¹ Jesusi ghamatukire ghayende kurware rwaJudea thambo diya dhorware rwaJordan, nombunga dheghire karo kukwendi noghawahongire karo thikadi hayimufundhwere. ² Hafarasayi heyire kukwendi hamuyereke no hamwipurire eshi,''Hayitawedhera pamuragho eshi katughuru ghakuyakunuke nadidhiko dyendi ndi?'' ³ Ghawahuthire eshi,''Ngepi di ghamurawere Moses?'' ⁴ Awo hahutha eshi,''Moses ghatawedhere katughuru ghatjange mbapira dhomakuyakunukero.'' ⁵ Pamurandu ghoghukukutu mitjima dhenu yoghamutjangere muragho ghu,'' dyoghaghambire Jesusi. ⁶ Ene kutunda kumavarekero, 'Nyambi ghatendire katughuru nambuyama.' ⁷ Pathitambo thi,katughuru ghana kuthiya hawihe nanyina noka kupakerera pofotji nadidhiko dyendi, ⁸ nohanu hawadi wano hanakakara thipo thofotji.' Mbadi shimekaro yipo yiwadi,ene thofotji. ⁹ Thothihe ethi ghanunga Nyambi, mbadi ghakona munu kuthiyakunutha.'' ¹⁰ Ghopa ghakarire mundhugho, hakathishongero wendi,hamwipurire karo kuhatera kuyinu yi. ¹¹ Kukuwahutha eshi,''Keheyuno ghokumwagha mbuyama wendi nokayeka mbuyama ghumweya, ghana kutenda rungu. ¹² Ngeshi mbuyama hamwagha katughuru wendi, nokayeka katughuru ghumweya, ghana kutenda rungu. ¹³ hamuretere hanuke nawa kwate, ene hakathishongero waJesusi hawashingire. ¹⁴ Ene apa ghayimonine Jesusi yi, ghatokotire noghaghambire kukwagho eshi,''Mutawedhere hanuke heye kukwange nomwahashinga, ghufumu waNyambi ne ghowa hapitura yira gho. ¹⁵ Ghushemwa nakumutongwera, kehe yuno ghokupira kutambura ghufumu waNyambi thikahanuke hohambiru mbadimboghengenamo.'' ¹⁶ Ghashimbire hanuke mumoko ghendi no ghawakandedhekire apa ghawakambekire nyara dhendi. ¹⁷ Mashimurukero ghoruyendo rwendi, katughuru ghamutjirere ghutongamena noghamukumbere eshi,''Muhongi ghomunongo, yongepi naroghera kurughana padiyo nakuwane moyo ghororuheya?'' ¹⁸ Jesusi ghamuhuthire eshi,''Pashanye ghuna kunitoyera eshi munongo?Mbadiko muhunga kundundithako Nyambi pithendi. ¹⁹ Wadimuka miragho ndi: Wapagha, watjora ghuruwo,wedha,washupa ghumbango,wakara mandjwanda, noghufumaneke hawiho nanyoko.'' ²⁰ Katughuruyughahuthire eshi,''Muhongi oyo ne nayikutha kutunda kughumbiru wange.'' ²¹ Jesusi ghamukengururire noruhakitho. Noghaghambire nendi eshi,''Thinu thofotji wapumbwa. Kaghurithe eyi ghudi nayo noghukayitapere hahepwe, pomboghuwana ghushwi ghomudiwiru ;ndani ghowiye ghunikuthe. ²² Kukutha nando dhi noghatokorire nogha tundirepo ghakayende ghana tokota,yoyishi ghakarire noghushwimghowingi. ²³ Jesusi ghakengururire no ghatongwere hakathishongero wendi eshi,'' ngepi ghukukutu kwa mutungi kwingena mughufumu waNyambi.'' ²⁴ Hakathishongero wendi hatutukwire kunando dhi, ene jesusi ghatwarire kughutho shime ; '' hanuke ghukukutu thikuma mukwingena mughufumu waNyambi. ²⁵ Ghuredhu kwa ngameno kwingena mudiho dyo thong mbadi yira kwamutungi mukwingena mughufumu waNyambi. ²⁶ Hatetukire hikuma no haghambathanine, nodye ghokupwa kughamwena? ²⁷ Jesusi ghawakengurure noghaghambire eshi; '' kwamunu ne ghukukutu ene mbadi kwaNyambi. kuyoyiheya kwaNyambi ne ghuredhu.'' ²⁸ Petrusi ghatamekire kughamba nendi eshi; '' mone twathiya yoyiheya no tuna kukukutha.'' ²⁹ Jesusi