¹ Saulusi ghakarire nomatawero noyifa yendi. Mudiyuwa dyo apa ghatangire makuthakuthero ghomakuru mu kwimanganyena ngirishe dho muJerusalema; no hatawi waheya hakuharanganyine mumatungaghana ghaJudeya naSamariya, kutundithako haApostoli. ² Hatutughura awa hakutapa kwaNyambi ha horekire Stephanusi no hakarire no thindhivi thikuma. Ene Saulusi ghayerekire kuhanyaghura ngirishe. ³ Aye ngayendanga tunda dighumbo yenda dighumbo ghu kokakoka hatutughuru nawambuyama, no kuwatura mukashitiko. ⁴ Shime hatawi awa hakuhanyanganine hatwikerire kuyuvitha nando dhendi. ⁵ Phillipusi ghayendire munurumbara dhaSamariya nokuwayuvithera kuhatera kwaKristusi. ⁶ Mbunga dhawanu dhadheghetere ghutegherera kukoyi ghayuvithire Phillipusi; No dighano dyofotji hamuyuvire, no hamonine yidimukitho eyi ghatendire. ⁷ Dhimupepo dhodhimango dhashwaghire mohohengi awa dha nyikire,ghudira no wiyuka maywi ghawo,no hakakughara pofotji nawaka kupira kuyenda hohengi hapwire kwirura. ⁸ Yishamberera yoyikuru yakarire munurumbara dhiya. ⁹ Ene pakarire katughuru ghumwe munurumbara ghodina dyoSimoni, oyu ghakarire nokare murodhi;Aye ngatetukithanga thikuma hanu ho muSamariya ghumutanaghura eshi ayene munu gho mudyo. ¹⁰ Haka Samaritana waheya kutangera kohambiru kare kohakuru, ngaha muteghereranga; haghambire eshi,''Oyu katughuru ne yo ngcamu dhaNyambi dhakahurako.'' ¹¹ Hamutegherere yoyishi kare ghakatangire kuwatetukitha noghurodhi wendi. ¹² Ene apa hatawire kwaPhilipusi apa ghayuvithire kuhamena ghufumu waNyambi mudina dyaJesusi Kristusi, hapwire kuyogha kwahe hatutughuru nawambuyama. ¹³ Ngambi Simoni naye gha tawire kutunda apa ghawanine diyoghero ghakarire na Philipusi kehepano. Apa ghamonine yidimukitho no yirughana yo ngcamu yina kuhokoka, ghatetukire. ¹⁴ Apa hayuvire haApostoli ho muJerusalema eshi Samaria ne ghana tambura nando dhaNyambi, kokutuma kwagho Petrusi naJohanesi. ¹⁵ Apa haghurumukire , hawarapererire,podiyo hatambure mupepo ghokupongoka. ¹⁶ Oku pororuvedhe ne mbadi weya shime ghuneya mupepo ghokupongoka kwa kehe yuno ghomukatji kwao; Awo kwawanine ngenyu diyoghero dya fume Jesusi. ¹⁷ Podiyo haPetrisi naJohanesi hakambekire nyara papagho nohatamburire mupepo ghokupongoka. ¹⁸ Kutunda pa ghamomine Simoni eshi mupepo ghokupongoka ne ghaghutapire kupitera mukukambeka nyara dhawaApostoli,gha wapire manyinga. ¹⁹ Ghaghambire eshi,''Munipe name dhiNgcamu, eshi kwakeheyuno sho ni kone kukambeka nyara dhange ne ghatambure mupepo gho kupongoka.'' ²⁰ Ene Petrusi ghaghambire kukwendi eshi,''Kukona masiliveri ghoye ghapwe kuhanyaghura pofotji noye,yoyishi kuna kughayara we kutapera yitapa yaNyambi nomanyinga. ²¹ Mbadi ghuna hamenaa endi kukuyarekera