¹ Nyalo livi laSimakadze lefika ku Jona idvodzana ya Amittai, litsi, ² ''Sukuma bese uya eNineve, lelidolobha lelikhulu, ukhulume umelane nalo, ngoba kukhohlakala kwabo sekuphakamile phambi kwami.'' ³ Kepha Jona wasukuma wabaleka ebukhoneni baSimakadze aye eTarshish. Wahamba waya endasi eJoppa watfola umkhumbi loya eTarshish. Ngako wabhandala ngaloku linganako wabese ungena emkhumbini wahamba nabo kuya eTarshish, kudze nebukhona baSimakadze. ⁴ Kepha Simakadze watfumela umoya lomkhulu elwandle wase uba sidvungudvungu lesinemandla kulolwandle. Madvutane kwavela kutsi lomkhumbi utewephuka. ⁵ Ngako bagibeli bemkhumbi base bayesaba kakhulu nganyinye ndvodza yakhalela kunkulunkulwana wabo. Bajikijela imitfwalo lesindzako elwandle bazama kutsi angasindvwa. Kepha Jona waya endasi ekhatsi nekhatsi encenye yalomkhumbi, futsi alele lapho lobudze butfongo. ⁶ Ngako umholi wefika kuye watsi, ''Wentani ulala? Vuka! Bita nkulunkulwana wakho! Mhlawumbe nkulunkulwana wakho utasinaka phindze ngeke sishabalale.'' ⁷ Bonkhe batsi kulomunye nalomunye, ''Wota, sishaye inkatso, kute sitokwati kutsi ngubani imbangela yalobubi lobenteka kitsi.'' Ngako bayijika inkatso, lenkatso yawela ku Jona. ⁸ Ngako batsi ku Jona, ''Sicela usitjele ngubani imbangela yalobubi lobenteka kitsi. Yini sikhundla sakho, futsi uchamuka kuphi? Yini live lakho, nakubaphi bantfu lokibo? ⁹ Jona watsi kubo, ''Ngingu Mhebheru; phindze ngesaba Simakadze, Nkulunkulu welizulu, lowente lwandle nemhlaba lowomile.'' ¹⁰ Ngako lamadvodza etfuka kakhulu atsi ku Jona, ''Yini lena losoyentile?'' Ngoba lamadvodza bekati kutsi ubaleka ebukheni ba Simakadze, ngoba wabatjela. ¹¹ Ngako batsi ku Jona, ''Yini lesingayenta kuwe kuze lolwandle lutotsulela kitsi?'' Ngoba lolwandle luyachubeka luba neludlame. ¹² Jona watsi kubo, ''Ngitsatseni bese ningijika ekhatsi kwalelwandle. Ngako lelwandle litawunitsulela, ngoba ngiyati kutsi kungenca yami ngekutsi lesidvungudvungu lesikhulu senteke kini.'' ¹³ Noma kunjalo, lamadvodza atama kuwugwedla ngemandla kubuyela emhlabatsini, kepha abakhonanga ngoba lolwandle belichubeka luba neludlame limelane nabo. ¹⁴ Ngako ke bakhala kuSimakadze batsi, ''Siyakucenga, Simakadze, siyakucenga, ungasivumeli sibhubhe ngenca yemphilo yalendvodza, ungasibeki licala ngekufa kwakhe, ngobe wena, Simakadze, wenta ngekufuna kwakho.'' ¹⁵ Ngako bamphakamisa Jona bamjika ekhatsi elwandle, ngako lelwandle lwatsulela. ¹⁶ Ngako lamadvodza amesaba kakhulu Simakadze. Baletsa umhlatjelo ku Simakadze kanye benta tifungo. ¹⁷ Manje Simakadze walungisa inhlanti lekhulu kutsi imite Jona, Jona bekasesiswini salenhlanti emalanga lamatsatfu kanye nebusuku lobutsatfu.