¹ Paghulusi, Silvanus naTimoteghusi, kumangirishe hakatesalonika mwaNyambi ghowihetu naFumu Jesusi Kristusi. ² Thinyeke kukwenu nothiraro thokwaNyambi wihetu naFumu Jesisi Kristusi. ³ Twakona kutapa matumero kwaNyambi papenu,mwayendhange thika di yaroghera,yoyishi matawero ghenu kuna kukura thikuma, noruhakitho ru mwakara naro mukatji kenu ruyeyuke. ⁴ No natwe twathinda tukununeke yokuhatera kukoye kumangirishe ghaNyambi kumadhidhimekero nomatawero gho kumakuthakuthero ghenu, no kuyihokoka yoyimango eyi mwapitire. ⁵ Oghu ne ghoghushupi waNyambi gho ndhango dho ghuhunga, podigho eshi mwa kumoneke mudyo mughufumu waNyambi, omu muna kunyanda namwe. ⁶ Napo kemo, ghuhunga kwaNyambi mukuhuka kuyinyanda kowa ha nyandeka, ⁷ no maghamweno kukwenu amwe mwanyandire netu, apa mboghamuhokora fumu Jesusi gho mudiwiru nawa engeli wendi ⁸ mumudiro gho kutumbuka, mukunyandeka awa hapira kudimuka Nyambi nowa hapira kukutekera mbudhi dhodhiwa dhaFumu wetu Jesusi. ⁹ Mbohana nyanda mahumbithero gho mahanyanganeno ghororuheya kushwagha kumakarero ghaFumu no kuma kughero gho kungcamu dhendi. ¹⁰ Nanyi mboghayitende apa mbogheya modiya diyuwa mukumukugha mohanu wendi hokupongoka no kutetuka kowa hatawire, yoyishi ghushupi wetu ghokaye ha ghutawire. ¹¹ Pamurandu ghoyi gho tuna kuraperera papoy,podiyo eshi ghakumone mudyo mukurwitha nongcamu dhendi omu mboghakumitheramo thitambo thothiwa no kehe thirughana thomatawero. ¹² Kuna kuraperera podigho eshi dina dyaFumu wetu Jesusi mukumukugha mumwenu,namwe mumwendi, kukutha thinyeke thaNyambi wetu naFumu Jesusi Kristusi.