¹ Yahwe ni chati kwa Mushe ni Aaroni munkanda ya Egepita. Ni chati, ² Kwenu, wunu mwezi mobe nji matangilo a myezi, mwezi we ntanzi muchilimo kwenu. ³ Wambile inkopano ya Isilaele, Mwi zuba lya bukumi lo unu mwezi baswanela zumwi ni zumwi alihindile imbelelezana kamba impenezana, luhasi ni luhasi lupange bulyo, imbelelezana mwi nzubo ni nzubo. ⁴ Haiba baseyo nzubo bache ahulu ku mbelelezana, muntu niya bambene naye mulyango ba wola kuhinda inyama ye mbelelezana kapa ye mpenezana iwola kuba yingi che nombolo ya bantu. I swanela kuba yingi zumwi ni zumwi a lye, nji kuti baswanela kuhinda inyama ingi iwola kubalela bonse. ⁵ Imbelelezana yenu kamba impenezana yenu kanji i nyansehi, imbelelezana ya mukwame ya mwaka u mwina. Muwola kuhinda imbelelezana yonke kamba impenezana. ⁶ Muswanela kuibika ku kasika mwi zuba lya bukumi ni wone lyowo mwezi. Linu inkopano yonse ya Isilaele i wola kwi haya izo zimunantu inako ya lundundwani. ⁷ Muswanela kuhinda amwi malaha niku abika ku mambali obele a misumo ya milyango ni heulu lya mapulanga a ziyazo za mazubo umo mwete mulyile inyama. ⁸ Muswanela kulya inyama masiku ao, ha mumana kwi jicha ha mulilo. Mwilye ni chinkwa chi ba bumbwa ne kusena mulungo, hamwina ni chisihu chilula. ⁹ Kanji mwilyi,bubisi kamba kwibilisa mumenzi, kono mwi jiche ha mulilo ha mwina ni mutwi wayo, matende ni zilama za mwibumo. ¹⁰ Kanji musiyi imwi yayo kukasika kakusasana. Muswanela kuhisa chonse chete chi shale kakusasana. ¹¹ U wu nji mukwa wo muswanela kwilya kao ni ntunga zenu ne zisuminwe, insangu zenu nezina kumatende enu, imi inkoli zenu mumayanza enu. Muswanela kwilya cha kuhwela. Nji mpaseka ya Yahwe. ¹² Yahwe u wamba kuti: " Kani yende mukati ke nkanda ya Egepita masiku ao ni kulwisa bonse bana bentazi ba bantu ni chimunantu mu nkanda ya Egepita. Kani lete inkoto ku mizimu yonse ya Egepita. Njime Yahwe. ¹³ Malaha mwa be nji chi supo ha mazubo enu kwa kwiza kwangu kwenu. China bona malaha, kani mihitilile a china kalwisa inkanda ya Egepita. I yi inkoto kete ize henu ni ku misinya. ¹⁴ Ili zuba kalibe izuba lye nkupuzo kwenu, le muswanela kumamela kuba mukiti wa Yahwe; kutwala mu masika enu ,mulao wo muswanela kubika kuba mukiti u sa mani. ¹⁵ Kamulye chinkwa chisena mulungo mukati ka mazuba akwanisa iyanza ni wobele. Mwi zuba lya matangilo ka muzwise mulungo mu mazubo enu. Iye yete alye chinkwa china mulungo kutanga mwizuba lya matangilo kutwala kwi zuba limana iyanza ni wobele, Uzo muntu uswanela ku zwiswa mwa Isilaele. ¹⁶ Mwi zuba lya matangilo mokube ni nkopano yi bikwilwe kumbali kwangu, imi ni mumazuba akwanisa iyanza ni wobele mo kube hape ni yimwiinkunga liswana nalyo. ka kwina mutendo wote neutendwe muma zuba