¹ Ndiye Jezu adatoma kuwapfunzisa na kucita mufananidzo aciti: Mwamuna bodzi adabzala muti wa Uva, aciyikha mpsapsa, adacera ncera kuti uva zixengeteke, pakumalizira adamanga kanyumba. Adapereka muti ule kuna alimi walendo. ² Panthawe ya kuphunga iye adatuma ntumi bodzi kuti akatambire ncero ya uva kuna walimi walendo wale. ³ Manji iwo wadamuphata, acim,dzonga na kumubweza ne kumpasa cinthu. ⁴ Kaciwiri, adatuma pfunzi wina, womwe wadamudzonga mun,solo na kumunyaza. ⁵ Iye adatuma pomwe wina, iwo wadamupha, Iwo wadacita bzibodzibodzi na anyabasa winango, kuwamenya winango kuwapha. ⁶ Ndipo akhadasala bodzi, mwanace wakumufunisisa adamutuma pakumalizira. Iye adabvi: ''Iwo wankamunkhodza mwanangu''. ⁷ Tsono walimi wale wadalewa wonkhawonkha: 'Eneyi ni ntewereri, bwerani timuphe kuti upfumi udzakhale wanthu'. ⁸ Wadamumanga, wacimupha na kumuthusa kunja kwa munda. ⁹ Natere, ncanyi ancita mwene munda? Iye anzabwera, acipfudza alimi ndipo anzapereka kuna winango munda wa uva. ¹⁰ Mulibe kuwerenga manemba? 'Mwala omwe anyakukonza adawulamba wadzankhala na ma angulo. ¹¹ Bzenebzi bzabwera na Mbuya, ndiye psakudekesesa maso mwanthu'. ¹² Iwo wadapsaga njira yakumanga Jezu, manji wankhana man'tha na mbumba, nthangwe lakuti wankhadziwa kuti iye ankhadawawuza na mufananidzo kuna iwo. Wadzawasiya waciyenda. ¹³ Iwo wadatumiza amuna winango wadani na mbumba ya Wayirodi kuti akwanise kuphata fala. ¹⁴ Pomwe wadafika, wadamubvunza: '' Misiri, tirikudziwa kuti ndiwe wacadidi, hawubvi nzeru ya mwanzako, nthangwe umbawona lini kayimidye ka mun'thu. Mwacadidi umbapfunzisa njira ya mulungu. Bzilibwino tipagari munsonkho kwa Seza kanakuti nkhabe?'' Tipagari kanakuti nkhabe?'' ¹⁵ Manji Jezu pakudziwa umaluku wawo nakuwabvunza: ''Nthangweranyi muli kundiyedza? Ndibweresereni kobiri ya siriva kuti inepano ndiwone''. ¹⁶ Iwo adabweresera kabodzi. Naterepoyo, Jezu adabvunza: '' Nkhope idanembiwayi njawani?'' ¹⁷ Iwo wadamutayira adati: '' Nja Seza''. Jezu adzati : Pasani Seza bza Seza, na bzaMulungu, kwa Mulungu.'' ''Ibzo bzidakhala bzakupfasisa kwaiwo.'' ¹⁸ Naterepo aSadusi, anango omwe ambati palibe an'dzamuka kwa wakufa, adafendera kwa Jezu, acibvunza kuti: ¹⁹ ''Misiri, Mozeji adatisiyira manembo yakati: 'Penu mun'thu akafa, acisiya nkazi, alibe naye mwana, bale wa wakufayo apite panyumba kuti abalire bale wace ule wakufa. Akhalipo wan'thu anomwe paubale wawo'. ²⁰ Akhalipo wan'thu anomwe pawubale wawo. Wakuyamba akhanankazi adafa alibe kusiya wana. ²¹ Waciwiri adapita panyumba, na iyembo adafa alibe kusiya wana. Psibodzi-bodzi, bzidacitika kuna wacitatu. ²² Anomwe wentse adafa alibe kusiya wana! Pakumalizira nkaziyo adzafambo. ²³ Kodi patsiku yakudzamuka kwa kufa, mwenekaciro nkaziyo an'dzakhala uponi? Thangwe la kuti abale anomwe wale wentse akhadamulowola. ²⁴ Jezu adawatayira kuti: ''Ndipopa mumbaphonya thangwe la kusaya kudziwa bzakunemba na n'tsimba za Mulungu? ²⁵ Na tenepo pakumuka