¹ Ngeva livi lelikhulu limemeta ngaphandle kwelithempeli latsi kuletingilosi letisikhombisa, "Hambani nitfululele emhlabeni letitja letisikhombisa telulaka lwaNkulunkulu." ² Ingilosi yekucala yahamba yatfulula sitja sayo etikwemhlaba; tilondza letimbi naletibuhlungu tehlela kubantfu labebaneluphawu lwesilo, labo labebakhonta umfanekiso waso. ³ Ingilosi yesibili yatfululela sitja sayo elwandle. Lwagucuka lwaba yingati, njengengati yemuntfu lofile, kwabese yonkhe intfo lephilako phakatsi elwandle yafa. ⁴ Ingilosi yesitsatfu yatfululela sitja sayo emifuleni nasetiyalwini temanti, ase agucuka aba yingati. ⁵ Ngeva ingilosi lengamele emanti itsi, "Wena ulungile --lokhona nalebekakhona, longcwele-- ngoba wehlulele letitintfo. ⁶ Ngoba bacitsa ingati yebantfu labangcwele baNkulunkulu nebaprofethi, wena ubanike ingati kutsi banatse; nguloko lokubafanele." ⁷ Ngeva lilati liphendvula, "Yebo, Nkosi Nkulunkulu Somandla, tehlulelo takho tiliciniso futsi tilungile." ⁸ Ingilosi yesine yatfulela sitja sayo tikwelilanga, labese linikwa imvume kutsi lishise bantfu ngemlilo. ⁹ Bantfu bashiswa ngulokushisa lokukhulu, base bacalekisa libito laNkulunkulu, loyo lonemandla etikwaletinhlupho. Kodvwa abazange baphendvuke nome bamnike ludvumo. ¹⁰ Ingilosi yesihlanu yase itfululela sitja sayo esihlalweni sebukhosi sesilo, bumnyama base busibekela umbuso waso. Bantfu batiluma tilwimi ngenca yebuhlungu. ¹¹ Bacalekisa Nkulunkulu wasezulwini ngenca yebuhlungu nangetilondza, kodvwa balakuphendvuka kuloko lebakwentile. ¹² Ingilosi yesitfupha yatfululela sitja sayo emfuleni lomkhulu, iYufrethi. Emanti ayo asha kuze alungiselele emakhosi indlela latawuchamuka ngayo emphumalanga. ¹³ Ngabona imimoya lemitsatfu lengcolile lebukeka njengeticoco iphuma emilonyeni yanyokangwenya, neyesilo, kanye nemprofethi wemanga. ¹⁴ Loko ngimimoya yemadimoni lenta tibonakaliso letinkhulu. Lemimoya beyihamba iya kulamakhosi emhlaba wonkhe ukuze iwahlanganise ndzawonye emphini ngelilanga lelikhulu laNkulunkulu Simakadze. ¹⁵ ("Buka! Ngiyeta njengelisela! Ubusisiwe lowo lohlala njalo acaphele, ahlale njalo embatsile entele kutsi angahambi ngcunu bese babona simo sakhe lesihlazisako.") ¹⁶ lemimoya yawahlanganisa ndzawonye endzaweni lebitwa ngekutsi yi-Amagedoni ngesiHebheru. ¹⁷ Ingilosi yesikhombisa yabese itfululela sitja sayo emoyeni.Kwevakala livi lelikhulu lichamuka ethempelini nase sihlalweni sebukhosi, litsi, ''Sekwentekile!'' ¹⁸ Bekunebumanyamanya bemibane, kuzizitela, nekudvuma lokukhulu, kanye nekutamatama kwemhlaba lokubi--kutamatama kwemhlaba lokukhulu lokwendlula lokungazange kwenteke kusukela bantfu babakhona emhlabeni, kwaba kukhulu lokutamatama kwemhlaba. ¹⁹ Lelidolobhakati ladzabuka katsatfu, nemadolobha etive awa adzilika. Nkulunkulu wabese uyayikhumbula iBhabhulona lenkhulu, wanika lelidolobha indzebe legcwele liwayini lelakhiwe ngentfukutselo lembi. ²⁰ Sonkhe sichingi sanyamalala, netintsaba atizange tiphindze titfolakala. ²¹ Sangcotfo lesikhulu, lesingaba nesisindvo lesingaba ngemakhilogremu langema - 50, sehla etulu esibhakabhakeni sehlela kubantfu. Bantfu bacalekisa Nkulunkulu ngalesishayo sesangcotfo ngoba lesishayo besimatima kakhulu.