¹ Mmi nna va lwiira nna cho kuti, "Cho vusakusima nni mulwiirite, kwiina vamwi va ziimeene hahanu va seeti nni va fwe nniva seeni ku vona muvuso we Ireeza nni u keeza che ziho." ² Mazuva a mana iyanza nne kamwina chiinga a mana, Jeeso nna hiinda Pitorosi nne Jemusi nne Johani cho kuya ku iwulu lye iruundu ilyelye nni veena voo voona. Mmi lyiinu nna sanduka ha vusu vwaavo. ³ Zizwato zakwe nni za veera a hulu, ku tuva ku kaando, ku tuva ku zamba mirora ye inkanda muyi tuvisa. ⁴ Lyiinu chi vasi kwete ku wamba nne Jeeso, Elija nne Moshe nni vaa voneka. ⁵ Pitorosi nne tava Jeeso naati, "Muruti, ku lotu kuti tu kwiina hanu, mmi lyiinu chite kuti tu zaake zitomba zoo tatwe, chimwi nchako, chimwi ncha Mushe, chimwi chive cha Elija." ⁶ ( Ka kuti ka hena a veezi chaava ku lukera ku wamba mukuti va vaalyi kalyiriirwa.) ⁷ 7 Ikope nni lyeeza choku va wumbiriza. Lyiinu lyinzwi nni lyaazwa mwi ikope, "Uzu njeye mwanaswiisu waangu uni suni a hulu." Mumu teeke." ⁸ Va vaati chi va lola mumbalyi ho hwaaho, nni vaa shaala ka kwiina u va vweene, mbwita iiri Jeeso vulyo yee yeena. ⁹ Va vaati chi va suuka ku iruundu, Jeeso nna va laula kuti saanzi valwiiri vantu chi vaa vona, mbwita iiri Mwanaswiisu wo Mukwaamwe chi nna na vuka mu lufu. ¹⁰ Lyiinu nni valyi vikira iiyi indava mukati kaavo, ku zwaaho aavo choku taanga ku waambinsaana mukati kaavo "kuti ku vuuka mu vafwiire" ku teewa nzi. ¹¹ Lyiinu nni va mu vuza kuti,"'Chiinzi vangolyi ha vaacho kuti Elija u lukere kwiiza lwe ntanzi?" ¹² Nna vaacho kuti, Elija wiiza ku ntanzi ku viika zintu nenza. Lyiinu chiinzi ha ku ngolyetwa kuti Mwanaswiisu wo Mukwaame u lukera ku nyanda nne ku hindirwa haansi? ¹³ Lyiinu nni mu lwiira kuti Elija a veeza, a vaa chiti zoonse zi vava kusaka kwaalyi, mu ku ngolyetwa mu mangolo. ¹⁴ Va vaati chi va voola ku varutwana va Jeeso, va va voni kuti va zumbulukitwa vantu vangi, va ngolyi vava ku va kananisa. ¹⁵ Lyiinu vantu va vaati chiinga va vona Jeeso vava komokwa, nni vaa ngombweera kwaalyi kuka mu rumeresa. ¹⁶ Jeeso nna vuuza varutwana vaakwe, "Mu kweete mu mulyi kananinsaana naavo chechi?" ¹⁷ 17. Umwi wa vantu ku zwa mu vuungi nna mu itava kuti, "Muruti, nna lyeeta mwanaswiisu waangu kwaako. Wiina luhuho lu muchita kuti a siye ku wamba. ¹⁸ Ulu luhuho lu mu zuminiza choku mu wiisikiza haansi, u manina koto u zwa ifulu mu kaholo, u suma meeno aakwe, muviri waakwe choku zuminina. Naacho varutwana vaako kuti va zwiisa ulu luhuho mmi vaa kaangwa." ¹⁹ Jeeso nna ve tava kuti, "Unwe ve chivaka cho kuvula itumero, ka nni kalye naanwe luvaka lu sika hayi kuti mu zumine? Mu mulyeete kwaangu." ²⁰ Nni va lyeeta muswisu kwa Jeeso. Lyiinu luhuho chiinga lwa vona Jeeso nni lwa wiisikiza muswiisu haansi choku taanga ku zwa ifulu mu kaholo. ²¹ Jeeso choku vuuza veesi, "Wiina luvaka lu sika hayi neena vuti?" Veesi nni vaacho kuti, "Chinga a vaati a ku zaalwa. ²² kangi lwiina ku mu sohera mu mulyiro hamwi mu menzi nni lu lyika ku mu ihaya. Cho kuti u woola ku chita chimwi tu fwiire inse" ²³ Jeeso nnaacho kuti, "Cho kuti mu woola? Zintu zoonze zi woolyeka kwaalye yoo zumina" ²⁴ Ho hwaaho, veesi muhwiire choku huwa nni vacho kuti, "Nni zumina, nni tusa muku saa zumina kwaangu!" ²⁵ Jeeso chiinga vona kuti vantu va ka