ao, ilibulyo kwihikilwa zumwi ni zumwi cheta lye. U wo kaube nji mutendo bulyo uswanelwa kutendwa kwenu. ¹⁷ Muswanela ku mamela mukiti uwo wa zinkwa zi sena mulungo mukiti nji lyona izuba liniba zwisi impi zenu munkanda ya Egepita. Chobulyo muswanela ku mamela ili zuba na bantu benu bonse kubaha mulao usamani. ¹⁸ Muswanelakulya chinkwa chisena mulungo kutangila chenako ya lundundwani mwi zuba lya bukumi ni wone mumwezi wa mwaka. ku kasika mwi nako ya lundundwani lye zuba lya makumi abole ni limwina lya mwezi. ¹⁹ Mukati kao mazuba a mana iyanza ni wobele ka kwina mulungo u swanela ku wanika mu mazubo enu. I ye yense yete nalye chinkwa chilubitwe ni mulungo ka zwiswe mwi nkopano ya Isilaele, kamba uzo muntu muyenzi kamba nji zumwi ya ba zalilwe mwi nkanda yenu. ²⁰ Muswanela ku salya chonse chi lubitwe ha mulungo. Konse ko muhala muswanela kulya chinkwa ne kusena mulungo. ²¹ Linu Mushe ni cha sumpa bonse bakulwana ba Isilaele ni chati kubali, " Muyende mukakete imbelelezana kamba impenezana yete ibe yi kwanisa kulela mahasi enu imi mwi haye imbelele ye mpaseka. ²² Linu muhinde i'nata ya hisopa mi mui jubike mumalaha ate abe mukasuba. Musansele malaha ena mukasuba kuma pulanga a milyango ni ku misumo yo bele ya milyango . Kakwina mukati kenu yete nazwile hanze lya mulyango we nzubo yakwe kutwala kakusasana. ²³ Chokuti Yahwe kahite mukati kukalwisa MaEgepita. Mi cha bona malaha hewulu lya lya mapulanga a milyango ni ku misumo yo bele ya milyango, ka hitilile mulyango wako mi kete a zuminine mushinyi kwinjila muma zubo enu ku milwisa. ²⁴ Muswanela kumamela inkezahaloiyo. Uwu inako yonse kaube mulao kwenu ni kubana benu. ²⁵ Mi ha chimwa kenjila mwi nkanda iyo yete a mihe Yahwe sina mwa ba sepisezi ku chita, muswanela ku mamela inkezo iyi ya bulapeli. ²⁶ Linu bana benu haba mibuza, 'Kanti mukwa uwo wa bulapeli utalusa nzi? ²⁷ Linu inwe kamu wambe kuti nji chitabelo che mpaseka ya Yahwe, chakuti Yahwe aba hitilili mazubo a Maisilaele mwa Egepita inako yaba kulwisa MaEgepita. A ba silelezi mazubo etu."' ²⁸ Linu bantu baba sungamini hansi ni ku fukamina Yahwe. Maisilaele baba yendi ni ku chita bulyo Yahwe mwa baba laeleli Mushe ni Aaroni. ²⁹ Kuba chitahali buti hakati kamasiku Yahwe halwisa bana bonse be ntanzi mwi nkanda ya Egepita, kutangila kumwana we ntanzi wa Faro, ya bekele ha chitulo chakwe, kumwana we ntanzi wa muntu wina mwintolongo ni kubana bonse be ntanzi be 'nombe. ³⁰ Faro ni chabuka hakati kamasiku- iye, ba hikana bonse bakwe, ni MaEgepita bonse. Kubena chililo chikando mwa Egepita, mukuti kana kubena inzubo mokusena zumwi muntu yo fwile. ³¹ Far na sumpa ba Mushe ni Aaroni masiku mi ni chati," Mushe muzwe mukati kabantu bangu, inwe ni