hawahutha eshi; '' Ghushemwa nakumutongera, mbadiko yu ghathigha ndhugho, hakurwa no hamina, ndi nyina ngambi wihe no hanuke ndi mango papange nothitambo tho mbudhi dhokupongoka. ³⁰ Oyu mboghapira kutambura yikandho dithere muno mukaye; matungo, hakurwa nawa mina, ndi hanyina na wana, nomango, nomakutha kuthero mukaye aka kana kwiya nomoyo ghororuheya.'' ³¹ Ene hengi haka kutanga mbo hanakara haka kuhurerera, nohakakuhurerera hakakutanga. ³² Mundhira dhawo dho kuJerusalema, Jesusi ghakarire kughutho wawo. Hakathishongero hatutukwire nowa hakuthire hakarire no woma. munyima dhopo Jesusi ghataghurepo hashadikumi no hawadi noghawatongwerire eyi yakuyend yikamuhokokere. ³³ Mumone ko tuna kuyenda ku Jerusalema, mwana munu muna kamutapa kwawapristeri hohakuru nokwawakamarukwaro mu ka mutetera ndhango dhoyifa no kamutapa kwayiharuri. ³⁴ Mbo hanamusherera, kumuthipera mate, kumumwashura nokumupagha. Ene munyima dho mayuwa mahatu mbo ghana vumbuka mwawafu. ³⁵ Jacobusi naJohanesi, hana Sebedeusi hohatutughuru hahenyine kukwendi nohaghambire eshi; '' Muhongi, tunashana ghuturughanene keheyi shotukukumbere. ³⁶ Ghawepura eshi; '' yinu munye munahimi shonimutendere?'' ³⁷ Awo hahuthire eshi; tutawedhere mu ka hungumana mughufumu ghoye, ghumwe kurudyo no ghumwe kuru moho roye.'' ³⁸ Ene Jesusi ghawepura eshi; mbadi munadimuka eyi muna kwipura. Mbo munakono kunwa mukopi yu mboninwa, muyinyanda no diyoghero edi mbo haniyoyitha? ³⁹ Awo hahuthire kwendi eshi; mbo tu na kono.'' Jesusi ghawatongere eshi ,'' mu kopi yu mbo ni nwa mbadi mbo mu nwa mo, no diyoghero edi hakuniyoyitha mbadi mbo ha di muyoyitha. ⁴⁰ Ene kuhatera eshi; yo kuhatera eshi yidye sho gha hungumane kurudyo endi ku rumoho rwange ne mbadi ya kutapa yame, ene shimengwa kowo haghuturekera.'' ⁴¹ Hashadikumi apa hayuvire yinu yi, hatokotire nawo ha Jacobusi naJohanesi. ⁴² Hawetha kwendi Jesusi no ghawatongwere eshi; '' mwadimuka haraghuri wawahayidena hawawina no ghuraghuri. ⁴³ Ene mbadi yakona kukara kemo mumwenu. Oyu ghana shana kukara mukuru, ghakare mupika. ⁴⁴ Noyu ghahima kukara mukakutangerera mumwenu ghakare mupika wawaheya. ⁴⁵ Mwana munu mbadi gheyire eshi namumughamwene ene noghamughamwene, no kutapa moyo wendi ghukare thikomononitho thawahe.'' ⁴⁶ Hakeyire kuJeriko thika di hatundire kuJeriko nawakathishongero wendi nombunga dhodhikuru, mwana Timaghusi, Batolomeusi, makunga ghahungumanine kundhira. ⁴⁷ Apa ghayuvire eshi; Jesusi ghomukaNasareti, ghakughererire eshi; ''J esusi ghomwana Davita nifere nyeke. ⁴⁸ Awa hakarirepo hakoghaghurire mukunga yu, no kumutongwera eshi gha porere, ene ye ghakughererire shime, ''mwana Davita, nifere neke'' ⁴⁹ Ghemanine Jesusi no ghawa rawere hamwithe, hethire katughuru yu nohamutongwere eshi; ''tjimape! wimane! yamwe hanakwitha.'' ⁵⁰ Ghavukumene thishupata thendi kuya , ghemanine ghayende kwaJesusi. ⁵¹ Ghamuhuthire Jesusi eshi,''Yinu munye ghunashana shonikutendere?'' Mukunga yu ghaghambire eshi,'' Rabbi,nashana kumona.'' ⁵² Jesusi ghambire eshi,''Kayende. Matawero ghoye ghana kwirukitha.'' Popovene kokwiruka noghatangire kumona karo, noghamukuthire mundhira dhagho.