¹ Elangeni lesiphonhongo Moses wabita Aaron nemadvodzana kanye nalabadzala baka Israel. ² Watsi ku Aaron, ''Tsatsa litfole kulomhlambi wemnikelo wesono, nemvu lemndvuna lengena sici yemnikelo loshisiwe, ukunikele phambi kwa Simakadze. ³ Ubokhuluma nebantfu baka Israel utsi, 'Tsatsa siphongo semnikelo wesono nelitfole kanye nemvana, totimbili tibe nemnyaka munye budzala futsi tibe bete sici, kwemnikelo loshisiwe; ⁴ phindze utsatse inkunzi nemvu lendvuna kwemnikelo wekuthula kwenta umhlatjelo phambi kwa Simakadze,nemnikelo wenhlavu lohlanganiswe nemafutsa, ngoba namuhla Simakadze utawuvela kuwe.'' ⁵ Ngako baletsa konkhe loku Moses lakuyalela ethendeni lekuhlangana, nayo yonkhe inhlangano yaka Israel yeta yema phambi kwa Simakadze. ⁶ Wabese Moses utsi, ''Loku nguloku Simakadze laniyalile kutsi nikwente, kute kutsi inkhatimulo yakhe ivele kini.'' ⁷ Moses watsi ku Aaron, ''Wota dvutane nelilathi unikele umnikelo wakho wesono kanye nemnikelo loshisiwe, yenta kulungisa kwakho nekwebantfu, unikele umhlatjelo webantfu kwenta lokubalungisela, njengoba Simakadze ayalile.'' ⁸ Ngako Aaron waya edvute nelilathi wabulala lelitfole lemnikelo wesono, lobewuwakhe. ⁹ Emadvodzana a Aaron amniketa ingati, wenya imino yakhe kuyo wase uyifaka etimphondvweni telilathi; wase ucitsa lengatsi ekucaleni kwelilathi. ¹⁰ Noko, washisa lelinoni, letinso, kanye nalokumbonye lesibindzi elathini njenge mnikelo wesono, njengoba Simakadze ayalele ku Moses. ¹¹ Lenyama nesikhumba wakushisela ngephandle kwalenkambu. ¹² Aaron wabulala lomnikelo loshisiwe, nemadvodzana akhe amniketa lengati, layisaphata nhlangotsi tonkhe talelilathi. ¹³ Babese bamnika lomhlatjelo loshisiwe, ngelucetu ngelucetu, kanye kanye nenhloko, wakushisa elathini. ¹⁴ Wawasha letitfo tangekhatsi nemilente wakushisa etikwe mnikelo loshisiwe elathini. ¹⁵ Aaron waletsa umhlatjelo webantfu - imbuti, wase uyitsatsa njenge mhlatjelo wetono tabo wayibulala; wayenta yaba ngumhlatjelo wetono, njengoba enta ngembuti yekucala. ¹⁶ Waletsa umnikelo loshisiwe wawunikela njengoba Simakadze ayalele. ¹⁷ Waletsa umnikelo wenhlavu; wagcwalisa sandla sakhe ngayo wase uwushisa elathini, kanye nemnikelo loshisiwe wasekuseni. ¹⁸ Waphindze wabulala lenkunzi nalemvu lendvuna, lomhlatjelo wemnikelo wekhuthula, lowawu walabantfu. Emadvodzana a Aaron amniketa lengati, layifafata kuto tonkhe tinhlangotsi talelilathi. ¹⁹ Noko, bakhipha linoni lenkunzi nelemvu lendvuna, linoni lemsila, lelinono lelimboya titfo tangekhatsi, tinso, kanye nalokumbonye sibindzi. ²⁰ Batsatsa letitfo letatikhishiwe batibeka emabeleni, wase Aaron ushisa lamanoni elathini. ²¹ Aaron waphakamisa lamabele nelitsanga langasekudla njenge mnikelo wemagagasi phambi kwa Simakadze, njengobe Moses bekayalele. ²² Wase Aaron uphakamisa tandla takhe utibukisa kubantfu wababusisa; wase wehlela phansi asuka ekunikeleni lomnikelo wesono, umnikelo loshisiwe, kanye nemnikelo wekuthula. ²³ Moses na Aaron baya ethendeni lekuhlangana, base bayaphuma futsi babusisa labantfu, inkhatimulo ya Simakadze yavela kubo bonkhe labantfu. ²⁴ Umlilo waphuma ku Simakadze washisa lomnikelo loshisiwe kanye nelinoni elathini. Uma bonkhe labantfu babona loku, bamemeta balala phansi ngebuso.