¹ Dipus di seis dias, Jesus leba ku el Pedru, Tiagu i si ermon Djon, I subi ku elis pa un monti altu. ² I muda figura se dianti; si rostu staba na lampra suma sol, si ropas bida i na lampra suma luz. ³ I bin parsi pa elis Moisés ku Elias, e na papiaba ku El. ⁴ Pedru fala Jesus: "Sinhor, i bon pa no fika li. Si bu misti n'na fasi tris barakas: Un pa Sinhor, un pa Moisés , un pa Elias". ⁵ I staba na papia inda otcha nuven kubri elis, e obi un fala ku bin di nuven, i fala: "es i n'ha fidju ku n'ama n'ta kontenti ku El. Bo obil". ⁶ Otcha ku disipulus obi ki fala, e kai ku se rostus na tchon e staba ku garandi medu. ⁷ Jesus bin i toka elis i fala elis:"Bo lanta ka bo tene medu". ⁸ E djubi ma e ka odja ninguin, son Jesus. ⁹ Odja ke na ria di monti, Jesus manda elis i fala:" ka bo konta e vison pa ninguin, te ku fidju di omi lantandadu na metadi di mortus". ¹⁰ Si disipulus staba na puntal, e fala: "pabia di ke ku pursoris di lei ta fala kuma Elias ten ku bin purmeru?" ¹¹ Jesus ruspundi i fala:" Na bardadi Elias na bin torna tudu kusas manera ki dibidi sedu. ¹² Di tudu manera n'na fala bo:" Elias bin dja, ma e ka raparal; m'be di es, e fasi ku el kil ke mistiba. Di mesmu manera, fidju di omi na bai sufri igualmenti na se mons". ¹³ Asin disipulus n'tindi kuma i staba na fala di Djon Batista. ¹⁴ Otcha ke tchiga nunde ku multidon, un omi bin, i finka djudju dianti di Jesus, i fala: ¹⁵ "Sinhor, ten pena di n'ha fidju, i tene duruba kabesa i ta sufri tchiu. Manga di bias i ta kai na fugu, i utru bias i ta kai na iagu. ¹⁶ N'tisil pa bu disipulus, ma e ka pudi kural". ¹⁷ Jesus ruspundi: I fala: "Jorson ku ka bali ka ta fia, te kantu tempu ku no sta ku bos? Te kantu tempu ku na n'guenta ku bos? Tisi mininu pa mi". ¹⁸ Jesus raprindi ki dimoniu asin ki sai di mininu, ku fika kuradu na ki ora. ¹⁹ Disipulus bi pa Jesus elis son e fala:"Pabia di ke ku no ka pudiba serka ki dimoniu?" ²⁰ Jesus fala elis:" I pabia di bo puku fé; suma n'na konta bos bardadi: Si bo tene fé suma un garadi beno, bo pudi fala e monti:' Sai di li pa la.' I na sai. Nada ka na sedu imposivel pa bos. ²¹ Ma e tipu di dimoniu ka ta sai, si i ka ku orason i djundjun. ²² Otcha ke staba na Galileia, Jesus fala di disipulus:" Fidju di omi na bin entregadu na mons di omis; ²³ e na matal, ma na terseru dia, I na lanta di mortu". Disipulus fika tristi dimas. ²⁴ Otcha ke tchiga na kafarnaum, kobraduris di m'pustu bai pertu di Pedru, e puntal:"Bu mestri ka ta paga m'pustu?" ²⁵ I ruspundi:" sin, i ta paga". Ma otcha Pedru entra na kasa, Jesus djunna papia, I fala: ke ku bu pensa, Sinhor? Di kin ku di mundu ta risibi m'pustu o reseitas? Di se fidjus o di ospri?" ²⁶ Otcha Pedru fala: " Di ospiri,"Jesus falal: N'ton se fidjus sedu dispensadu di paga m'pustu. ²⁷ Ma, pa ka no ofindi elis, bai pa mar, bota ansol, purmeru pis ku bu piska, pegal bu iabri si boka. bu na odja la un moeda di prata, pegal bu da pa kobradur di m'pustu pa mi ku bo."