¹ Lyahanu mukwame wo mushobo wa mu Levi yo sesete mwanakazi wa mu Levi. ² Mwanakazi naba hamenzi mahya imi na hwizumuka mwana swisu. Ha bona kuti abali mwana swisu mulotu, Naka muungula myezi yo tatwe. ³ Kono hati kaciwoli kumu ungula, na hinda chitanda che nkama ni kuchi sinka che bitumeni ni chabulota. Linu cha bika muhwile muchili imi niku chitula mukati kempe neli mu menzi kumbali ya lwizi. ⁴ Mukulwe wa mwanakazana na zimana butabule kuti abone chete chi chitahale kwali. ⁵ Mwana wa Faro wa mwanakazana na shetumukela ku lwize kuka samba linu ba mutokomela ni bakwete ku yenda yenda kumbali ni lwizi. Na bona chitanda mukati ke mpe imi na tuma yaba kumutokomela kuchi hinda. ⁶ Ha chi yalula, cha bona muhwile. muchiche abali kulila. Nicha mufwila inse imi chati, " Uzu chakusakusima nji zumwi wabana bama Heberu." ⁷ Linu nchizye wa muchiche wo mwanakazana chati kumwanakazana wa Faro , " Niwola kuyenda nika kulolele mwanakazi wamu Heberu zaku lelele uzu muhwile?" ⁸ mwana wa faro mwanakazana chati kwali," Yende." Cwale mukazana nayenda nikukahinda banyina muhwile. ⁹ Mwana wa Faro chati kubanyina mbumbu, " U hinde uzu muhwile umuni lelele, imi kanikuku liha mali." Cwale mwanakazi nahinda muhwile imi naka mulela. ¹⁰ Lyahanu muhwile hakula, naka muleta ku mwana wa Faro, imi neza kuba mwanakwe wa mwana swisu. Na muulika izina lya Mushe imi chati," Kakuli nibaka mwi nikuli mumenzi." ¹¹ Lyahanu Mushe hezakuba mukulwana, neza kuya kubantu bakwe nikuka bona misebezi yabo mikukutu. Nabona mu Egepita na kaba mu Heberu, imwi wa bantu bakwe. ¹² Na lola uku no kuna, imi habona kuti kakwina zumwi kwateni,che haya mu Egepita imi napata mubili mwi sekeseke. ¹³ A bazwili hanze izuba lichilila hazwila hanze, imi , halola, ba kwame bobele bama Heberu babali kulwa. Chati kuzumwi yabena mulandu, " chinzi holwisa mukwako?" ¹⁴ Kono mukwame chati," njeni wakubika habuyendisi ni habubusi hewulu lyetu? U kwete kuzeza kunihaya mobe haili zuna mu Egepita?" Linu Mushe cha suha ahulu imi chati, " chintu chiniba tendi chibezibahali ku bamwi." ¹⁵ Linu cwale Faro hazuwa cheyo indaba, cha lika kuti e haye Mushe. Kono Mushe aba tii kuzwa kwa Faro niku kekala munkanda ya midiani. Chake kala hansi he mbali ni cisima. ¹⁶ Lyahanu muprisita wa Midiani abena bana kazana ba kwana iyanza ni bobele. Chibeza, kuteka menzi, babezuzi zihindilo zabo kuti baka nywise mitapi ye shabo. ¹⁷ Ba lisani baba kezi imi babaliki kuba hindika, kono Mushe chayenda imi chakabatusa. ¹⁸ Lyahanu ba kazana habaya kwa Reuele ishabo, chati, " chinzi sunu hamwaka hwela ahulu kubola ?" ¹⁹ Babati," Mu Egepita nja katulamulela kuba lisani. Wa tutekela menzi ni ku nyisa mitapi yetu." ²⁰ Chati kubanakazana bakwe, " Cwale wina hi? cinzi hamwa musiya? mumusumpe njikuti zalye naswe." ²¹ Mushe nazumina kwikala ni mukwame, uzo yabamuhi mwanakwe wa mwanakazana yonsumpwa Zippora kuti asese. ²² Cha hwizumuka mwana swisu, imi Mushe camusumpa Gershomi;" Ni muzaki mwi nkanda ya bantu." ²³ Inakoko inde haimana, mulena wa Egepita cha fwa. Bantu ba Isilaele niba liloka kebaka la kulyatililwa ni kunyandiswa. Baba lili kusaka intuso, imi chililo chabo nichaya kwa Ileza cebakalya manyando. ²⁴ Linu Ileza hazuwa chililo chabo, Ileza cha zeza chilikani chaba tendi ni Abrahama,ni Isaka imi ni Jakobo. ²⁵ Ileza chabona bantu ba Isilaele, imi cha zuwisisa bwikalo bwabo.