¹ Sinhoris, bo da pa katibus kil ki sertu ku kil ki djustu, suma ku bo sibi tambi kuma bo tene un sinhor na seu. ² Bo kontinua fika firmi na orason, bo bisia sempri na bon sintidu ku gardisimentu. ³ Na mesmu manera, bo ora tambi pa nos, pa Deus iabrinu porta di konta si palabra pa no konta di puder di cristo, ku pun pa n'prindidu. ⁴ I bo ora pa n'pudi konta e palabra klaru, suma ku ndibidi fasi. ⁵ Bo ianda ku djiresa dianti di kilis ku sedu di fora; bo usa bo tempu ku djiresa. ⁶ Bo palabra pa e sedu sempri gustus tempradu ku sal pa bo sibi kuma ku bo dibidi di ruspundi kada kin. ⁷ Tíquico na fasi bos kunsi tudu e kusas pabia di mi. El i un ermon ku n'ama, un sirbidur fiel i sedu un djudadur na tarbadju di sinhor. ⁸ Ami n'mandal pa bos son pa bo pudi sibi di no situason ma tambi pa i pudi konsola bo korsons[Nota:Alguns versons antigus tisi:"Ami di bos propi ma tambi pa i n'koraja bo korsons"], ⁹ djuntu ku Onésimu ermon amadu i fiel.Elis e na fasi bos kunsi tudu kusa ku sta na fasidu pali. ¹⁰ Aristarco, nha kumpanher di kalabus, i manda bos mantenha, suma tambi Marcos, primu di Barnabé(alguin ku bo risibi del n'sinamentu; si i bin munde bos bo risibil), ¹¹ Jesus ku tchomadu tambi djustu. kontudu so kilis ku fana ju sedu nha djudaduris na tarbadju di renu di Deus. Elis e srdu un konsolason pa mi. ¹² Epafras, sirbidur di cristo Jesus alguin di bo tera i manda bos mantenha, i ta luta sempri pa bos na orason, pa bo sta kompletu, intchidu ku tudu vontadi di Deus. ¹³ Ami n'sedu tustumunhu di kuma ki ta tarbadja risu pa bos, pa ermons di Laodiceia ku kilis di Hierápolis. ¹⁴ Lucas mediku ku n'ama ku Demas e manda bos mantenha. ¹⁵ Falam mantenha pa ermons di Laodiceia, ku Ninfa tambi ku igreja ku sta na si kasa. ¹⁶ Ora ku e karta leidu bo dianti, pa i leidu tambi na igreja di Laodicenses. i pa bo tene sertesa tambi di kuma karta di Laodiceia leidu. ¹⁷ Fala Arquipo:"pa i pui atenson pa ministeriu ki risibi na sinhor, pa i kompletal". ¹⁸ E saudasons e sedu di mi propi Paulo. Lembra di nha kolmu. Pa fabur di sinhor ta sta ku tudu bos.