwele, nebaphostoli kanye nebaprofethi, ngobe Nkulunkulu sewuniletsele kwahlulelwa kwayo!'' ²¹ Ingilosi lenemandla yatsatsa litje lelifana nelitje lelikhulu lekusila yaliphonsa elwandle, itsi, ''Ngalendlela, Bhabhulona, dolobhakati, uyawujikijelwa phansi ngemandla angeke uphindzwe ubonwe. ²² Umsindvo webashayi bemahabhu, bahlabeli, bashayi bemintjingozi, bashayi bemacilongo angeke uphindze uvakale kuwe. Kuyabate babati betintfo letitinhlobonhlobo labayawutfolakala kuwe.Awukho umsindvo wesigayo loyovakala kuwe phindze. ²³ Kukhaya kwesibane angeke kwaphindze kwabonakala kuwe.Emaphimbo emyeni namakoti angeke aphindze avakale kuwe, ngoba bahwebi bebatikhulu temhlaba,netive tedukiswa ngulobutsakatsi bakho. ²⁴ Kuwe kwatfolakala ingati yebaprofethi nebantfu labangcwele baNkulunkulu, nengati yabobonkhe lababulawa emhlabeni.''