¹ Bantu ba Maisilaele bonse ni bazwa mwi nkanda ya Sini, kwi chilila intaelo ya Yahwe. Ni baka tibelela mwa Refidimi, linu kana kubena menzi abantu a kunywa. ² Chobulyo bantu ni ba nyansa Mushe cha bwi kalo bubabena kubuli ni bati," Tuhe menzi tunywe."Mushe a bati, " Chinzi hamu tenda inkani name? Chinzi hamulika Yahwe?" ³ Bantu baba fwile ahulu inyotwa, imi niba nyansa Mushe. Nibati," Uba katuzwisikizi nzi mwa Egepita? Kwiza ku twi haya ni bana betu ni zi munantu zetu che nyotwa?" ⁴ Linu Mushe aba tumushi chililo kwa Yahwe," Chinzi chiniwola kutenda kwaba bantu? Ba chibasaka kuni pwachola." ⁵ Yahwe chati kwa Mushe," Yende habusu bwa bantu, imi uhinde ba kulwana bamwi kuma Isilaele. U hinde ni nkoli yo ba kabisi ha lwizi, imi u yende. ⁶ Muni kazimane habusu bwako he bwe lya Horebe, imi mo kabe ibwe. Mukuzwe menzi kulili bantu banywe." Mushe na tenda bulyo mumenso aba kulwana ba Isilaele. ⁷ Cha sumpa sumpa icho chibaka Masa ni Meribe che baka la kunyansa kwa ma Isilaele, Imi imi kakuti baba liki Ileza chakuti, " Kana Yahwe kena mukati ketu nandi kakwina?" ⁸ Linu indwalume za bantu ba ma Ameleke ni beza kulwisa Isilaele ha Refidini. ⁹ Chobulyo Mushe chati kwa Joshuwa, " Usale bamwi ba kwame imi uyende. Kalwe ni Ameleke. Izona munizimane ha lundumene ni nkoli ya Ileza mwi yanza lyangu." ¹⁰ Cho bulyo Joshuwa cha lwisa Ameleke kuya kuya che ke ntayelo ya Mushe, imi Mushe, Aaroni ni Huri baba tanti kuya hewulu lya chilundu. ¹¹ Imi Mushe habali kunyamuna iyanza lyakwe mwi wulu, Isilaele njabali ku wina inkondo; ¹² Linu mayanza a Mushe ha lilema , Ameleke njo wina inkondo. Linu mayanza a Mushe ha lilema, Aaroni ni Huri chiba hinda ibwe ni kumubikila kunsi kuti ekale hateni, che nako iswana, Aaroni ni Huri niba kwete mayanza akwe mwi wulu, zumwi kwimbali yakwe imwi, imi zumwi naye kuimwi imbali. Linu mayanza a Mushe aba kwete cha kukola mane konji izuba hali ke mina. ¹³ Cho bulyo Joshuwa na zunda bantu ba Ameleke cha mulinga. ¹⁴ Yahwe chati kwa Mushe, " U 'nole zinu mwi mbuka imi uzibalile mumatwi a Joshuwa, kakuti kani manise Amaleke ni za zezwa chazo mwi konde lye zuba." ¹⁵ Linu Mushe na zaka I alutare imi cha isumpa kuti" Yahwe nji ndembela yangu." ¹⁶ Chati, " kakuti iyanza liba nyamwinwa ha chipula cha Yahwe- nji kuta kuti inkondo ya Yahwe kwa Ameleke kaibe ya kuzwa kumasika kuya kuma sika asi keza."