¹ Jeeso nnazwa heecho chivaka nnaaya ku inkanda ya Judiya cho kuya nne ku inkanda iina ku vusu vo lwiizi lwa Jorodani, mmi vuungi vwa vantu nni vweeza kwaalyi hape.Nna taanga ku varuta hape siina kuya che itwayero yaakwe. ² Mmi VaFarasayi nni veeza kwaalyi choku mulyika choku mu vuuza kuti, ''Kuya cho mulao mukwaame u zuminiinwa ku kana muihaavwe?" ³ Nne itava, ''Mushe a va mulawiiri ku tiinzi?" ⁴ Nni vaacho kuti, ''Mushe a va zuminini mukwame kuti a ngolye ingolo lyoku mukaana ku zwaaho choku mu hindika.'' ⁵ vaalyi che vu kukuktu vwe inkulo zeenu chiingi a va mu ngolyeri uuwu mulao,'' Jeeso nna vacho vo ovo vulyo. ⁶ Mmi ku mataangiro oku vuumbwa, Ireeza a vaa vuumbi Mukwaame ne mukulwaakazi.' ⁷ chelyii Ivaaka mukwame ka siiye veesi nni vanyiina choku ka ngabasira mwihavhwe, ⁸ ovo vuuveri vava Inyama imwina.' Kava siire vantu voovere, mmi cho muviri umwina. ⁹ Lyinu chokwina vulyo chintu chaa kopanya Ireeza, muntu sanzi achi patalaza." ¹¹ Ku vaati chi veena mu inzuvo, Varutwana va Jeeso nni va mu vuuza hape che iyi indava. ¹⁰ Naa vaacho kuti, "Umwi nne umwi yo kaana mukaakwe choku ka sesa mukulwaakazi uungi cha chita vuhuulye. ¹² Mmi nne mukulwakazi ha kaana mukaakwe choku sesa mukwame uungi, u chita vuhuulye." ¹³ Hape nni va lyeeta vawiire vaniini kwaalyi kuti ava kume, mmi Varutwana va Jeeso choku tanga kuva lwiisa. ¹⁴ Mmi Jeeso chiinga lyemuha, keena a valyi tumeri naa vacho kuti,'' Mu siye vahwiire veeze kwaangu, mu siye kuva viinda, mu kuti Muvuso we Ireeza nguwavoo va swaana naavo. ¹⁵ Chini mulwiira cho vusakusima nko kuti, uuzoo ya seti naa taambulye muvuso we Ireeza siina muhwiirezana keeti naa wu injire.'' ¹⁶ Ku zwaaho naa woonda vahwiire mu maanza aakwe choku vaha mikoonde nne ku va viika maanza mu mitwi. ¹⁷ Mmi chiinga taanga ku zwiira ha vusu nne lweendo lwaakwe, unkosi choku mu ngombweera, nne ku mu fukamina, cho kucho kuti, ''Muruti yoo shiyeme, nni chite nzi kuti nni woolye ku vona vuhalo vusaa mani?'' ¹⁸ Jeeso naa mucho kuti, ''Chiinzi hooni suumpa yoo shiyeme? Ka kwina yoo shiyeme, kuunze lye Ireeza ye yeena. ¹⁹ Wiizi milao: 'Siye ku ihaya, siye ku chita vuhuulye, siye ku yiva, siye ku hambirikiza ,siye ku chengerera, nne kuti u kuteke veeso nne vaanyoko'.'' ²⁰ Unkosi naacho kuti, ''Muruti, ku zwa mu vuniini vwaangu nni va zuwisiza iyii milao.'' ²¹ Jeeso a va mu lolyi choku mu suna. Naa mucho kuti, ''O tayera chintu chii mwiina. U lukeere ku wuza zoonse zo wiina naazo, choku ziha vahumanehi, hoo chita vulyo, koo ve nne vuhumi ku iwulu. Ku zwaaho, wiize u nni shaalye mu masulye.'' ²² Mmi aa manzwi a va mu sasamisa ahulu, choku katuka naa wiiriirwa che ivaka lyo kuti ava humine ahulu. ²³ Jeeso ava lyolyi mumbalyi cho kucho varutwana kuti, ''Ku kaavo vulye kuti vahumi ve injire muvuso we Ireeza!'' ²⁴ Varutwana nni va komokerwa manzwi aakwe. Mmi Jeeso naa vacho hape kuti, ''Vahwiire, ku kukutu vulye ku injira muvusu we Ireeza! ²⁵ Ku huvirira kuti Ikaamera yi injire mulyiinso lye inaalyiti, kuunze lyo kuti muntu muhumi a ke injire muvuso we Ireeza.'' ²⁶ Vava komokwa ahulo, cho kulyi vuuza kaha vuhavo, ''Lyiinu ku woola ku hazwa inni?'' ²⁷ Jeeso choku valola cho kucho kuti, ''Mmi ku kaavo ku vantu, choku saava vulyo kwe Ireeza. Zintu zoonse zi woolyeka kwe Ireeza." ²⁸ Pitorosi choku taanga ku waamba naaye, "Vone, uuswe tuka siyite chimwe nne chimwe mane tuku sheere mu masulye." ²⁹ Jeeso naacho kuti, Cho vusakusima nni mulwiirite, ka kwiina ava siyi inzuvo, nandi vaanaswiisu kunineenu, nandi vaanakazana kunineenu, nandi vaanyineenu, nandi ve