¹ Dipus di sabadu, na fuska fuska di purmeru dia di semana, Maria Madalena i ki utru Maria bai sepulcro. ² I tenba un garandi tirmidura, logu anju di Sinhor ria di seu, i bin rola pedra i sinta riba del. ³ Si aparensa seduba suma un relampagu i si ropas, branku suma pikininu pedras di tchuba. ⁴ Guardas staba na tirmi ku medu e fika suma mortus. ⁵ Ma anju, bai nunde ki mindjeris, i fala elis: "Ka bo tene medu, n'sibe kuma bo na buska Jesus, ku mataduba. ⁶ I ka sta li, ma i lanta di mortu suma ki faladuba. Bo bin djubi lugar nunde ku sinhor staba nel. ⁷ Bo bai gos gos bo ko konta si disipulus: El i lanta na metadi di mortus i na bai bo dianti pa Galileia, la bo na odjal'. I sedu suma ku n'konta bos!" ⁸ Ki mindjeris disa koba kinti kinti ku medu i ku garandi kontentamentu, e kuri pa bai konta disipulus. ⁹ Ma Jesus bai pa n'kontra ku elis I fala elis: Saudadis!".Mindjeris, bai pertu del, e barsal na pes e adoral. ¹⁰ Ma Jesus fala elis: Ka bo tene medu. Bo bai pa n'ha ermons bo konta elis kuma n'na bai pa Galileia i la bo na odjan". ¹¹ Otcha ku mindjeris na baiba, alguns di guardas bai pa sidadi e konta sefis di Saserdotis tudu ku kontisi. ¹² Pabia des saserdotis djunta ku garandis e fasi un panu, e da garandi kuantidadi di dinheru pa soldadus e ruma ku elis: ¹³ "E fala kuma disipulus di Jesus bin di noiti e furta si kurpu, otcha no na durmiba. ¹⁴ Si e noba tchiga na oredja di gubernadur, no na konvensil, no na disa bos livridi shatisas". ¹⁵ Asin ku soldadus pega dinheru e fasi suma ke seduba instruidu. E storia padjiga na metadi di judeus te dia di aos. ¹⁶ Ki onzi disipulus bai pa Galileia, pa monti ku Jesus mostra elis! ¹⁷ Otcha ke odjal, e adoral, ma alguns djintis na duvidaba. ¹⁸ Jesus tchiga pertu elis, i fala elis:"N'dadu tudu autoridadi na seu ku na tera. ¹⁹ Ma bo bai bo fasi disipulus di tudu nasons. Bo batisa elis na nomi di Pape, ku di Fidju ku di spiritu Santu. ²⁰ Bo n'sina elis pa guarda tudu kusas ku manda bos. Ali n'na sta ku bos tudu dias,te na fin di tempu.