¹ Wase Simakadze utsi ku Mosi, "Hamba ku Faro ufike umtjele kutsi, 'Simakadze utsi: Khulula lesive sami khona sitewukhona kungidvumisa. ² Nangabe ungabakhululi, ngitakujezisa ngekugcwalisa lonkhe live lakho ngeticoco. ³ Lomfula utawugcwala ticoco. Titawuphuma tiye ngekhatsi endlinin yakho, egumbini lakho lekulala, nasembhedzeni wakho. Titawuya etindlini tetisebenti takho. Titawuya kubantfu bakho, emahhavini, nasetitjeni takho tekuhlanganisa inhlama yekwenta sinkhwa. ⁴ Leticoco titawuhlasela wena, sive sakho, nato tonkhe tisebenti takho. ⁵ Simakadze wakhuluma ku Mosi watsi, " Tjela Aaron naku, 'Lulela sandla nendvuku yakho emifuleni, naseticojeni, nasetitibeni, wente leticoco tiphume kulamanti tigcwale lonkhe live lase Gibhithe. ⁶ Aron walulela sandla sakhe kulamanti ase Gibhithe, tase leticoco tiyaphuma tagcwala live lase Gibhithe. ⁷ Kodvwa nalaba bemilingo benta ngalokufanako ngemilingo yabo; leticoco batikhiphela kulo lonkhe live lase Gibhithe. ⁸ Wase Faro ubita Mosi na Aroni watsi kubo, "Thantazani ku Simakadze kutsi esuse leticoco kimi nakulesive sami. Ngitawubese ngiyabayekela bahambe, khona batowenta umhlatjelo kuye." ⁹ Mosi watsi ku Faro, "Ngiyakuniketa litfuba lekutsi ungitjele kutsi ngithantazele wena, netisebenti takho, nesive sakho, khona leticoco titawesuswa kuwe nasetindlini takho tiphindze tihlale emfuleni kuphela. ¹⁰ "Faro watsi, "Kusasa" Mosi watsi, "Akube njengoba usho, khona utowati kutsi kute lofanana naSimakadze, Nkulunkulu wetfu. ¹¹ Leticoco titawuhamba kuwe, nasetindlini takho, nakuletisebenti takho, kanye nasesiveni sakho. Titawuhlala kulomfula kuphela." ¹² Mosi na Aroni baphuma ku Faro. Wase Mosi ukhala kuSimakadze mayelana naleticoco latiletsa ku Faro. ¹³ Simakadze wenta njengobe Mosi abecelile: Leticoco tafa etindlini, etinkantolo, nasemasimini. ¹⁴ Lesive satibutsisa ndzawonye senta ticumbi, lendzawo yabese iba neliphunga. ¹⁵ Kodvwa watsi Faro nakabona kutsi sekuyendlula, wenta inhlitiyo yakhe yaba lukhuni waphindze wangabalaleli bo Mosi naAron, njengobe Simakadze abeshito vele kutsi utawenta njalo. ¹⁶ Simakadze watsi ku Mosi, "Tsani ku Aron, 'Yelula indvuku yakho ugadle lolutfuli lolusemhlabatsini, khona litawuba tilwanyakatana letincane kulo lonkhe live lase Gibhithe." ¹⁷ Benta njalo. Ngalesikhatsi Aron elula sandla sakhe nendvuku wagadla lolutfuli lwemhlabatsi, letilwanyakatana taya kubantfu netilwane. Lonkhe lolutfuli emhlabatsini lwaba tilwanyakatana kulo lonkhe live lase Gibhithe. ¹⁸ Laba bemilingo betama ngemilingo yabo kwenta tilwanyakatana, kodvwa abatange bakhone. Ngako ke kwaba netilwanyakatana kubantfu nasetilwaneni. ¹⁹ Base laba bemilingo batsi ku Faro, "Lena yingalo yaNkulunkulu." Kodvwa inhlitiyo ya Faro beyilukhuni, ngako ke wala kubalalela. Bekungalendlela Nkulunkulu bekatsite Faro vele utawenta ngayo. ²⁰ Simakadze watsi ku Mosi, "Vuka lokwa ngeluvivi ekuseni ume embikwa Faro nakaphuma aya emfuleni. Utsi kuye, 'Simakadze utsi: "Yekela bantfu bami bahambe khona batewati kungidvumisa. ²¹ Kodvwa uma ungabayekeli labantfu bami kutsi bahambe, ngitawutfumela libulo letimphungane kuwe, etisebentini takho, nakubantfu bakho, kanye nasetindlini takho. Tindlu temaGibhithe titawugcwala libulo letimphungane, futsi nalomhlaba labema kuwo utawugcwala timphungane. ²² Kodvwa ngalelo langa ngitasinakekela sifundza sase Gosheni ngalokwehlukile, lesifundza bantfu bami labahlala kuso, khona kutawuba bete emabulo etimphungane lapho. Loku kutakwenteka khona nitowati kutsi ngingu Simakadze losemkhatsisini walelive. ²³ Ngitawenta umehluko emkhatsini webantfu bami nebantfu bakho. Loluphawu lolu lwemandla ami lutawutsatsa indzawo kusasa." ²⁴ Simakadze wenta njalo, ase emabulo lamakhulu etimphungane ayongena endlini ya Faro nasetindlini tetisebenti takhe. Kuyo yonkhe indzawo yaseGibhithe, lendzawo beseyonakele ngenca yalamabulo etimphungane. ²⁵ Faro wabita Mosi na Aron wase utsi, "Hambani niyowenta umhlatjelo ku Nkulunkulu wenu lapha eveni letfu". ²⁶ Mosi watsi, "Akusiko kahle kutsi sente njalo, ngobe lemihlatjelo lesiyenta ku Simakadze Nkulunkulu wetfu iyintfo leyenyanyekako kuma Gibhithe. Nangabe senta emehlweni abo imihlatjelo leyenyanyekako kuwo , ngeke yini basigcobe ngematje? ²⁷ Cha, kuluhambo lwemalanga lamatsatfu kuya kulelihlane lekumele silutsatse, khona sitowenta umhlatjelo kuSimakadze Nkulunkulu wetfu, njengobe asitjelile." ²⁸ Faro watsi, "Ngitanivumela kutsi nihambe niyowenta umhlatjelo ku Simakadze Nkulunkulu wenu kulelihlane. Kuphela nje ningayi khashane kakhulu. Ningithantazele nami." ²⁹ Mosi watsi, "Masinyane nje nangisuka lakuwe, Ngitawuthantaza ku Nkulunkulu kutsi lamabulo etimphungane asuke kuwe wena, Faro, netisebenti takho kanye nebantfu bakho kusasa. Kodvwa akukameli kutsi usikhohlise futsi ngekutsi ungasiyekeli sive setfu kutsi sihambe siye siyowenta umhlatjelo ku Simakadze." ³⁰ Mosi wesuka ku Faro wathantaza ku Simakadze. ³¹ Simakadze wenta njengobe Mosi acelile; wase ususa lamabulo etimphungane kuFaro, netisebenti takhe, kanye nesive sakhe. Kute ngisho nakunye lokwasala. ³² Kodvwa Faro wenta inhlitiyo yakhe yaba lukhuni ngaleso skhatsi futsi, waphindze wangabayekeli labantfu kutsi bahambe.