kwa wakufa, palibe kulowolana, manji anzankhala ninga ngirozi za kudenga. ²⁶ Kuna wakufa kuti an'dzamuka, kodi mulibe kulewenga mu bunkhu la Mozeji, pomwe palikulonga bza citsamba cakugaka? Mulungu adalonga na Mozeji kuti: '' Ine ndine Mulungu wa Abrahamu, Mulungu wa Izaki na Mulungu wa Jakobo.'' ²⁷ Ibzi bziri kulatiza kuti Mulungu ni Mulungu lini wakufa, ni Mulungu wa wan'thu wa moyo . Cikulu muli kuphonyeka. ²⁸ M'dziwi wa ntemo, pakubva kugwengerana adabwera kwawo. Iye adawona kuti Jezu adawatayira bwino. Adafendera aciwabvunza kuti: '' Kodi pa mitemo yentse, ukulu ndi uponi?'' ²⁹ Jezu adamutawira acibvi: '' M'temo ukulu nguyu: 'Bvani, aIjirayeri! Mbuya, Mulungu wan'thu, ndiye Mulungu m'bodzi yenkha. '' ³⁰ Funa Mbuya, Mulungu wako, na n'tima wako wentse, na moyo wako wentse, na mafungiro yako entse, na n'tsimba zako zentse.'' ³¹ M'temo waciwiri nguyu: '' Funa mwanzako ninga momwe umbabzifunira iwe wenkha.'' Palibe m'temo winango ukulu wakupita mitemo eneyi''. ³² Na terepoyo dziwi ule wa ntemo adati: '' Mwatayira bwino Misiri . Ninga mwalonga, cadidi kuti Mulungu ni m'bodzi yenkha, palibe unango. ³³ Ndipombo umufune na n'tima wentse, na mafungiro entse, na mphanvu zentse, na kufuna mwanzako ninga umbabzifunira iwe wenkha, ibzi ni m'psabwino kuposa kupereka cipo na n'tsembe zakutentha.'' ³⁴ Jezu adawona kuti mun'thuyo adatawira na udziwi . Adzanvunza acibvi: ''Iwe uli lini kutali na umambo bwa Mulungu''. Kubvira penepo, pakhalibe munango wakulimba m'tima kuti amubvunze. ³⁵ Pomwe Jezu akhapfunzisa munyuma ya Mulungu, dabvunza: ''Kodi adziwi wa ntemo wambalewa kuti Krixtu ni mwana wa David?'' ³⁶ David adati: mwa zimu wakucena kuti: '' Mbuya adalewa kuna mbuya wangu kuti: khala mu boko langu la madidi mpaka ndiikhe wa zondi wqako patsi pacithantha cako''. ³⁷ 'David cayiye ambacemera Krixtu kuti Mbuya. Angakhale tani mwana wace?'. Wan'thu wazinji wakhatetekera na kudekedya cayiko pakubva mafala yace. ³⁸ Pomwe Jezu akhawapfunzisa, adati: '' cenjerani nawo anembi wa ntemo. Wambada kuyenda adabvala bzakubvala bzitali nakuti alemekezedye m'misewu. ³⁹ Ambada mbuto zikulu na yakukhodzerera pam'pwando. ⁴⁰ Iwo wambapfunzambo za anyakusiiwa, wacimbacita minamato mitali-mitali ya kunamiza. Wan'thu wowa anzapasiwa nyathwa ikulu. ⁴¹ Ntsiku zinango, Jezu akhadakhala pafupi na nsengwa ya kuyikhira kobiri za cuma mu nyumba ya Mulungu. Iye akhalingisa wan'thu wakhan'thusa kobiri zawo mu nsengwa. Wan'thu wazinji wanyakudala wakhathusa kobiri zizinji. ⁴² Padafika nyakusiyiwa bobzi, adan'thusa tukobiri tuwiri takukwanira kwadrante ibodzi. ⁴³ Jezu adacemera wapfunzi wace aciwawuza kuti:'' ncadidi ndirikulonga kuti masiwa wakusawukayi wanthusa kupinda wan'thu wentsewa omwe wali kuthusa kobiri mu nsengwa. ⁴⁴ Thangwe winangowa wandothusa bzomwe watapa pabzizinji wanabzo. Manji nkaziyi naku sawuka kwace, athusa bzentse bzomwe ankanabzo, napo bzingadamuthandiza pamakhaliro.''