mumoyi yirughana, yoyishi mutjima ghoye ne mbadi ghudi ghuhunga naNyambi. ²² Podiyo piruke kughuyi ghoye, noraperere kwaFumu, eshi ngo ghakuthighererepo kuyighayara yo mumutjima ghoye. ²³ Wamumono eshi ghudi noghuhungu ghoghupata munwato dhoghuyi.'' ²⁴ Simoni ghahuthire nokughamba eshi,''Ni kumberere kwaFumu,eshi mbadi yakuni hokokere eyi ghuna ghamba.'' ²⁵ Apa hamanine kughamba no kushupa nando dhaFumu,Petrusi;naJohanesi hahukire kuajerusalema, ghuyuvitha nando kumikunda dhodhingi dhomusamaritana. ²⁶ MuEngeli wafumu ghaghambire kwaPhilipusi eshi,''Matuke no yende muditokera mundhira dhokushwagha muJerusalema dhiyenda kuGaza.'' (Ndhira dhi ne dhomumamboreya.) ²⁷ Ghamatukire nokayenda. Mukukenga,pakarire katughuru ghumweya gho mukaEthopiya, oyu ghakarire mukuru mumarombe ghakandake. Aye gheya muJerusalema mukukugha. ²⁸ Aye ghakarire kuna kuhuka noghahungumanine muditemba dyendi,ghakarire kuna kutoya kuhatera muporofita Isaya. ²⁹ Mupepo waghambire kwaPhilipusi eshi,''Yende no kakare pepi no di ditemba.'' ³⁰ Podiyo Philipusi ghatjirere kukwendi,no ghamuyuvire ghana kutoya muporofeta Isaya,no kughamba eshi,''Yoyi ghutjwathana eyi ghuna kutoya ndi?'' ³¹ Aye kokughamba eshi,'' Ngepi sho ni kone,shimengwa ghumweya ghanighorwere'' Ghethire Philipus gheye muditemba nahungumane nendi. ³² Nothimingwa tho matjangwa thi ghatoyire mukaEthopiya yu ne ethi,''Hamutwarire yire ndjwi kukatomeno,no yira ndjwi kughutho wamukururi wendi,aye mbadi gha yahurire kanwa kendi.. ³³ Mumashwahwero ghendi veta dhendi hadhimushwaghithire. Yidye ghokukona kushingonona mahukero ghendi? Moyo wendi wapwire kughushimbapo pakaye.'' ³⁴ Podiyo katughuru yu ghepurire Philipusi,nokughamba eshi,''Nakanderera, ni tongwere eshi yidye ghana tambithera muporofeta yu,kwathinda ndi,endi kwaghumweya? ³⁵ Philipusi ghatangire kughamba,kutangerera no thiparatjangwa thi ghayuvire mbudhi dhodhiwa kukwendi dhokuhamena kwaJesusi. ³⁸ Apa hayendire mundhira,hakumine kumeyu nakatughuru yu kokughamba eshi,''Mone,meyu ne ghano. Yipi shoyinishinge mukupira kuni yogha?'' ^{36 37} Philipusi ghatangire kughamba eshi,''Ngeshi ghuna tawa no mutjima ghoye ghoghuheya,ghuna kuwana diyoghero.'' Muka Ethopiya yu ghahuthire eshi,''Natawa eshi Jesisi Kristusi ne mwana Nyambi.'' MukaEthopia yu gharawere ditemba dimane. Ha ghurumukire mumeyu,waheya naPhilipusi nakatughuru yu;na Philipusi gha muyoghire. ³⁹ Apa hakandukire mumeyu,mupepo wafumu washimbire Philipusi naKatughuru yu mbadi gha mumonine karo,ene ghayendire mundhira dhendi noyishamberera. ⁴⁰ Ene Philipusi ghahokokere kuAzotusi ghayendire kupitera mumukunda ghuya ghuyuvitha mbudhi dhodhiwa kumanurumbara kare ghakakumine kuCaesarea.