¹ Che yo inako, Heroda munyandisi a zuwa za kavuvo ka Jesu. ² Ni chawamba ku vahikana vakwe, cha ti, "U zu nji Joani Mukolovezi, a vakavuki kuvafwile. Ni hakuva vulyo aa maata a chikwete kuseveza kwali." ³ Chokuti Heroda a vakwete Joani, ni ku musumina, ni kumuvika muitolongo chevaka lya Herodiasi, muihabwe wa Filipi mwanche wakwe. ⁴ Chokuti Joani a vati kwali, "Kahena mulao kuti u ve naye nali mwihenu." ⁵ Heroda ava kuswanela kumwihaya, kono a vatiyi vantu, chokuti va va kumuhinda kuti mupolofita. ⁶ Kono izuva lya kupepwa kwa Heroda halisika, mwana wa Hedodiasi wa mukazana ava zani mukati mi chatavisa Heroda. ⁷ Chakutava, cha sepisa cha kukonka kumuha chonse chete akumbile. ⁸ Hamana kuhewa mulao kuvanyina, chati, " U nihe hahanu, mukasuva, mutwi wa Joani Mukolovezi.". ⁹ Simwine ni cha filikanywa hahulu chekupo yakwe, kono che vaka lya kukonka, ni chalivaka lya vo vavakulya naye, ni cha laula kuti kutendahale vulyo. ¹⁰ A ba tumini ni ku kakosala Joani mwintolongo. ¹¹ Mi mutwi wakwe wa letwa mukasuva ni kuhewa ku mukazana mi cha utwalila va nyina. ¹² Valutwana va kwe ni chivakeza, ni kuhinda chitupu, ni ku chizika. Ha vamana kuchita ezo, chi va yenda ku ka wambila Jesu. ¹³ Hohwaho Jesu ha zuwa izo, a zwa muchivake echo ni chisepe ku ya kuchivaka chilikawile. Inyangela ha i zizuwa, chiya mwichilila chamatende kuzwa mwitolopo. ¹⁴ Linu Jesu chakeza kubusu bwabo mi ni chabona inyangela. Cha vafwila mañeke ni ku hoza vakuli va vo. ¹⁵ Chiminemine chezuba ha chisika, valutiwa vakwe chi bekeza kwali chibati, "Chinu chibaka kachina vantu, mi izuva chilyemina. Hasanye inyangela, ilikuti bayende muminzi ni kukaliwulila zilyo." ¹⁶ Kono Jesu chawamba kuvali, "Kavena intuso ya kuya kule. Inwe muvahe chimwi chakulya." ¹⁷ Chivati, "Twina hanu zinkwa bulyo zi kwanisa iyanza ni nswi zovele." ¹⁸ Jesu chati, "Muzilete kwangu." ¹⁹ Cwale Jesu a laula inyangela kuikala halyani. Chahinda zinkwa zi kwanisa iyanza ni nswi zovele. Na lolete kwiulu, chatoholofaza ni kucholola zinkwa ni kuziha valutwana. Valutwana chi vaziha inyangela. ²⁰ Vavali ni kuikuta. Linu chibahinda vungululwa -vuvezuli zitanda zi na ikumi ni zobele. ²¹ Vonse va valyi, va va kusaka kusika kuvakwame va zikiti zi zikwanisa iiyanza, kuzwisa vanakazi ni vahwile. ²² Hohwaho vulyo chawambila valutwana vakwe kukwela muchisepe balitangize kwali kwimwi mbali, mikuti iye mwine ha situmina inyangela kule. ²³ Ha mana kuboza bungi bwabantu, chayenda heulu lyelundu yenke kukalapela. Linu chitengu ha chikolela a bena uko yenke. ²⁴ Kono chisepe icho chi chivena hakati kewate, chi chivakupala kuyendiswa chevaka la mandinda, chokuti luhuho lu va kuchikanisa. ²⁵ Mwinako ya bune ya masiku Jesu cha chuutila kubali, na yenda hewate. ²⁶ Valutwana ha va muvona na yenda hewate, va vatiyi hahulu, ni chi bati, " Isaku," mi chi vahuwa hahulu chakutiya. ²⁷ Kono Jesu cha wamba kuvali haho ni chati, "Mukole! Njeme! Kanji mutiyi." ²⁸ Pitorosi cha mwitava chati, " Simwine, haiva nje we, ni laele ni niize kwako hamenzi. ²⁹ Jesu chati, "Wize." Cwale Pitorosi cha suka muchisepe ni kuyenda ha menzi kuya kwa Jesu. ³⁰ Kono Pitorosi ha vona luhuho, chatiya. Hakalisa bulyo kumina, cha huwa ahulu chati, "Simwine, nihaze!" ³¹ Jesu haho vulyo cha otolola iyanza lyakwe, cha kwata Pitorosi, mi ni chamulwila kuti, "Iwe we ntumelo inini, chinzi hohonona?" ³² Linu cwale Jesu ni Pitorosi chiba yenda muchisepe, luhuho chilwa siya kuhunga. ³³ Cwale valutwana muchisepe chiva lapela Jesu chibati, "Cheniti u Mwana Mulimu ." ³⁴ v 34 Ha chiva lutite, chi venjila munkanda ya Genezareta. ³⁵ Linu vantu mwechina chibaka chivalemuha Jesu, chivatumina mañusa monse muzivaka zimbulukite chilalanda, mi chivamuletela vonse vavakulwala. ³⁶ Chibamukumbila kuti vakwate vulyo kumungundo we chizwato chakwe, mi vungi vu vakwati kwateni chibwahola.