Maisilaele. Muyende, Muka lapele Yahwe, sina momubawambili kuti momusaka ku tendela. ³² Muhinde mitapi yenu ni zikamu zenu, sina momuba wambilili, mi muyende, mi hape munifuyole." ³³ MaEgepita haba hwelete hahanu kukuba zwisa mu nkanda, mukuti ba bati," Tubonse katufwe. ³⁴ Chobulyo bantu ni chibahinda ifulawa isena i bena mulungo. Tusuba twabo twaku bumbila zinkwa chituba sumininwe muzizabalo zabo mi zibena ha maheta abo. ³⁵ Linu bantu ba Isilaele ni chi batenda sina Mushe mwa baba wambilili. Ba bakumbili MaEgepita zibya za silivera, zibya ze gauda, ni zi zwato. ³⁶ Yahwe aba pangi MaEgepita kusaka kutabisa Maisilaele. Chobulyo MaEgepita ba bahi zonse zeba bakumbili che nzila iyo. Maisilaele baba zwatunini MaEepita. ³⁷ Maisilaele baba yendi kuzwa kwa Ramisese kuya kwa Sukoti. I nonmbolo yabo iba kusika ha 600,000 ba kwame baba kuyenda ni matende, kukopanya kubanakazi ni ba hwile. ³⁸ Chikwata cha bantu ba chinkopekope na cho ni cha yenda nabo, hamwina ni mutapi ni zikamu, ni nombolo inkando ya zimunantu. ³⁹ Ba babumbi zinkwa zi sena mulungo he fulawa yi ba bazwi nayo kwa Egepita.Kena i bena muliungo mukati baba hindikitwe kuzwiswa mwa Egepita mi kana baba kuwola kulyeha kuku lukisa zilyo. ⁴⁰ Maisilaele baba hali mwa Egepita cha myaka ina 430. ⁴¹ Ku mamaninikizo a myaka ina 430., mwizuba liine ilyo, chonse chikwata chachisole cha Yahwe chiba yendi kuzwa munkanda ya Egepita. ⁴² Aa nji bali masiku a kwikala ne kutondo, cho kuti Yahwe aba baleti naba zwisa munkanda ya Egepita. A bali nji masiku a Yahwe a ba kuswanelwa ku mamelwa ku Maisilaele bonse kutwala ku masika abo. ⁴³ Yahwe ni chati kwa MUshe ni Aaroni, " Mulao we mpaseka uwo: Ka kwina muyendi yete a helwe kukuilya. ⁴⁴ Nihakwina bulyo, muhikana yense wina mwa Isilaele ya ba ulwa cha mali, u wola kulya kasamulaho chi mwamana ku mupanga mupato. ⁴⁵ Ba yenzi niba hikana ba sebeleza mali kanji bali kuchilyo chonse. ⁴⁶ Chilyo chiswanelwa kulilwa munzubo yonke. Ka muswaneli kuhinda inyama ni kuizwisa munzubo kapa mi kamuswaneli ku chola chifuha chayo. ⁴⁷ Inkopano yonse ya Isilaele ba swanela ku mamela mukiti. ⁴⁸ Cho kuti yozwa kungi u hala nanwe imi usaka ku mamela i mpaseka kwa Yahwe, ba kwakwe bonse ba bakwame ba swanela ku pangiwa mupato. Linu u wola kwiza ni kuimamela. Kaswane sina bantu baba zaliwa mu nkanda. Ni hakwina bulyo ka kwina muntu yasa pangitwe mupato yate alye chilyo chonse. ⁴⁹ U wu mulao uswanela ku sebeza ku bonse ba ba zalilwa munkanda ni ku yozwa kungi yo hala mukati kenu. ⁵⁰ Cho bulyo Maisilaele bonse ba ba chiti bo bulyo sina Yahwe mwa ba laeli Mushe ni Aaroni. ⁵¹ Kuba chitahali buti ilyo izuba Yahwe ni cha zwisa Isilaele munkanda ya Egepita ke mpi zabo zi bena zilwisaniso.