¹ Nkulunkulu wakhuluma onkhe lamaga: ² NginguSimakadze Nkulunkulu wakho, lowakukhipha eveni laseGibhithe, ngaphandle kwendlu yetigcili. ³ Ungabi nalabanye boNkulunkulu ngaphandle kwami. ⁴ Ungatenteli intfo lebatiwe noma intfo lefana nanomangayini lokusetulu ezulwini, noma laphansi emhlabeni, noma ngaphasi kwemhlaba. ⁵ Ungabaguceli noma ubadvumise, ngoba mine, Simakadze Nkulunkulu wakho, nginguNkulunkulu lonemona. Ngijezisa bubi babokhokho ngekuletsa sijeziso etitukulwaneni, esitukulwaneni sesitsatfu nesesine salabo labangenyanyako. ⁶ Kepha ngikhombisa lutsandvo lolungapheli kulabangemakhulu alabo labangitsandzako futsi bagcine imiyalo yami. ⁷ Ningalitsatsi libito laSimakadze Nkulunkulu wenu, ngebudlabha, noma ngangubani losebentisa libito lami ngebudlabha utawuba nelicala. ⁸ Khumbulani lilanga leliSabatha, ngako ke ihlukaniseleni mine. ⁹ Nibosebenta nente imisebenti yenu emalanga lasitfupha. ¹⁰ Kepha lilanga lesikhombisa liSabatha laSimakadze Nkulunkulu wenu. Ngalo ningenti noma ngangumuphi umsebenti, wena, noma indvodzana yakho, noma indvodzakati yakho, noma sisebenti sakho lesidvuna, noma sisebenti sakho lesisikati, noma imfuyo yakho, noma lesihambi lesisemagcekeni akho. ¹¹ Ngoba Simakadze wakha emazulu emalanga lasitfupha kanye nemhlaba, lwandle, nako konkhe lokukuko, waphumula ngelilanga lesikhombisa. Ngako ke Simakadze wabusisa lilanga leSabatha walehlukanisa. ¹² Hlonipha uyise nenyoko, khona utewuphila sikhatsi lesidze eveni Simakadze Nkulunkulu wakho lakunika lona. ¹³ Ungabulali noma ngangubani. ¹⁴ Ungaphingi. ¹⁵ Ungebeli muntfu. ¹⁶ Ungawafakazeli emanga umelane namakhelwane wakho. ¹⁷ Ungahawukeli indlu yamakhelwane wakho; ungafuni umkamakhelwane wakho; sisebenti sakhe lesidvuna, sisebenti sakhe lesisikati, tinkhomo takhe, timbongolo, nanoma ngayini yamakhelwane wakho.'' ¹⁸ Bonkhe labantfu bakubona kudvuma nekumanyata, beva livi lelicilongo, babona nentsaba ibhunya. Nabakubona labantfu, besaba bema khashane. ¹⁹ Batsi kuMose, '' Khuluma natsi, sitakulalela; kepha ungavumeli Nkulunkulu kutsi akhulume natsi, noma sitakufa.'' ²⁰ Mose watsi kulabantfu, ''Ningesabi, ngoba Nkulunkulu utele kutenivivinya, khona kumhlonipheka kwakhe kube kini, futsi khona ningatokona.'' ²¹ Ngako ke abantfu bema khashane, Mose wasondzela kulobumnyama labekunaNkulunkulu khona. ²² Simakadze watsi kuMose, ''Loku ngulokumele utjele emaIsrayeli: 'Nine ngekwenu nibonile kutsi ngikhulume nani ngisezulwini. ²³ Angeke nitentele bonkulunkulwana ngaphandle kwami, bonkulunkulwana besiliva noma bonkulunkulwana begolide. ²⁴ Nibongakhela lilathi lasemhlabeni, futsi kumele nente umhlatjelo kulo umnikelo wenu loshisiwe, umnikelo wekuhlangana, timvu netinkhomo tenu. Kuyo yonkhe indzawo lengenta libito lami lihlonipheke, ngitakuta kini nginibusise. ²⁵ Naningentela lilathi lelitje, ningalakhi ngematje lacheketiwe, ngoba nanisebentisa emathulusi enu kulo, nitawube nilingcolisile. ²⁶ Ningenyukeli elathini lami ngetitebhisi, khona bungcunu benu bungatewubonakala.''