¹ Heyire kumutara ghumwe ghodikuruviya, mumukunda waGerasenes. ² Apa gha shwayire Jesusi muwato, popo gha mwiyere katughuru yu gha shawayere mumayendo aye gha karire nomupepo dhodhimango. ³ Katughuru yu gha tungire mumayendo. Mbadiko oyu gha konine kumushinga karo, ngambi nga nodyenge. ⁴ Hamughangangire rorwingi noyikuvo nomenge, ene gha tjinune menge noyikuvo ne yawire ko. Mbadiko oyu gha karire nongcamu dhokumukwata. ⁵ Kehe ghuthiku nomutenya mumayendo nomumarundu, nga kuremekanga thinda nomawe ghomatwe. ⁶ Apa gha kambekedhire Jesusi, gha mutjireghere no kunyongama kughutho wendi. ⁷ Gha dirire wighuka, "Yinu munye sho ni tende noye, Jesusi, mwana Nyambi shokuru? Na kukanderera mudina dyaNyambi, wani humbitha." ⁸ Yoyishi aye gha muningangire eshi, "Shwaye mukatji komurume yo, owe mupepo ghoghumango." ⁹ Ghamwipurire eshi, ''Yowe dye dina dyoye?'' Pogha muhuthere eshi, ''Dina dyange ne Legion, ene twene twengi.'' ¹⁰ Ghatwarire kughutho kumukumbera eshi mbadi gha wa shwayithe mumukunda ghu. ¹¹ Pakarire yinguru yoyingi eyi ya dyerawere kudirundu, ¹² hamukumbere ghughamba eshi, ''Tutume muyinguru; tungene mumwayo.'' ¹³ Ghawa tawedhere; mupepo dhodhimango dhashwayire nodha ngenine muyinguru, noya tjirire yighurumuke kudirundu yikangene mudikuruviya, yinguru yokukuma kumayovi mawadi yafire mudikuruviya. ¹⁴ Hakungi hoyi nguru yi hatjirire nohaka hetire eyi ya hokokire mudoropa nokumutara ghoditunga, nohanu hayendire haka mone eyi yahokokire. ¹⁵ Po heyire kwaJesusi noha monine katughuru oyu gha karire no mupepo dhodhi mango, oyu dha munine mupepo dho dhimango Legion, ghana hungumana ghana vata muwawa, no ha muyapire. ¹⁶ Awa ha monine eyi ya hokokere katughuru yu dha munine mupepo dhodhimango hawa thothwenemo no kuwatongwera yo kuhatera kuyinguru. ¹⁷ Poha tamekire kumu kanderera eshi gha tunde mumukunda wagho. ¹⁸ Pakungena kwendi muwato, murume yu dha munine mupepo dhodhimango gha kumbere eshi gha kare nendi. ¹⁹ Ene Jesusi mbadi gha mutawedhere, ene gha mu tongwere eshi, ''Yende kudighumbo dyoye nokwahapoye, kawa tongwere eyi ghana kurughanena Fumu, no ngepi edi ghana kuneghedha thineke. ²⁰ Pogha yendire no katanga kayuvitha muDecapolis yinu yoyikuru eyi ghana murughanena Jesusi, no hanu wahe hatetukire. ²¹ Apa gha tjinaghanine karo Jesusi kumutara ghumwe nowato, mbunga dhidhikuru dha konganine kukwendi, ayene kumbadi dhodikuruviya. ²² Mupiterithi ghumwe gho musinagoge ghodina eshi Jairus gheyire apa gha mu monine gha mu tongamenine, kumaghuru ghendi. ²³ Ghamu kumbere yikandho yoyingi ghughamba eshi, ''Mwanange gho mukamadighana pepi nokufa ghadi. Nakanderera eshi wiye ghu kamukambeke ghekeruke ghapare.'' ²⁴ Po gha yendire nendi nombunga dhodhikuru dhamukuthire munyima no ha kuthundire kukwendi. ²⁵ Pakarire mbuyama oyu gha karire kupita manyinga myaka dikumi nodhiwadi. ²⁶ Nga nyandanga thikuma kuma nganga ghomengi no gha yongarithire yinu yendi yoyihe, ene mudyango dyo kuninga eshi gheruke ne kokukuwedherera. ²⁷ Apa gha yuvire mbudhi dho kuhatera kwaJesusi, gheyire munyima dhendi mumbunga nogha kwatire kuthikaghushu thendi. ²⁸ Gha ghambire eshi, ''Ngeshi nikwate ngenyu yitere yendi, nanyi niruke.'' ²⁹ Apa gha mu kwatire, kushwagha manyinga kwashayekire, nagha yikuyuvire muyirama yendi eshi ghaneruka kughukukutu wendi. ³⁰ Jesusi popo gha kuyuvire eshi ngcamu dhina mutundu, gha pirukire mumbunga nogha ghambire eshi, ''Yidye ghana ni kwata kuyitere?'' ³¹ Haka thishongero wendi hamu huthere eshi, ''Ghuna mono dhi mbunga dhina kudhingumutwedha, no kughamba eshi yidye ghana kukwata?'' ³² Ene Jesusi ne gha kengure pambunga oyu gha yitendire. ³³ Aye mbuyama, mukudimuka eyi yina muhokokera ghayapire no kututuma. Gheyire noghana tongamene kughutho wendi nogha mutongwere ghushemwa ghoghuhe. ³⁴ Ghamu tongwere eshi, ''Mwanange ghomukamadi, matawero ghoye ghana kwirura. Yende muthiraro nowiruke kumaghukukutu ghoye.'' ³⁵ Shime gha hokwera kughamba kenge, hanu hamwe haka shwayire kwamupiterithi gho sinagoge ghughamba eshi, ''Mwanoye ghomukamadighana ne ghana fu. Eyi wa kumukutha-kuthera muhongi ne nye?'' ³⁶ Ene apa gha yuvire Jesusi mbudhi edhi ha tapire, gha ghambire eshi, ''Wayapa. Kare vene nomatawero.'' ³⁷ Mbadi gha tawedhere kehe yuno ghawa kuthe kutundithako Petrusi, Jacobus naJohanesi mina Jacobusi. ³⁸ Heyire kundhugho dhaMupiterithi gho musinagoge noghamonine mo hanu awa ha yoghotere thikuma, awo ha dirire thikumenena. ³⁹ Apa gha ngenine mundhugho, gha ghambire nawo eshi, '''Yinu munye muna tokotera no nye muna kudirera? Mwanuke mbadi ghana fu ene kuna rara.'' ⁴⁰ Hamuhekire ene ghawa turire wahe panunda noghengenine nanyina nawiha mwanuke nowa hakarire nendi, hayendire oku gha karire mwanuke yu. ⁴¹ Gha shimbire dyoko dyamwanuke no kumutongwera eshi, ''Talitha, Koum!'' Kutongora eshi, ''Mukamadigha, kuna kukutongwera pinduke.'' ⁴² Popo vene mwanuke gha pindukire no ghayendire (aye gha karire myaka dikumi nodhiwadi). Hashambererire thikuma. ⁴³ Ghawa rawere eshi mbadiko karo munu ghumwe sho gha dimuke eyi yina hokoka, po gha wa ningire eshi ha pe mukamadighana yu kehe yino yokudya.