¹ Leti nguletintfo letimayelana na Israel le Amos, munye webelusi e Tekoa, atemukela ngekwembulela. Wemukela letintfo leti ngemalanga a Uzziah inkhosi yaka Judah, futsi nangemalanga a Jeroboam indvodzana ya Joash inkhosi yaka Israel, iminyaka lemibili kungakabi nekutamatama kwemhlaba. ² Watsi, ''Simakadze utawubhodla kusuka e Zion; utawenyusa livi lakhe kusuka e Jerusalem. Emadlelo ebelusi atawoma; sicongo se Carmel sitawubuna.'' ³ Loku ngulokushiwo ngu Simakadze: ''Ngoba tono letintsatfu te Damascus, nangaletine, ngingeke ngihlale ngingabajezisi, ngoba bashaye Gilead ngemathulusi ensimbi. ⁴ Ngitawulumeka indlu ya Hazael, futsi utawubhubhisa tincaba tase Ben Hadad. ⁵ Ngitawugamula titinsimbi teligede ngicoshe lendvodza lebusa esigodzini sase Aven, futsi nemuntfu lobamba indvuku yembusi e Beth Eden. Bantfu base Aram batokuya ekutfunjweni ku Kir,'' kusho Simakadze. ⁶ Loku ngulokushiwo ngu Simakadze: ''Ngoba tono letintsatfu te Gaza, noma nangaletine, ngingeke ngihlale ngingabajezisi, ngoba batsatsa batfumba bantfu labanyenti, kubanikela ku Edom. ⁷ Ngitawutfumela umlilo etindvongeni tase Gaza, futsi utawubhibhisa tincaba takhe. ⁸ Ngitawususa umuntfu lohlala e Ashdod nemuntfu lobamba indvuku yembusi wase Ashkelon. Ngitawucinisa sandla sami uma ngimelene ne Ekron, futsi lama Philisti lasele atobhubha,'' kusho Inkhosi Simakadze. ⁹ Loku ngulokushiwo ngu Simakadze: ''Ngoba tono letintsatfu tase Trye, noma nguletine, ngingeke ngihlale ngingabajezisi, ngoba sebanikele bantfu labanyenti ku Edom, futsi bephule sivumelwano sabo sekuba bobhuti. ¹⁰ Ngitawutfumela umlilo etindvongeni tase Tyre, futsi utawubhubhisa tincaba takhe. ¹¹ Loku ngulokushiwo ngu Simakadze, ''Ngoba tono letintsatfu tase Edom, noma nguletine, ngingeke ngihlale ngingabajezisi, ngoba ugijimise umnakabo ngenkemba futsi wangatjengisi sihawu. Intfukutselo yakhe yachubeka njalo, futsi lulaka lwakhe lachubeka ingunaphakadze. ¹² Ngitawutfumela umlilo etikwe Teman, futsi utawubhubhisa tigodlo tase Bozrah.'' ¹³ Loku ngulokushiwo ngu Simakadze, ''Ngoba tono letintsatfu talabantfu base Ammon, noma nguletine, ngingeke ngihlale ngingabajezisi, ngoba bahlephule bavula tisu tebesifazane labakhulelwe base Gilead, kute batokhulisa imincele yabo. ¹⁴ Ngitawulumeka umlilo etindvongeni tase Rabbah, futsi utawubhubhisa letigodlo, ngekumemeta ngelilanga lekulwa, nesivunguvungu ngelilanga lemoya lomkhulu kakhulu. ¹⁵ Inkhosi yabo itawukuya ekutfunjweni, yena kanye netiphatsi mandla takhe,'' kusho Simakadze.