¹ Linu Ileza chati kwa Mushe, " Hanu mobone chete nitende kwa Faro. Mo bone ichi, mwa basiye bayende che baka lya kukola kwe yanza lyangu. Chebaka lya kukola kwe yanza lyangu, mwa bazwise mwi nkanda yakwe." ² Ileza aba wambi kwa Mushe imi abati kwali, " Njime Yahweh. ³ Nibali bonahazi kwa Abrahama, kwa Isaka, ni kwa Jakobo kuba Ileza mukando; kono che zina lyangu, Yahweh, Kana nibe zibehele kubali. ⁴ Chobulyo niba tangisi kubumba chilikani nabo, ili kuti nibahe inkanda ya kanana, inkanda ya buyenzi bwabo. ⁵ Chobulyo niba zuwi kuliloka kwa bantu ba Isilaele abo ma Egepita baba basandwile ba hikana, imi nina tanga kuzeza chilikani changu. ⁶ Lyahanu, wambe kubantu ba Isilaele,' Njime Yahweh. Muni mizwise mwikonde lya misebezi mikukutu ya Egepita, imi kani milukulule mumata abo. Muni mituse chamata ete abonahale, nike nkatulo ikolete. ⁷ Kani mihinde ime nimwine kuba bantu bangu, imi kanibe njime Ileza wenu. Kamwizibe kuti njime Yahweh Ileza wenu, Yabaka mizwisi mwikonde lya misebezi mikukutu ya Egepita. ⁸ Kani mitwale mwi nkanda iniba konkisi kuha kwa Abrahama, kwa Isaka nikwa Jakobo. Kanimihe ibe chanda chenu. Njime Yahweh." ⁹ Mushe haka wambila izi kubantu ba Isilaele, kana babali kumuteka kakuli chibaba zwafite kebaka lya buhikana bubali bukando ahulu. ¹⁰ Linu Yahweh cha wamba kwa Mushe, nati, ¹¹ "Yende kawambile Faro, mulena wa Egepita, a siye bantu ba Isilaele bayende bazwe munkanda yakwe. " ¹² Mushe chati kwa Yahweh, " haiba bantu ba Isilaele kana baba teki kwangu, chinzi Faro hete ateke kwangu, mbwinga kaniwambi hande ?" ¹³ Yahweh aba wambi kwa Mushe ni kwa Aaroni. A babahi intaelo ya bana ba Isilaele kwa Faro, mulena wa Egepita, kuzwisa bantu ba Isilaele mwi nkanda ya Egepita. ¹⁴ Aba ibali nji mitwi ya mahasi abe shabo: Banakwame ba Rubeni, mwana wentazi wa Isilaele: ibali Hanoki, Palu, ni Hezeroni, ni Kami. Aba babali njiba luzubo lwa Rubeni. ¹⁵ Banakwame ba Simoni ibali Jemuele, Jamini, Ohadi, Jaki'ni, Zohare ni Saule -yaba zalwa mwanakazi wamu kanana. Aba ibali njiba luzubo lwa Simoni. ¹⁶ ?Aha njihena mazina abana ba Livi ba banakwame, kuya kacha mahasi abo. Kubena Gerishoni, Kohati, ni Merari. Levi abahali zilimo zina 137. ¹⁷ Bana ba banakwame ba Gerisoni ibali nji Libini ni Shimei, kuya cha luzubo lwabo. ¹⁸ Bana ba banakwame ba Kohati ibali nji Amirami, Izihari, Hebironi ni Uziel. Kohati aba hali zilimo zina 133. ¹⁹ Bana ba banakwame ba Merari ibali nji Mahali ni Mushi. aba njibababi luzubo lwa ma Levi, hamwina ni mahasi abo. ²⁰ Amirami aba sesete Jokebedi, nchizye ubesi. Cha mupepela Aaroni ni Mushe. Amirami aba hali zilimo zina 137 cha fwa. ²¹ Bana ba banakwame ba Izihari ibali nji Kora, Nefegi, ni Zikiri. ²² Bana ba banakwame ba Uziele ibali nji Mishaele, ni Sitiri. ²³ Aaroni cha sesa Elisheba, mwana wa mwanakazana wa Aminadabi, nchizye wa Nashoni. Cha mupepela Nadabi ni Abihu, Eliazare ni Itamare. ²⁴ Bana banakwame ba Korahi ibali nji Asiri, Alikana, ni Abiasafi. Aba babali nji baluzubo lwa Korahiti. ²⁵ Eliazare, mwana wa Aaroni wa mwanaswisu, nasesa umwina kubanakazana ba Putiele. Chamu pepela Finehasi. Ulu njlusika lwa mitwi yaluzubo lwa maLevi, kuya cha luzubo lwabo. ²⁶ Aba bakwame bobele ibali nji Aaroni ni Mushe kwaba wambi Yahweh nati, "Muka zwise bantu ba Isilaele mwinkanda ya Egepita, cha zikwata zabo." ²⁷ Aaroni ni Mushe ni ba wamba kwa Faro, simwine wa Egepita, kuti a zuminine bantu ba Isilaele kuzwa mwa Egepita. Aba ibali bantu baswana ba Mushe ni Aaroni. ²⁸ Ileza haba kuwamba kwa Mushe mwi nkanda ya Egepita, ²⁹ abati kwali," Njime Yahweh. Kawambile Faro, simwine wa Egepita, zonse zete niku wambile." ³⁰ Kono Mushe chati kwa Yahweh," Ime kanizi hande kuwamba, cwale Faro mwaka teke bule kwangu?"