¹ Mumayuwa gho,pakarire karo mbunga dhodhingi ene mbadi hakarire noyo kudya. Jesus ghethire hakathishongero wendi nokuwaninga eshi, ² Nakufera neke mbunga yoyishi hana kare nange mayuwa mahatu hanamana ene mbadi hawana yokudya. ³ Ngeshi niwatume hayende kumaghumbo ghagho, okuwone mbadiko thi anadi, kukona hapwerere mundhira dhagho. Yoyishi hamwe kayenda hanatundu.'' ⁴ Hakathishongero wendi hamuhuthire eshi,'' Kupi shotuwane maghuroto ghokukumanenamo mudyango yira di dyo mburundu eshi hekute wa hanu?'' ⁵ Aye ghawepurire eshi,''Mangatji maghuroto mudi nagho?'' Kokuhutha kwagho eshi,''Kwoko nomawadi.''' ⁶ Gharawere mbunga dhihungumane pamuve. Ghatumburire maghuroto kwoko nomawadi ghatumerire,noghaghuyondorire. Ghaghutapire kwawa kathishongero wendi hatapere mbunga.'' ⁷ Hakarire notuthighana totupu,no munyima dhokutumera,gharawerire hakathishongero wendi eshi hatapere kumbunga karo. ⁸ Hadire nohekutire, nohakongwedhire yigonyo-gonyoaye yathighareko,yikote kwoko noyiwadi. ⁹ Hakarire hanu hokukuma yira kumayovi mane. Ndani poghawaningire hahuke . ¹⁰ Popovene kokuperama muwato nohakathishongero wendi,nohayendire kuthikota Dalmanutha. ¹¹ Munyima dhapo kokwiya hafarasayi nohatangire kumukanana,awo hashanine thidimukitho thokutunda mudiwiru,hamuyereke. ¹² Ghahetherire thikuma mumupepo wendi noghaghambire eshi,''Pashanye hanahoka hanakushanena thidimukitho ? Ghushemwa nakumutongwera mbadiko thidimukitho mbawapa wa hanahoka.'' ¹³ Ghatundirepo ghawathighe,ghaperamine muwato karo ,noghatjinanine thabo diya. ¹⁴ Awo mbadi hakarire noghuroto ghokupitakana paghuroto ghofotji muwato. ¹⁵ Ghawadimukithire eshi,''Mukoneke nomutakamithe kuyihafitha yawafarasayi no ya Herodesi. ¹⁶ Hakathishongerowendi hakwipadhurire mukatji kagho eshi, ''Yoyi tuna piri ghuroto ndi.'' ¹⁷ Jesusi ghayidimukire mo gha watongwere eshi, ''Pashanye muna kughayarera eshi mbadi tudi noghuroto? Mbadi muna kumona shime ndi? Nombadi muna kutjwathana shime ndi? Namwe mitjima dhenu ne dhina ndundumena? ¹⁸ Mwakara nomeho, ene mbadi muna kumona? Mwakara nomatwi, ene mbadi muna kuyuva? Mbadi muna kuvuruka ndi? ¹⁹ Apa na yondorire maghuroto makwoko mukatji komayovi kwoko, notungatji tukote otu twayarire yigonyo-gonyo otu mwa kongwedhire?'' Awo hamuhuthire eshi, ''Dikumi yiwadi.'' ²⁰ ''Apa na yondorire maghuroto kwoko nomawadi mukatji komayovi mane, yingatji yikote yo kuyara yigonyo-gonyo yoghuroto eyi mwa kongawedhire? ²¹ Awo hamuhuthire eshi, ''Kwoko notuwadi.'' Gha wa tongwere eshi, ''Mbadi muna kutjwathana shime ndi?'' ²² Ha kakumine muBethsaida. Hanu hawa retere mukafumu gho mukunga noha kandere Jesusi eshi gha mukwate. Jesusi gha kwatire mukunga padyoko no gha mushwayithire mumukunda. ²³ Apa gha manine kuthipera pameho ghendi no kumukambeka nyara, no ghamwipurire eshi, ''Koyidi eyi ghuna kumona ndi?'' ²⁴ Gha diyamenine muwiru, no ghaghambire eshi, ''Kuna kumona hanu yira yitondo yina kuyendaghura.'' ²⁵ Kokumukambeka kwendi karo nyara pameho ghendi nomukafumu yu gha yandhurukire meho ghendi, meho ghendi gha konine kumona karo noghamonine yoyiheya thiwana. ²⁶ Jesusi gha mu tumine gha yende kudighumbo dyendi, no gha mu ningire eshi, ''Wakangena mudoropa.'' ²⁷ Jesusi gha shwayire nawa ka thishongero wendi hatambe kumukunda waSesareya Filipi. Mundhira dhawo ghepure haka thishongero wendi eshi, ''Ngepi edi hana kughamba hanu eshi yame dye? ²⁸ Hamu huthire eshi, ''Johanesi muka diyoyero. Hamwe kughamba eshi, Eliyah; nohamwe eshi ghofotji ghawa porofita.''' ²⁹ Gha wepurire kwendi eshi, ''Ngepi edi muna kuni toya me?'' Petrusi ghamuhuthire eshi, ''Yowe Kristusi.'' ³⁰ Jesusi gha wa konekithire eshi ha kona kutongwerako hamweya eshi yodiye dye. ³¹ Gha tangire kuwahonga eshi, Mwana Munu mbo ghana nyanda thikuma yoyingi, hakuru no ha kurupristeri no haka muarukwaro, no mbohana mupagha, ene munyima dhomayuwa mahatu mbo ghana vumbuka karo. ³² Gha kenithire mbudhi dhiya thiwana. Petrusi kokumukokoka pambadi no gha tangire kumutughumukera. ³³ Ene Jesusi gha pirukire no kukenga kwawa kathishongero wendi nogha tughumukere Petrusi ghuninga eshi, ''Shatani huke munyima dhange! Owene mbadi ghuna kughayadhara yinuyinu yaNyambi, ene yinu yawanu.'' ³⁴ Po ghethire mbunga nawa ka thishongero wendi pofotji no ghwa tongwerire eshi, ''Ngeshi ghumwe ghana shana kunikutha, gha kona ndani kukunyatha thinda, gha shimbe thikurushe thendi no ghanikuthe. ³⁵ No kehe yu gho kushana kukunga moyo wendi ne mbo ghuna muyongara, no kehe yu gho kuyongaritha moyo wendi papange nombudhi dhodhiwa mbo ghuna pu kughamwena. ³⁶ Nye sho gha wanepo munu ngambi gha yore kaye kokaheya ene moyo wendi ghana ghuyongaritha? ³⁷ Yipi sha kone kutapa munu mukutjinditha moyo wendi? ³⁸ Kehe yu gho kuni fa honyi me nomanando ghange mumuhoko nghuno gho rungu nomaharwero, Mwana Munu naye mbo ghana ka mufa honyi apa mbo gheya ghurwedhima wa wihe noha engeli hokupongoka.''