ngombwerere kwaalyi, a va kalyimeri luhuho luvi naacho kuti, "Uwe luhuho lo ku saa waamba nne ku saa zuwa, nni kucho suunu, zwe mwaalyi, sanzi nno voolyi wii njire mwaakwe." ²⁶ Luhuho luvi nni chi lwaa lyira choku wiisikiza muswiisu haansi ku zwaaho choku zwa mwaalyi. Muswiisu a va lolyeki mane iiri u fwire, vuungi vwa vantu nni vaacho kuti, "chaa fwa!" ²⁷ Jeeso nna mu woonda che iyaanza choku mu nyemuna, muswiisu choku ziima cha mateende. ²⁸ Lyinu Jeeso chinga njira mu inzuvo, varutwana vaakwe choku mu vuzukiza ku imbalyi, "Chiinzi ha sana twa woola ku luzwiisa?" ²⁹ Jeeso na vacho kuti, "Iizi zo uuwu mushovo zi woolwa vulyo nnavo va rapera," ³¹ Lyiinu chiinga vaa zwaaho va ve njiri cha Galaleya. Jeeso ka heena va suni kuti vantu ve izive kuti vena kuhi, ³² mukuti a vaalyi ku ruta Varutwana vakwe. A va vacho kuti, "Mwanaswisu o Mukwaame kaa heewa ku vantu, aavo veeti nni va mu ihaye. Mazuva oo tatwe ha a mana ku fwa, ka a vuuke mu lufu." ³⁰ Mu kuti ka heena vava zuwisisa, vava tiyi ku mu vuuza. ³³ Nni veeza kwa Kaperaname. Lyiinu cho siina mu inzuvo nna va vuuza, "Seke mu wamba kaha chiinzi mu inzira?" ³⁴ Va va tontolyi ka heena va ve itavi. Mu kuti vava ku keeza vu nganginsaana mu mu inzira kuti mukaando njeeni. ³⁵ Nne ikala haansi choku sumpa varutwana vaakwe, choku vacho kuti, "Haiva zumwe vulyo u saka kuva we intaanzi, u lukeere kuva wa mamanimani, mane nne muhikaana wa voonse." ³⁶ A va hinde muhwiire choku mu viika hakati kaavo. A va hindi zuna muhwire mu maanza aakwe choku vacho kuti, ³⁷ "Umwi ne umwi yoo tambula siina muhwire mu izina lyaangu, u taambula naame, mmi ha a ni taambula, ka taambulyi ime vulyo, u taambula nnaaye yaava kani tumi." ³⁸ Johani choku mucho kuti, "Muruti, twaa vona muntu zumwi nna zwiisa madimona mu izina lyako mmi twa mu ziimika, mu kuti ka a tu sheere mu masulye." ³⁹ "Mmi Jeeso choku vee tava kuti, "Mu siye ku mu ziimika mu kuti ka kwiina yeeti nna chite zintu zi kaando che izina lyaangu ku zwaaho choku waamba vuvi ka haangu. ⁴⁰ Zumwi nne zumwi ya saa lwi naaswe wiina nnaaswe. ⁴¹ "Zumwe nne zumwe yo kuha inkomoki ya menzi mukuti u waangu, cho vusakusima nni mulwiirite, keeti nna vulye ku ruwerwa. ^{42 44} Zumwe nne zumwe yeeti nna chite kuti vo vwaava va nniini va zumina mwaangu kuti va chite mafosisa, ka a ku shiamerwa ku sumininwa ivwe mu insiingo choku soherwa mu iwate. ⁴³ Cho kuti iyaanza lyako lyiku chita kuti u fosa, lyi kosolye. Ku lotu kuti u ke njire mu vuhalo vu saa mani che iyaanza lye chiholye kunze lyoku kee njira cha maanza oonse mwi bimbiro lyo mulyiro. ^{45 46} Haiva iteende lyaako lyi ku pangisa mafosisa, lyi kosolye. Ku lotu ku tambula vuhalo nno u lyi u chiholye kunze lyo kuva nne mateende oonse choku ka soherwa mu ihere. ⁴⁷ Haiva lyinso lyaako lyi voola ku ku pangisa mafosisa, yi ngongomone. Kuku shiyamere kuti wii njire mu mu vuso we Ireeza nne lyinso lyi mmwiina kuunze lyo kuva nne menso oovere choku soherwa mu mulyiro, ⁴⁸ uuko masene aavo ku a saa fwi, mane nne mulyiro ku u saa zimwa ⁴⁹ Zumwe nne zumwe kaa luungwa cho mulyiro. ⁵⁰ Mwiinyo wu shiyeme, mmi lyiinu hawu kunkumuka vukalyi vwaawo njeeni yoo woola kuvu voozekeza hape? Muve nne mwiinyo mukati keeno, mane muve nne ikozo ku zumwe nne zumwe weenu."