¹ Hana wathandaza watsi, ''Inhlitiyo yami iyajabula kuSimakadze. Luphondvo lwami luyaphakanyisiwe kuSimakadze. Umlomo wami ucoloshela tikwe titsa tami, ngobe ngiyatfokota ensindzisweni yakho. ² Kute longcwele njengaSimakadze, ngobe kute lomunye ngaphandle kwakho; kute lidvwala lelinjenga Nkulunkulu wetfu. ³ Ungasacoloshi ngekutiphakamisa kakhulu; akubete kutiphakamisa lokuchamuka emlonyeni wakho. Ngobe Simakadze nguNkulunkulu welwati; ngaye tento tiyakalwa. ⁴ Lobutjoki bemadvodza lanemandla buphukile, kepha labo labatsambako ufaka emandla njengelibhande. ⁵ Labo labebasutsi baticasha bona ngenca yesinkhwa; labo labebalambile bema kulamba. Ngisho nalongatali ubeleka kasikhombisa, kepha lomfati lobekanebantfwana labanyenti uyandzindza. ⁶ Simakadze uyabulala futsi aletse emphilweni. Wehlisela phasi eShilo bese uvusa etulu. ⁷ Simakadze wenta labanye bantfu babemphofu bese labanye bacebe. Uyatfobisa, kepha futsi aphakamise. ⁸ Uphakamisela etulu labamphofu ngaphandle kwalolutfuli. Uphakamisa labadzingile emlotseni kutobenta kutsi bahlale netinkhosana futsi badle lesihlalo sebukhosi. Ngobe letinsika temhlaba taSimakadze futsi ubeke lomhlaba tikwawo. ⁹ Utawugadza letinyawo tebantfu bakhe labatsembekile, kepha lababi batawufakwa ekuthuleni ebumnyameni, ngobe kute lotoncoba ngetikhwepha takhe. ¹⁰ Labo labamelene naSimakadze batawwephuka babe tincetu; utawubadvumela amelane nabo kusukela ezulwini. Simakadze utawuhlulela emasentse alomhlaba; utawupha emandla inkhosi yakhe futsi aphakamise loluphondvo lalogcotjiwe wakhe.'' ¹¹ Wabese Elkhana uya kuRama, endlini yakhe. Lontfwana wamkhonta Simakadze ebukhoneni ba Eli umphristi ¹² Manje lamadvodzana a-Eli abemadvodza lakhohlakele. Bebangamati Simakadze. ¹³ Umhambo walabaphristi nalabantfu bewungukutsi uma indvodza nome nganguyiphi inikela umhlatjelo, lesisebenti sebaphristi sita siphetse imfologo lenematinyo lamatsatfuesandleni sakhe, lenyama uma isabila. ¹⁴ Abeyinamatselisa kulelipani, nome egedleleni, nome kugalaza, nome ebhodweni. Tonkhe letimfologo latiletsa etulu kumphristi abetitsatsela yena. Bakwenta loku eShilo naye wonkhe wase Israyeli labeta lapho. ¹⁵ Ngetulu kwaloko, ngaphambi bashise lamafutsa, letisebenti temphristi teta, bese batsi kulendvodza lebeyenta umhlatjelo, ''Letsa inyama kutowosela umphristi; ngobe angeke ayemukele inyama lebilisiwe lechamuka kuwe, kepha lengakaphekwa kuphela.'' ¹⁶ Uma lendvodza itsi kuye, ''Kumele bashise lamafutsa kucala, bese utsatsa njengebuningi lobufunako.'' Angabese utsi, ''Cha, manje utawunika mine; nawungafuni, ngitawuyitsatsa ngenkhani.'' ¹⁷ Lesono salamadvodza lawa lamancane sasisikhulu kakhulu phambi kwaSimakadze, ngobe bebawudzelela umnikelo waSimakadze. ¹⁸ Kepha Samuweli wamkhonta Simakadze njenge mntfwana logcokiswe ngelineni lecolisakele. ¹⁹ Make wakhe abementela intsambo lencane bese uyiletsa kuye kusukela ngemnyaka kuya ngemnyaka, uma enyukela etulu nemyeni wakhe kuyonikela lomhlatjelo wemnyaka. ²⁰ Eli abembusisa Elkhana nemkakhe futsi