¹ Mi Abrame ha bena myika, ipanga makumi a pang iyanza ni myika ipanga yone, Ileza cha libonahaza kwa Abrame mi chati kwali, ''Njime Ileza siziho zonse. Yende habusu bwangu, mi kanji u nyesehi. ² Imi kani koze bulikani mukati kangu na we, mi kani kwi njise kuhitiliza.'' ³ Abrame aba sungami na lolela hansi. Ileza cha wamba nae, nati,'' ⁴ Sina kangu, mubone, bulikani bwa ngu bunina nawe. Ko be wisi we zisi zingi. ⁵ Izina lyako keti ibe Abrame, kono izina lyako kalibe Abrahama kakuti-Ni kuketa ni kuba isi wa zisi zingi. ⁶ Kani kwi njise kabaana bangi ahulu, imi kani pange zisi kako, mi basimwine kaba zwe kwako. ⁷ Kani pange bulikani bwa ngu mukati kangu nawe ni behwa bako, ka masika abo ka bulikani busamani. Kuba Ileza kwako ni behwa bako ni behwa ba behwa bako. ⁸ Kani he kwako, ni kubehwa bako kuzwa hako, inkanda umo mobali kuhali, inkanda yonse ya Kanana, kuba chifumu chisa mani, imi kanibe Ileza wabo.'' ⁹ Linu Ileza chati kwa Abrahama, ''sina kwako, u swanezi kukoza bulikani bwangu, iwe ni behwa bako kuzwa hako kamasika abo a chi kaza. ¹⁰ Ubu nji bulikani bwangu bumu swanezi kumamela, mukati kangu nawe ni behwa bako kuzwa hako: Mukwame yense wina mukati kenu u swanezi ku pangiwa mupato. ¹¹ U swanezi kupangiwa mupato mu nyama yako ye kabi lya bukwame bwako, imi ichi ka chibe nji chi supo cha bulikani mukati kangu nawe. ¹² Mukwame yense mukati kenu wa mazuba amana ni mazuba otatwe ni swanezi kupangwa mupato mu mahasi. A bantu bonse bako. Ichi chihindilila uzo yete a zalilwe muzuho yako nozo yete a wulwe ni mali kwi bbukwenda, isali zumwi wabehwa bako. ¹³ U zo yo zalwa munzubo yako nozo yo ulitwa ni mali a ko u swanezi ku pangiwa mupato. Linu bulikani bwangu ka bube munyama yaka kuba bulikani busamani. ¹⁴ Mukwame yense yasa pangitwe mupato munyama ye kabi lya bukwame bwakwe kazwiswe mukati ka bantu bakwe. Mi wa cholo bulikani bwangu.'' ¹⁵ Ileza chati kwa Abrahama, Sina ka Sarai mwihyenu, kanji u musumpisi Sarai kuzwa hanu. Kono, izina lya kwe kalibe Sara. ¹⁶ Kani mufuyole, imi kani kuhe muswisu kakwe. Kani mufuyole, imi kabe inyima wa zisi. Masimwine a bantu kabazwe kwali.'' ¹⁷ Imi Abrahama cha sumanga ku lolela hansi, ni kuseka, imi cati mu nkulo ya kwe, ''Muhwile kana u wola ku zalwa ku mukwame u chiwina myika yi panga mwanda? Kakube buti Sara wina myika ya makumi amana iyanza ni makumi one ni kumi, kuti a zale muswisu? ¹⁸ Abrahama chati kwe Leza, ili kuti Ishimaele a wole kuhala habusu bwako!'' ¹⁹ Ileza nati, nanta, kono Sara mwihyenu ka ku zalile muswisu, imi uswanizi ku mubeka Isaka. Kani pange bulikani naye kuba bulikani busa mani ni behwe ba behwe bakwe kuzwa kwa kwe. ²⁰ Sina ka Ishimaele naku zuwa. Bone, kani mufuyole imi kani muhe luhasi lungi ahulu-hulu. Kabe isi we nabi zi pange ikumi ni nabi zobele, imi kani mupange kuba chisi cha kulu. ²¹ Kono bulikani bwangu kani bu pange ni Isaka, uzo Sara yete na kuzalile mwi yinu inako mu mwaka wiza.'' ²² Linu ha cha mana ku wamba naye, Ileza naya kwi wulu kusiya Abrahama. ²³ Linu Abrahama cha hinda Ishimaele mwanakwe, ni bamwi bonse baba zalilwa munzubo yakwe, nabo bonse baba wuliwa ka mali akwe, mukwame yense mukati ka bakwame be nzubo ya Abrahama, ni cha panga mupato mwi nyama yakwe ye kabi ya bukwame bwake mwi zuba liswana, mwaba muwambili Ileza. ²⁴ Abrahama a bali wa myika ya makumi amana iyanza ni makumi one ni myika imana iyanza ni myika yone ha pangiwa mupato munyama ye kabi ya bukwame bwakwe. ²⁵ Ishimaele mwanakwe abena myika ipanga ikumi ni myika yotatwe ha pangiwa mupato munyama ye kabi lya bukwame bwake. ²⁶ Mwi zuba loynke liswana Abrahama ni Ishimaele baba pangiwa mupato. ²⁷ Bakwame bonse be nzubo yakwe baba pangiwa mupato naye, kubika bonse baba zalwa munzubo nabo baba wuliwa ka mail ku zwa ku bbukwenda.