isheenu, nandi vaana, nandi inkaanda, che ivaka lyaangu, nne che ivaka lye mulaeza, ³⁰ yeeti naa vulye ku heewa kwiina miyaanda koo vere choku zaamba hanu mwe yinu inkaanda: mazuvo, vaanaswiisu kunine, vaanakazana kunine, nne vaanyina, nne vaana, nne inkaanda, nni kwiina nne ku katazeha ha teni, nne mu inkaanda yi keeza, vuhalo vu saa mani. ³¹ Mmi vangi veena ku vusu ka vave ku mamanimani, ku zwaaho va mamanimani cho kuva ve intaanzi." ³² Va veena mu nzira, nni va kaya kwa Jerusalema, Jeeso naa va hitire ku vusu. Varutwana nni va komokwa, naavo va va ka musheere mu masulye cho kulyi kalyirirwa. Lyiinu Jeeso choku suumpira veena ikumi nne toovere he imbalyi choku taanga kuva lwiira kuti u keeza kuku pangahalyirwa inzi mu vufwihi. ³³ ''Mu vone, tu kaya kwa Jerusalema, mmi mwaanaswiisu wo Mukwaame u kaya kuku heewa mu mayaanza a va purisita va kulwaana nne vangolyi. Ka va munyaansikiza lufu choku muha vantu ve inkaanda vulyo. ³⁴ Ka va mushewunwiine, choku mu swiira, ku mushimeha, choku mu ihaya. Mmi ku zwaaho chini kwaa hita mazuva ootatwe kaa vuuke." ³⁵ Vaana va Zebediya va sumpwa Jemusi nne Johani va veeza kwaalyi nni vati, ''Muruti, tu saka kuti u tu chitire cheeti tu sake kwaako.'' ³⁶ Naa vacho kuti, ''Mu saka kuti nni muchitire nzi?'' ³⁷ Aavo choku mucho kuti, ''Tu zuminine kuti twi kalye naawe muku vereenga kwaako, umwi e kalye ku malyo ako, umwi choku ikala ku mamonso.'' ³⁸ Mmi Jeeso naa ve tava naati, '' Ka muiizi chi musaka. A mu woola ku nywa inkomoki yeeti nni nni nywe nandi ku zimanina ikolovezo yeeti nni nni kolovezwa chaayo?'' ³⁹ Nni va mucho kuti,'' Tu woola.'' Jeeso naa vacho kuti, "Inkomoki yeeti nni nni nywe ka mu yinywe. Ikolovezo yeeti nni nni kolovezwa chaayo, ka mu kolovezwa chaayo. ⁴⁰ Mmi yo kuti umwi yoo ni kala ku malyo nandi ku ma monso, ka heena iime nni nniha, mmi mbwiita kwaavo va vakanyereezwa." ⁴¹ Mmi varutwana vamwi veena ikumi nne toovere chiinga va zuwa iyi ndava, choku taanga nni va nyerererwa Jemusi nne Johani. ⁴² Jeeso choku valyi sumpira nnaati, ''Mwiizi kuti a voo va hindwa niiri va vusi va vantu ve Inkanda kuti va va lyaatiriza vulyo, mane nnaavo va maziimo a hee wulu vava laula vulye. ⁴³ Mmi ka ku lukeere kuva vulyo mukati keenu. zumwe nne zumwe yoo saka ku kuzwa mukati keenu a ve muhikaana wa voonse, ⁴⁴ mane nayee yoo saka kuva we ntaanzi u lukeere kuva chikombwa cha voonse. ⁴⁵ Ka kuti mwaanaswiisu wo Mukwaame ka heena a vee ziri ku teenderwa, mmi mbwiita ku teendera, mane nne kuha vuhalo vwaakwe nni yilyi chi wulyiso cha vaangi." ⁴⁶ Nni veeza kwa Jeriko. Mmi cho zwa mwa Jeriko nne varutwana vaakwe nne vantu vaangi, mwaanaswiisu wa Timayiyasi, Baritimayiyasi, mukumbiizi wo muhofu, nne ikeere he imbalyi ye inzira. ⁴⁷ Chiinga zuwa kuti nje Jeeso Munazareta, nna taanga ku huwa nnaati, "Jeeso, Mwaanaswiisu wa Daafita, nni fwiire inse!'' ⁴⁸ China vuungi cha vantu nni cha lwiisa mukwaame wo muhofu, nni chi mucho kuti toontolye. Mmi iiye naa zwiira ku vusu nne ku huwa, "Mwaanaswiisu wa Daafita, nni fwiire inse!'' ⁴⁹ Jeeso nna ziima choku laula kuti a ka suumpwa. Nni va suumpa mukwaame yaa sa voni, cho kucho kuti, ''Kolye! ziime! U ku suumpa.'' ⁵⁰ Nna zavula chizwaato chaakwe choku zindira ku imbalyi, choku ziima choku hweera, cho kuiiza kwa Jeeso. ⁵¹ Jeeso nna mu itava nnaati, ''U saka kuti nni ku chitire inzi?'' Unkosi a sa voni cho kucho kuti, ''Muruti, Nni saka ku taambula ku vona kwaangu.'' ⁵² Ku zwaaho Jeeso choku mucho kuti, "Kwiya. Itumero yaako chiya ku hoza.'' Ho hwaaho choku taanga ku vona hape, mane nna mu shaala mu inzira.