atsi, ''Shangatsi Simakadze angakunika bantfwana labanyenti ngalomfati lona ngenca yalesicelo lasenta yaSimakadze .'' Bese bangabuyela emakhayeni abo. ²¹ Simakadze wamsita futsi Hana, phindze futsi wakhulelwa. Wabeleka emadvodzana lamatsatfu nemadvodzakati lamabili. Ngaleso sikhatsi, lomtfwana Samuweli wakhula phambi kwaSimakadze. ²² Manje Eli abemdzala; wakuva konkhe emadvodzana akhe labebakwenta kuwo wonkhe Israyeli, futsi bebealala kanjani nalabafati labebakhonta ekungeneni kulelithende lekuhlangana. ²³ Watsi kubo, ''Nitentelani tintfo letinje? Ngobe ngiyeva ngaletento tenu letimbi kubo bonkhe labantfu laba.'' ²⁴ Cha, madvodzana ami; ngobe akusiwo umbiko lomuhle lengiwuvako. Nenta bantfu baSimakadze bangahloniphi. ²⁵ ''Uma indvodza yinye yona kulenye, Nkulunkulu utamhlulela; kepha uma indvodza yona kuSimakadze, ngubani lotamkhulumela?'' Kepha angeke balalele kuleleliphimbo lababe wabo, ngobe Simakadze abehlose kubabulala. ²⁶ Lomntfwana longu Samuweli wakhula, futsi wakhula emseni naSimakadze phindze futsi nebantfu. ²⁷ Manje inceku yaNkulunkulu yeta ku Eli yatsi kuye, ''Simakadze utsi, 'Angikativeti yini kulendlu yababe wakho ngesikhatsi base Gibhithe ekuboshweni kulendlu yaFaro? ²⁸ Ngamkhetsa kuto tonkhe letive ta Israyeli kutsi abe ngumphristi wami, kutsi enyukele etulu alathini lami, bese ushisa imphepho, kuyowenta loku lamyale kutsi akwente. Nganika kulendlu yababe wakho yonkhe leminikelo yalabantfu baka Israyeli bente nemlilo. ²⁹ Leni, bese, awusayihloniphi imihlatjelo yami lengayiphecelela kulendzawo lengihlala kuyo? Uwahloniphelani emadvodzana akho ngetulu kwami ngekutenta ukhuluphale ngayo yonkhe iminikelo lekhetsekile yebantfu bami Israyeli?'' ³⁰ Ngobe Simakadze, loNkulunkulu waka Israyeli, utsi, 'Ngatsembisa kutsi indlu yakho nalendlu yababe wakho kumele ihambe phambi kwami phakaze.' Kepha manje Simakadze utsi, 'Akube khashane nami kwenta loku, ngobe ngitawuhlonipha labo labangihloniphako, kepha labo labangililahlako ngitawubalahla nami. ³¹ Buka, emelanga ayeta uma ngitojuba emandla akho nalamandla endlu yababe wakho, khona kutoba bete nome ngabe ngubani indvodza indvodza lendzala endlini yakho. ³² Utawubona kukhatsateka kelendzawo lengiphila kuyo. Noko lokuhle kutawunikwa ku Israyeli, kutawuba bete nome ngubani indvdodza lendzala endlini yakho. ³³ Nome ngabe ngubani wenu lengingamjubi elathini lami, ngitawubanga emehlo akho ehluleke, futsi ngitawubanga umona enhlitiyweni yakho, bese ngamunye wetitukulwane takho batawufa. ³⁴ Loku kutawuba luphawu lwakho lolutawuta tikwemadvodzana akho, tikwa Hofni na Pinehasi: Batwufa bobabili ngelilanga linye. ³⁵ Ngitawutivusela umphristi lotsembekile lotawenta lokusenhlitiyweni yami namphefumulweni wami. Ngitawumakhela indlu lecinisile; futsi utawuhamba phambi kwenkhosi yami legcotjiwe phakadze. ³⁶ Wonkhe losele endlini yakho utawuta aguce phasi kuye, acela lucetu lwesiliva nesinkhwa lesiphelele, bese utawutsi, ''Ngicela ungibeke kutinye tikhundla tebaphristi khona ngingadla lucetu lwesinkhwa.''