¹ Luzubo lwa bana ba Nuwe, bali nji Sema, Kama, ni Jefeta, babana swisu baba zwalwa muunda a hwa. ² Bana ba Jefeta ba bana kwame bali nji Gomere, Magogo, Madai, Javani, Tubali, Mesheki ni Tirasi. ³ Bana ba Gomere ba bana swisu bali nji Ashikenazi, Rifati, ni Togarema. ⁴ Bana ba Javani ba bana kwame bali nji Elisha, Tereshishi, Kitimi, ni Dodanimi. ⁵ Kubali aba bantu ba kumukulo we wate baba kauhanywa imi ni baya mwibu lyabo, umwi ni umwi ni mushobo wakwe, kuya cha mahasi, cha ku kwi chilila masi abo. ⁶ Bana ba Kama ba bana swisu bali nji Kushi, Miziraimi, Puti, ni Kanana. ⁷ Bana ba Kushi ba bana swisu bali nji Seba, Havila, Sabita, Raama, ni Sabiteka. Bana ba Raama ba bana kwame bali nji Sheba, ni Dedani. ⁸ Kushi naba isi wa Nimirodi, yabali we ntanzi ku koma bantu hansi. ⁹ Ali mubwimi yokolete mu menso e Leeza. Cho bulyo kuwambiwa kuti, ''Cha kuswana ni Nimirodi mubwimi yo kolete mu menso e Leza.'' ¹⁰ Zibaka zintanzi za baku yenza zali nji Babilona, Ururuki, Akadi, ni Kaline, mwibu lya Shinari. ¹¹ Hakuula mweyo inkanda naya mwa Siria ni ku kazaka munzi wa Ninive, Rehoboto, ni Kala, ni Reseni, uba kuwanika mukati ka Ninive, ¹² ni Kala, ubali munzi mukando wa Chisi. Wali munzi mukando. ¹³ Miziraimi na zala bantu ba Maludini, Maanamimi, Malehabimi, Manafutuhimi, ¹⁴ Maputurusimi, Makafitorimi, ni Makasuluhimi, (hazwa Mafilisita), ni Makafutorimi. ¹⁵ Kanana na zwala Sidoni, mwana wa mwanakwame wintanzi ni Heti, ¹⁶ ku hindilila Majebusi, Maamori, Magiregashi, ¹⁷ Mahivi, Maariki, Masini, ¹⁸ Maarevadi, Masemari, ni Mahamati. Kuzwa aho luzubo wa Kanana ni lwa hasana. ¹⁹ Inyinza ya Kanana iba kutangila mw Sidoni, kuya kwa Gereri, mane kukasika kwa Gaza, ni muntu choya mwa Sodoma, Gomorah, Adima, ni Zeboyini mane ku ka sika Lasha. ²⁰ Abali bana ba Kama ba bana kwame, cha mahasi abo ni ndimi zabo, mwibu lyabo, ni masi abo. ²¹ Sema hape abazale bana ba bana kwame, mukulwe wa Jafeti. Sema abali mukulu mutanzi yo simulula bantu bonse ba Habire. ²² Bana ba Sema ba bana swisu bali nji Elami, Ashuri, Aripakasadi, Ludi ni Arami. Bana ba bana kwame ba Arami ²³ bali nji Uzi, Huli, Geteli, ni Masha. ²⁴ Aripakasedi ababi isi wa Shela, imi Shela naba isi wa Hevere. ²⁵ Hevere abena bana bobele baba bana kwame. Umwi a ba kusumpwa Pelegi, kakuli mumazuba akwe, inkanda ziba kauhenwe, izina lya mwanche abali nji Joketami. ²⁶ Joketami aba be isi wa Alimodadi, Shelefe, Hazaramaveti, Jera, ²⁷ Hadorami, Uzali, Dikali, ²⁸ Obali, Abimaele, Sheba, ²⁹ Ofire, Havilani, ni Jobabi. Aba bonse bali bana ba Jokotani ba bana kwame. ³⁰ Chilalanda chibo chi bakuzwa kwa Mesha, mane kukasika kwa Sifa ilundu lya mubuzwe bwezuba. ³¹ Aba bali bana ba Sema ba bana kwame kuya chamasi, ni ndimi zabo, mwibu lyabo kuya cha nkanda zabo. ³² Aba bali mahasi a Nuwe bana ba bana kwame, kuya mubali chililila, mwinkanda yabo. Kuzwa kubali abo ni ba kauhana ni kuya hansi muunda hahwa.