¹ Ha Farisi nawa kakutjanga owa hashwayire mu Yerusarema hana pongire kukwendi. ² Oha monine hakathishongero thendi hana kudya nodidhiro, oyine, mbadiyikenu. ³ Ha Farisi nohakamutjangi ne kadiwa kudya, shimwengwa hakuyowe kumanyara hao, Yoyishi hakwatire yomuthizo tha kuruwao. ⁴ Ha Faririsi shohakashwaye kumisika, Kadiwa kudya shimengwa kutanga tango kukuyowa athinda, Ene Hakwatire thikuma kuyinu eyihawanine , Yokuninga yira yiyoyitha yo ma komoki, mupika, Mapurati omakenu, nopa hadyeranga. ⁵ Ha Farisi nohakamutjangi hepurire Yesusi, ''Nye hakathishongero thoye yokupira kukutha thizo thakuru wao. Mara one kudya nodidhiro ngambi mbadi hakuyowo kunyara?'' ⁶ Mara aambire kukwao, ''Isaya aporofitire yenumwe mwaka mwipo. Dyodi yoidi vene, 'Owa haguva ne hanikutekera nomiromo mara mitjima dhao ne kayenda nange. ⁷ Mbadi hana kuniraperera, muushemwa kuna kuhonga mirao dha hanu yira thothihonga. ⁸ Mwareya mirao dha nyambi ndani omwakutura yomuthizo thenu.'' ⁹ Aambire kukwao, ''Uwa munye okukona shi muthiye murao wange kupita mutende yomuthitjo thenu. ¹⁰ Mosesa aambire, 'Kuteke wiho ndani okuteke nyoko,' Ndani, 'Keheyu anakuamba yoyimango nawihe na nyina nganyi akufe. ¹¹ Mara kowakuamba shi, 'Ngeshi murume anakuamba na nyina na wihe, ''Kehedhi tuso unakuwana kukwange dhidi mundhira''' (oyone kuyiamba ngeno), 'Yitape kwa Nyambi'), ¹² Keho kadi mwakumutawedhera shi atendere thinu nyina ndi wihe. ¹³ Kuna kuwitha diywi dya Nyambi kuthitjo thenu noyingi eyi mwatenda pamuve. Ndani yingi yimweya twakutenda.'' ¹⁴ Hethire mbunga karo ndani aambire kukwao,'' Muterere ku kwange, Mwaheya, ndani omuyuve. ¹⁵ Kadiko yopa nunda dhamuguva yokukona kumuyipitha ngeshi ana ngeni mumwendi. Oyi yakara mwamuguva ne yodiyo yokukona yipithipithe muguva. ¹⁶ Owa hadi nomatwi hayuve. ¹⁷ Keho Yesusi apaathire mbunga ndani angenine mundhuo, Hakathishongero thendi amwipure yoku amena kudithaano. ¹⁸ Yesusi aambire, ''Namwe shime mbadi muna kuyuvithitha? Mbadi muna kumona shi kehethi tha kungena mwishi no panunda mbadi wakukona thiyipithe yirama yamunu, ¹⁹ Yoyishi mbadi yakuyenda kumutjima wendi, Mara koya kuyenda mudira dyendi noka shwaayera kunyima dhendi?'' Eshi moyi yiamba Jesusi ambire shi kehethi tho kungena muyirama yamunu ne thikenu. ²⁰ Aambire, Yiyethekera yamuguva yoyimango yodiyo yokukona yimuyipithe. ²¹ Keheyu muguva, Mumutjima yakushwaya, Kuyenda noyiyedhekera yoyimango, Widhi, Kupaa, ²² Ruhonda, Kurumbera, Uva, Mbuthi, Kukumonekitha, Meho pyuu, Kuhopa, Kukuwa, Uyero. ²³ Omaheya a mauyi ashwayerera mumwetu, ndani hodiyo hanakutuyipitha twakuva.'' ²⁴ Ashwayirepo nokuyenda muditunga dimweya dya Taire ndani Sidomu. Akayendire mundhuo, mbadi ashanine shi aguva hadimuke shi kupiku adi, ngambi kengeyo mbadi akonine kukuhoreka. ²⁵ Popo vene mukamadi akarire no mwana omupepo ouyi apa yuvire yoku hamena kwa Jesusi, Podiyo ayendire nokawera pamapadhi endi. ²⁶ Mukamadi yone mu giriki, Amurombire kushwayitha madimona kwa mwanendi omukamadi. ²⁷ Aambire kukwendi, ''Mupe tango mwanuke adye. Mbadi thiwana shi yidya yamwanuke muyimwayere mbwa.'' ²⁸ Mara awa tawire no kuamba kwao,'' Yii, Fumu, ngambinga mbwa mwishi dho tishi dhina dyanga yidya yohanuke. ²⁹ Aambire kukwendi, ''Pamurandu oyi una amba , Unashutuka kona uyende, Yimupepo yoyi mango yina shwaya kwa mwanoye omukamadi.'' ³⁰ Ahukire ku ndhuo dhendi ndani hakawanine mwanuke anarara paudidi, ndani yimupepo yoyimango yamushwayire. ³¹ Opa ashwayire muditunga dya Tayire, ndani apitire tho ditunga dya Sidoni dho diwate dya Galia kare muditunga dya Dekapolisi. ³² Hamuretere muguva umweya okufa matwi ndani akarire noukukutu okuamba, ndani hamurombire Jesusi amukambeke nyara dhendi. ³³ Amushwayithire mukatji ko mbunga ko sikiriti, ashimbire munwe wendi noku utura muditwi dyendi, ndani athipire nokukwata diyuru dyendi. ³⁴ Adiyamene kuwiru, Amonine, no ambire kwendi, ''Ephphatha,'' ³⁵ kuyiamba ngeno, ''Yandhuruke!'' Pororo ruvedhe ayandhurukire. Thidimi thendi thathiyiweriwe, Podiyo atangire kuamba thiwana. ³⁶ Jesusi awatongwere eshi mbadi hakona kutongwera hamweya, Momu anakuwa shingithirera modiyo hanakuyitongora thikuma. ³⁷ Hatetukire thikuma, nokuamba shi, ''Ana tendi yinu yoyiheya thiwana. Mbesi nomukakufa matwi anatendi ndani haporere kuamba.''