¹ Mafarasayi naa vamwi va ma Sikiribe va vaalyi ku ka zwa kwa Jerusalema va veeza ku kungana ne va mu zimbulukite. ² Mmi va vaa voni vamwi va varutwana vaakwe ne va kweete ku lya chinkwa cha maanza a pangite zi fosaheere, njo ku cho kuti, a saa sambite. ³ (Mukuti Mafarasayi ne Majuda onse ka va lyi mbwiiteri ha va samba manza, mukuti va si kweterere mu chizo cha vakulwaana vaavo. ⁴ Mafarasayi chi va ka zwa ku mawuzikizo, ka va lyi mbwiiteri ha va saamba. Mane kwiina imwi milao miingi iva shaala mu masulye cho ku koza, ku swana ne ku shanza inkomoki, impoto, tusuva to ulooto, ne masofa ha va lyiira.) ⁵ Mafarasayi ne Masikiribe va vaa vuza Jeeso kuti, ''chinzi varutwana vaako ha va saa yendi ku ya che chizo cha vakulwaana, ka kulyi ke te va lya chinkwa cha maanza a saa sambite?'' ⁶ Naa va cho kuti, ''Izaya a va mu porofiti sinte uunwe muvalyizinantizi. A va ngolyi, 'Ava vantu va ni kuteka cho tuholo twaavo, mmi inkulu zaavo zina kulye naame. ⁷ Va ni woovamera ku salyi kwe initi, ne vaaruta milao ya vantu ne ilyi ituto zavo.' ⁸ Mu viikira ku imbaalyi milawo ye Ireeza cho ku woonderera zizo za vantu.'' ⁹ Na va cho kuti, ''Unwe mu veene mukaana milawo ye Ireeza cho ku shalaa zizo zenu mu masulye! ¹⁰ Mu kuti Moshe a vaati, '' Mukuteke va isheenu ne va nnyineenu, 'mane, yoo wamba vuvilaala chi veesi ne vannyina kaa fwee cho vusakusima.' ¹¹ Mmi mu cho kuti, '' muntu haa cho veesi nandi vannyina, '' Ituso yeeti ni mwaa tambula ku zwa mwaangu nje Corban,''' ( njo ku cho kuti, 'Iheewa Ireeza')- ¹² lyinu ka usi mu zuminini ku chitira veesi ne vannyina chintu. ¹³ Mu maniisa ziho ze mulawo we Ireeza che chizo chennu. Ne zimwi zi swana naazo zi mu panga.'' ^{14 16} Naa vola a sumpi ikunga mane naa va cho kuti, ''Mu ni teeke, mu vonse, mane mu zuwisisa. ¹⁵ Ka kwiina chiina kunze lyo muntu chi woola ku mu viihaza ha chi injiira mwaalyi. Chi zwa mu muntu nje chi mu viihaza.'' ¹⁷ Ivaati Jeeso choo zwa he ikunga cho u injiira mu inzuvo, varutwana vaakwe va va mu vuza che ingulyi. ¹⁸ Jeeso naati, 'Naanwe ka mwiini ku zuwisisa? Ka mwiini ku vona kuti chi injira mu muntu ne chi zwa kunze keti che chi mu viihaza. ¹⁹ Mukuti keeti chi chi injira mwi inkulo yaakwe, mmi chi injira mwi ivumu lyaakwe mane cho ku zwiira ku chimbuzi?'' Chaa manzwi a va pangi kuti zilyo zi jololye. ²⁰ Naa cho kuti, "Chi zwa mu muntu nje chi mu viihaza. ²¹ Mukati ko muntu, ku zwa mu inkulu, ku iza minahano mivilala, vusahi, vusa, ku ihaya, ²² vuhuulye, kulakaza, zifosaheere, ziziyeza, kulakalyisa, inkulu ilakaza, ku twaala isuvi, ku lyi hindira he iwulu, vuholo. ²³ Vonse uvu vu vilaala vu zwa mukati, mane njo uvona vu viihaza muntu.'' ²⁴ A va katuki aho na ya ku chisi cha Tire ne Sidoni. A veeza kwi injiira mwi inzuuvo mane na sa suni kuti vantu ve izive kuti kweena, mmi ka kwiina mweeti na va wungulwa. ²⁵ Hoo hwaaho mukulwaakazi, wo mwaanakazana yaa veena inhuho imbilala a vaa zuwi chaakwe, neeza, cho ku wa ha mateende akwe. ²⁶ Lyinu uzu mukulwaakazi ivaalyi Muherika, ne ilyi MuSaerophoenician che chizo. Naa mu kumbira kuti a zwiisa madimona mu mwaanakazana waakwe. ²⁷ Naa mu cho kuti, ''Vahwiire valyiisikwa intaanzi. Ka kuti ka ku shiyeme kuhinda chinkwa cha vahwiire cho ku chiha vambwa.'' ²⁸ Mmi naa mu itava kuti, ''Nfwa, Simwiine, vambwa navo va lya vufwaafwa vwa vahwiire kunsi lye itaafulye.'' ²⁹ Naa mu cho kuti, ''Mukuti chi wa wamba vulyo, u sumunukite ku yenda. Idimona chi lyaa zwa mu mwaanakazana wako. ³⁰ Naa vola ku inzuvo yakwe naa ka waana muhwiire u fupi ha mumbeta, mane ne idimona ne lyi zwiire mwaalyi. ³¹ Mmi naa voola a zwii mu chisi cha Tire, mmi naa zaamba chisi cha Sidon naa ya ku iwaate lya Ghalaliya ku ka ya ne ku chisi cha Dekapolisi. ³² Mmi ni va mu lyeetera muntu yaa seena a valyi ku zuwa mane neena vukaavo vo ku waamba, ni va mu kumbiira kuti a mu viike iyaanza. ³³ A va mu hindiri ku imbalyi ne ku seena yo u vweene, mane ne injiirika munwe waakwe mukutwi kwaakwe, chiinga a mana ku swa mate, naa wonda lulyimi lwaakwe. ³⁴ A vaa lolyi ku iwulu, naa kwiita luhuho cho ku mu cho kuti, ''Ephphatha,'' Icho nje ku cho kuti, ''Iiwuke!'' ³⁵ Mane hoo hwaaaho ku zuwa kwaakwe cho ku iwuka, mane chi vaa wondete lulyimi lwaakwe chi vaa fwi, naa taanga ku waamba sinte. ³⁶ Naa va lwiira kuti sanzi va lwiiri muntu. Mmi mu ku va lawiira vulyo, avo mane mu va valyi ku wambiira ahulu chaayo. ³⁷ Va vaa komokwa ahulu, ne vaa cho kuti, ''U pangiite chimwi ne chimwi sinte. Mane u woola ku panga kuti va saa zuwi va zuwe, va saa wambi va wambe.''